¹ Lero olubaga lwoshi lwacigusha nka muntu muguma embere ly'engo eri embere z'omuhango gwa mishi. Babwira Azra, mwandisi, oku alerhe ecitabu c'irhegeko lya Musa, lyahanagwa na Nnamubaho kuli Israeli. ² N'omugula Ezra alerha irhegeko embere z'entimanano, yalimwo abalume, abakazi, na ngasiboshi balihare okuyunva. Lwali lusiku lurhanzi lw'omwezi gwa nda. ³ Ezra asoma omu citabu kurhondera sezi kuhika egarhi k'olusiku, omungo yali embere z'omuhango gwamishi, embere z'abalume n 'abakazi na ngasiboshi balihashire okuyunva. Olubaga lwoshi lwayunvirhiza obusomi bw'irhegeko. ⁴ Ezra, mwandisi, ali yimanzire oku lutari lw'empaho lwali rheganyibwe enyanya zantyo. Hofi naye haliyimanzire, ekulyo, Matitiya, Shemaya, Anaya, Uria,Hilkiya na Maseya, na elumosho, Pedaya, Mishaeli, Malkiya, Hashumu, Hashbadana, Zakazia na Meshulamu. ⁵ Ezra ayigula ecitabu n'olubaga lwoshi lulilwasinza, bulya ali lengerire enyanya lya boshi; n'erhi ayigula ecitabu, olubaga lwoshi lwa hwekera. ⁶ Ezra akuza Nnamubaho, Nnamahanga mukulu, n'olubaga lwoshi lwashuza, omu kulambula amaboko: bibentyo! bibentyo! na bacikumba n'okuyunama amalanga okw'idaho, embere za Nnamubaho. ⁷ Yoshua, Bani, Sherebia, Yamini, Akubu, Shabetai, Hodia, Maaseya, Kelita, Azaria, Yozabadi, Hanani, Pelaya, n'abalawi, bahugulira olubaga irhegeko, na ngasi muguma abera ahanali. ⁸ Bakagisoma ngasimango omu citabu c'irhegeko lya Nnamahanga, n'okuhana amahugulo lyo bayunvisa abantu ebidasiwe. ⁹ Nehemia, murhegesi, Ezra, mugula na mwandisi n'abalawi bakagi yigiriza olubaga, babwira olubaga lwoshi: olulusiku luhanyirwe kuli Nnamubaho, Nnamahanga winyu; murhabe burhe n'emirenge! bulya olubaga lwoshi lwalaka erhi bayunva irhegeko. ¹⁰ Bababwira: mugende mulye enyama eshushagire, munywe n'ecinywebwa cilembu, murhumire n'ecigabi oku barhagwerhi bici barheganyize, bulya olusiku luhanyirwe kuli Nnahamwirhu; murhabe burhe, bulya omwishingwe gwa Nnamubaho yo misi yinyu. ¹¹ Abalawi bahulisa olubaga lwoshi omukuderha: Muhulike, bulya ululusiku luli lucesibwa; murhabe burhe! ¹² N'olubaga lwoshi lwagenda okujirya n'okunywa, n'okurhumirana ecigabi, n'okujira omwishingwe munene. Bulya baliyunvirhe emyanzi babahuguliraga. ¹³ Olusiku lwakabirhi, abarhambo b'emilala y'olubaga lwoshi, abagula n'abalawi barhimanana back na Ezra, mwandisi, okuyunva amahugulo g'ebinwa by'amarhegeko. ¹⁴ Na banabona biyandisirwe omw'irhegeko Nnamubaho abwiraga Musa, oku abana b'israeli baligwasirwe okulama omu mahema amango g'idinye lya mwezi gwa nda, ¹⁵ na okuyalagaza ntyo omu mirhundu yabo yoshi n' e Yerusalemu: mugende mulonze oku ntondo ashami g'emizabibu, n'amashami g'omuzabibu gw'emuzirhu, amarhami g'omushugushugu, marhami ga mabo, n'amarhami g'emirhi y'enduluma okujizamwo amahema nkoku biyandisirwe. ¹⁶ Lero olubaga lwagenda okujilonza amarhami, na bajira amahema oku madari y'enyumpa zabo, omungo zabo, omu lulengalenga lw'enyumpa ya Nnamahanga, omungo y'omuhango gw'amishi, n'okungo y'omuhango gwa Efrahimu. ¹⁷ Entimanano yoshi yabagalukaga buja bajira amahema, banamama omwago mahema. Kurhega amango ga Yoshua, mwene Nuni, kuhika agomango, abana b'israeli barhali sagijirantyo. Na baba n'omwishingwe munene bwenene. ¹⁸ Basoma omucitabu c'irhegeko lya Nnamahanga ngasi lusiku, kurhangira olusiku lurhanzi kuhika oluzinda. Bashangira idinye nsiku nda, haba n'entimanano y'olukengwa olusiku lwakalimunani, nkoku byanalirhegesirwe.