¹ Hanazuka kurhenga omu bantu n'omu bakabo manja nene oku benewabo bayahudi. ² Baguma bakaderha: rhwe, bagala birhu na bali birhu rhuli banji; barhuhe engano, lyorhulya n'okulama. ³ Abandi baderha: rhwarhola amashwa girhu, enkoma zirhu n'enyumpa zirhu lyorhubona engano amango g'ishali. ⁴ Abandi baderha: rhwahogize enfaranga oku mashwa girhu n'enkoma zirhu oku ikoli lya mwami. ⁵ Nobwo emibiri yirhu eyosire nka mibiri ya benewirhu, abana birhu bayosire nka bana babo; na lolaga, rhuhebire bagala birhu na bali birhu oku buja, na banji omu banyere birhu bahindusire; rhurhanacigwerhi misi, n'amashwa girhu n'enkoma zirhu bikola bya bandi. ⁶ Nagaya bwenene erhi ezo ndulu zabo Okwebyo binwa. ⁷ Nahambira oku longoza abarhegesi n'abatwi b'emanja, n'okubabwira: Gurhiuku! mulimwahogeza benewinyu obunguke! nagusha hofi nabo ntimanano nene, ⁸ nanababwira: rhwagombwire benewirhu bayahudi baguzibagwa oku mashanja kushimbana obuhashe bwirhu; na ka mwe mwakaciguzize mwene benewinyu, na kulirhwe kwo bakaguzibwe! bahulika, babula ebi bashuza. ⁹ Kandi naderha: ebimujijire birhali binja. Kamurhaligwasirwe mugende omubwoba bwa Nnamahanga wirhu, okurha ganyagusibwa n'amashanja g'abashombanyi birhu? ¹⁰ Nie nani, balumuna bani n'abakozi bani, rhwabohozize enfaranga n'engano. Rhubabalire ngasibyo barhugwerhe. ¹¹ Mubagalulire ntyo ene amashwa gabo, enkoma zabo, emizirhu yabo, enyumpa zabo, nenfaranga, engano, ecinywebwa, amavurha mwabarholaga nka bunguke. ¹² Bashuza: rhwabagalulira na ntabyo rhwabahuna, rhwajira oku odesire. Nantyo nahamagala abagula nabasambisagya embere zabo oku bakenge ebyo binwa. ¹³ Nana bugumula ecishuli cani, omukuderha: Nnamahanga abugumule kwonokwo embuga ly'enyumpa yage n'ebirugu byangasi muntu orhakenge eyi myanzi, nantyo oyomuntu abugumulwe na asigwe heru! Entimanano yoshi yaderha: bibentyo: bakuza Nnamubaho n'olubaga lwakenga. ¹⁴ Kurhangira olusiku mwami ampebaga murhegesi wabo omucihugo ca Yuda, kurhangira omwaka gwa makumi gabirhi kuhika ogwa makumi gasharhu n'ibirhi gwa mwami Artashasta, lugero lwa myaka ikumi n'ibirhi, nie erhi balumuna bani rhurhalimiraga oku luhembo ly'oburhegesi. ¹⁵ Embere zani, abarhegesi barhanzi bali libuzize olubaga, n'okuyankirira kulibo omugati n'ecinywebwa, kulusha shekeli makumi gani za nfaranga; ciru abakozi babo bakagi libuza olubaga. ntajiragantyo, omu kuyoboha Nnamahanga. ¹⁶ Kulushisa, nakozire oku lungula olukuta, na rhurhagulaga ishwa ciru n'eriguma, n'abakozi bani rhweshi haguma rhwali oku mukolo. ¹⁷ Naligwerhe oku cibo cani bantu igana na makumi garhanu, bayahudi n'abatwi b'emanja, kulika abakagi rhuyishira kurhenga omu mashanja g'eburhambi. ¹⁸ bakagi nteganyiza ngasi lusiku mpazi nguma, bibuzi ndarhu bishogwa, n'orhunyunyi; na ngasi nsiku ikumi bakagi rheganya cinywebwa cinji ca ngasi lubero. Ciru akaba ntyo, ntahunaga ikoli lya murhegesi, bulya omukolo gwali okw'irhwe ly'olubaga. ¹⁹ Onkegere bwinjinja, mashi Nnamahanga wani, kulibyo byoshi najirire olwo lubaga.