¹ Ntalicigwika emirirango, erhi Sambalati, Tobia, Geshemu, omuharabu, n'abandi bashombanyi birhu bamanya oku ndi nalungula olukuta na oku harhacisigiri hashabusire. ² Lero Sambalati na Geshemu bantumiza okumbwira: oyishe, rhulabiriza haguma omu nciga z'olubanda lwe ono. Balirheganyize okunshereza. ³ Nabarhumira entumwa n'eri ishuzo: ngwerhe mukolo munene gwa kukola, natankana honoka; omukolo gwanayimanga erhi nakayisha emunda muli. ⁴ Bantumira entumwa kani okumbwira byonebyo, nanabashuza kwonakulya. ⁵ Sambalati antumira ogumwanzi bwa karhanu oku mukozi wage, walidwirhe amaruba oku kuboko kwage. ⁶ Galiyandisirwe ntya: emyanzi elumire omu mashanja, na Geshemu ahamirize oku we n'abayahudi murhanyize okugoma, na mulikwo mwogwerhe walungula enkuta. badesire oku wahinduka mwami wabo, ⁷ Wahebire ciru n'abalebi oku bakuyalagaze e Yerusalemu nka mwami wa Yuda. Na bunola eyo myanzi yahika kwo mwami. Oyishe rhubonane haguma. ⁸ Nashuza Sambalati: ebi odesire birhali; we oliwabisimarha. ⁹ Abobantu boshi bakagi rhuyobohya, na bakagi cibwira: Bayoloha n'omukolo gurhacijirwe, bunola, Nnamahanga wani, onzibuhye! ¹⁰ Nagenda naja emwa Shemaya, mwene Delaya, mwene Mehetabeli. Ali ciyigalire, na aderha: rhugende haguma omu nyumpa ya Nnamahanga, omu kagarhi k'isengero, na rhuyigale emihango y'ishengero, ulya bayishiri kuniga, na budufu lyobayisha oku kuniga. ¹¹ Nashuza: k'omulume oli nkanie ayake! Na mulume ndi oli nkanie wankaja omu isengero analame? Ntajemwo. ¹² Na nanamanyirira oku arhali Nnamahanga wali murhumire. cikwone alebantyo kulinie. Cikwone alebantyo bulya Sambalati na Tobia balimuhire enfaranga. ¹³ Erhi bamurheganya ntyo, balirhanyize mpu nayoboha, n'okukulikira ebyadesire, n'okujira ebyaha; na bahashe oku mpegeza irenge n'oku mbonya nshonyi. ¹⁴ Okengere, mashi Nnamahanga wani, Tobia na Sambalati n'emikolo yabo! okengere kandi na Naodia, mukazi mulebi n'abandi balebi balonzize oku nyobohya! ¹⁵ Olukuta lwayunjula olusiku lwa makumi gabirhi na zirhanu z'omwezi gwa Eluli, omu nsiku makumi garhanu na zibirhi. ¹⁶ Erhi abashombanyi birhu bamanya, ngasi mashanja galirhuzungulusire bagwarhwa n'ecoba; na babona nshonyi nyinji, na bamanyirira oku omukolo gwa yunjwire oku bulonza bwa Nnamahanga. ¹⁷ N'omwagomango hali n'abakulu ba Yuda bakagi yandikira Tobia burhahusa naye akagi bayandikira. ¹⁸ Bulya banji omu bayuda balishwekirwe kuliye oku ndahiro, bulya bali bakwi ba Shemaya, mwene Arashi, na oku omugala alirhozire mwali wa Meshulamu, mwene Berikia. ¹⁹ Akagi muderhera bwinja ahandi, n'oku mumanyisa ebi nadesire. Tobia akanyandikira amaruba oku nyobohya.