¹ Erhi Sambalati ayunva oku rhulirhwayubaka olukuta, agaya n'okuha burhe bwenene. ² Ashekera abayahudi, na aderha embere za benewabo n'embere z'abasirika be Samaria: bici aba bayahudi b'engonyo balibakolera? karhwabaleka bagendekere? Kabarhula? kababumba? Kabacirizusa b'ishe bafire babishe omu lutulo n'okuhya n'omuliro? ³ Tobiya, mu amoni ali ahaburhambi bwage na anaderha: bayubake kwone! Erhi omuga gwakanuga, gwanashabula olukuta lwabo lw'amabuye. ⁴ Yunvirhiza, mashi Nnamahanga wirhu, oku rhulirhwaganyagusibwa! Obahirimizekwo ebijaci byabo okubirhwe byabo, na obahane oku buhaguzi okw'idaho babera mpira. ⁵ Orhababalire amahushe gabo, na ebyaha byabo birhazazibwe embere zawe; bulya babalira abali bayubaka. ⁶ Rhwayubaka olukuta lwali lwamayunjula hoshi kuhika ekagarhi oku buli. Na olubaga lwaheba omukolo oku murhima. ⁷ Cikwone Sambalati, Tobiya, abaharabu, aha Amoni, abe asdodi, bagaya bwenene erhibamanya oku obubabke bugendekire, n'oku emirhule ejire yazirhwa. ⁸ Bacigusha haguma okurhabalira Yerusalemu n'oku shereza. ⁹ Rhwahuna Nnamahanga wirhu, rhwaheba n'abalanzi oku lukuta budufu na mushi okulanga amatabaro. ¹⁰ Cikwone Yuda akagiderha, emisi ebulisire oku babarhwire emicimba, n'obusherere buli bunene, rhurhakahasha okulungula olukuta. ¹¹ N'abashosi anti birhu balibaderha: barhamanye barhanabone bici kuhika rhube mulibo; rhwabayirha rhuyimanze n'omukolo. ¹² N'obwo abayahudi balama hofi nabo bayishire kalikumi oku rhurhonda, kurhenga hoshi okuja emunda rhuli. ¹³ Byobyarhumire nakagiheba, omu kabanda enyuma z'olukuta n'okwidaho likazre, embaga kushimbana emilala, ngasimuguma n'engorho, n'itumu n'ebisonga. ¹⁴ Nakasinza, n'erhi nyinamuka, nabwira abatwi b'emanja bakulu n'olubaga lwasigire: murhayobohaga! Mukegere Nnahamwirhu, mukulu na wakuyobohya, na mulwire benewinyu, bagalabinyu na bali binyu, bakinywe n'enyumpa zinyu. ¹⁵ Erhi abashombanyi birhu bamanya oku rhulalire, Nnamahanga ashereza omuhigo gwabo, na rhwashubira rhweshi oku lukuta ngasimuguma oku mukolo gwage. ¹⁶ Kurhangira olwolusiku, ecihimbi c'abakozi bani balihagasire amatumu, ensiribo n'ebisonga n'empu. Abarhambo bali enyuma ly'enyumpa ya Yuda yoshi. ¹⁷ Abakagiyubaka olukuta, n'abakagibarhula erhi kupakira emicimba, bakagikolesa kuboko kuguma n'okundi kufumbarhe omuherho. ¹⁸ ngasi muguma wabo omukukola, alihagasire engorho yage omu cibunu, na owakagi buh'omushekera aliyimanzire hofi nanie. ¹⁹ Nabwira abakulu, n'abatwi b'olubanja bakulu n'okulbaga: omukolo guli mugali bwenene na rhushandire oku lukuta, rhuyakine maguma oku babo. ²⁰ Okw'izu ly'empanda, munacigushe hofi nanirhu, oluhande omushekera gwalakiraga; Nnamahanga wirhu arhulwira. ²¹ Ntyo kwo rhwagendekezize omukolo, baguma mulirhwe itulu omukuboko kurhangira sezi kuhika entonde ziboneke. ²² Mwonagomango, naciri bwira olubaga: ngasimuguma akalala omu Yerusalemu n'omukozi wage; rhulange izamu budufu, n'okumpeka mushi. ²³ Na rhurhahogolaga emyambalo yirhu, nie n'abalumuna bani, bakozi bani n'abantu b'obulanzi balinkulikire; ngasimuguma aligwerhe empenzi zage n'amishi.