¹ Anacibabwira kandi erhi: Mmubwizire okunali, baguma omu bali hano barha kafa, buzira oku bona obwami bwa Nnamahanga bwayisha n'obuhashe. ² Enyuma za nsiku ndarhu, Yezu akagi huna haguma na Petro, Yakobo na Yohona, ancibayegula e burhambi oku ntondo ndi-ndi. Anacihindamulwa enshusho e malanga gabo; ³ Emishangi yage yoshi ya kanyenyegerha, mweru kulusha, ciru oku ntaye wen'igulu wakaijijire mweru. ⁴ Eliya na Musa banacibabonekara, bali baciyigiriza na Yesu. ⁵ Petro, aderha ntya, abwira Yesu: Rabi, kulikwinja rhubere hano; rhutule bishagala bisharhu, ciguma cawe, ciguma ca Musa, n'ecindi ca Eliya. ⁶ Bulya arhali manyire eby'aderha, baba mw'akarhinda. ⁷ Ehitu hyayisha hyabahundikira, n'omwehyo hitu mwarhenga izu erhi: Oyu ali Mugala wani mwikubagirwa: mmuyunve! ⁸ Honaho entumwa zakalola eburhambi, n'okubona Yesu yene haguma nabo. ⁹ Nk'okubajaga bahonoka omu ntondo, Yesu anacibayinginga oku barhabwiraga mtu ebi babwine, kuhika amango omwana w'omuntu afuka omu bafire. ¹⁰ Banacibikira ogw'omwanzi, banacija dosanya bone okufuka omu bafîre kw'okurhi. ¹¹ Abanafunzi bamudosa el'idoso: Bulya gurhi abandisi banakaderha oku Eliya ye wayishe burhangiriza? ¹² Abashuza erhi: Eliya ayisha burhangiriza, ye wayishi rheganya ebintu byoshi. Bulya gurhi biyandisirwe oku omwana w'omuntu alibuzibwa bwenene n'okuganyagusibwa? ¹³ Cikwone mmubwizire oku Eliya ayishire, bamulibuza kw'okubanaliciyunvirhe, nk'oku byaliyandisirwe ahanyanya lyage. ¹⁴ Erhi bahika hofi n'entumwa, babona olubaga lubazungulusire, n'abandisi bakagi bahagasa. ¹⁵ Olubaga erhi lubona Yezu, bakanguka, banamulibirhira yo mpu baji mulamusa. ¹⁶ Abadosa erhi: Bici mwakagi hagasanya-ko? ¹⁷ Muntu muguma omu lubaga amushuza erhi: Mwigiriza, nalidwirhe e mundoli mugala wani, anali gwerhwe n'omuzimu w'akaduma. ¹⁸ Ngasi hoshi anakagi gwarhirwa, amukweba okw'idaho; akarheng' ifula, n'oku kenyeza amino, n'okudorha. Nabwizire abigirizibwa bawe bamukule kw'oyo muzimu, barhahashire. ¹⁹ Yezu ababwira erhi: Mwe muburhwa gw'abarhayemiri, kuhika kasangi kahi nayishiba ndi na ninyu? Kasangi Kali gurhi mwayishi nindirira? ²⁰ bon'obo oyo mwana abona Yezu, omuzimu mubi ashabaduka nkayaka; ahirima okw'idaho, ajaci vuru-vunza. ²¹ Yezu adosa ishe erhi: Agwerhe kasangi kali gurhi bimugwerhe? Kurhondera oburho bwage, amushuza. ²² Nakanji kanji oyo muzimu anaka mukweba omu muliro n'omu lwishi mpu ly'azika. Cikwone, nkawankasha, orhurhabale, orhubere bwonjo. ²³ Yezu amubwira erhi: Nka wankansima!... Byoshi byana hashikana oku ngasi wankayemera. ²⁴ Honaho ishe w'oyo mwana ayakuza erhi: Nyemire! yisha ontabale omwaga mabirwa! ²⁵ Yezu, abona Olubaga lulibisire, akalihira oyo muzimu mubi, n'oku mubwira erhi: Muzimu w'akaduma nanamurhunva, nkurhegesire, huluka omw'oyu mwana, orhanacigaluke. ²⁶ Ahuluka, abona olubaga lulibisire, n'oku lulwikiriza n'okushabaduka. Oyo mwana aba nka mufû, kuhika banji barhanya mpw'anafire. ²⁷ Cikwone Yesu, anacimugwarha okuboko, amuyimusa. Anahasha oku yimanga. ²⁸ Enyuma za Yesu oku daha omu nyumpa, abigirizibwa bage baka mudosa bufundafunda erhi: Bulya gurhi rhurhahashire oku hinva oyo muzimu? ²⁹ Abashuza erhi: Oyo muzimu wantyo arharhenga na agarhali mahuno. ³⁰ Barhenga aho, bagera omu Galilaya. Yezu arhalonza bamumanye. ³¹ Bulya akagi yigiriza entumwa zage, n'oku babwira erhi: Omwana w'omuntu ayishi haanwa omu maboko ga-bene bantu; bayishi muyirha, n'enyuma lya nsiku zisharhu enyuma z'okuyirhwa, ayishi fûka. ³² Cikwone abigirizibwa bage barhakagi yunva ogw'omugani, n'okuyoboha bwadosa. ³³ Bahika e Kapernaumu. Erhi baba bakola bali omu nyumpa, Yezu abadosa erhi: Milongwe ya bici mwajaga ajira omu njira? ³⁴ Cikwone bashuza, bulya omu njira bali gwerhe emilongwe y'oku manya ndi mukulu. ³⁵ Honaho atamala, ahamagala lir'ikumi na babirhi, n'oku babwira erhi: Olonza okw'abe wa burhanzi, anabe wa buzinda wa boshi na mukozi wa boshi. ³⁶ Anacirhola omwana musungunu, amuheba ekagarhi kabo, n'oku mugwarha omu maboko gage, anaci babwira erhi: ³⁷ Ngasi yeshi wakanyankirira izino lyani nk'aba bana barho aho erhi nie ayankirire; na ngasi yeshi wakanyankirira arhali nie ayankirire, cikwone owantumaga. ³⁸ Yohana amubwira erhi: Mwigiriza, rhwabwine omuntu wakagi hinva abazimu omw'izino lyawe; rhwama mulahiza, bulya arhakagija arhushimbulira. ³⁹ Murhamulahizé, aderha Yezu; bulya arhali omuntu wa-nka, wa-nkajira ebisomerine omw'izino lyani, enyuma ciru anaderha ebi-bi omw'izino lyani. ⁴⁰ Orhanka rhuderha kubi erhyali mwene wirhu. ⁴¹ Na ngasi yeshi wa-nka muhereza igopo lya mishi omw'izino lyani, bulya muli ba Kristu, mmubwizire oku-nali, arhakabula ciru oluhembo lwage. ⁴² Cikwone, nka muguma akarhindibuza muguma w'omu balumuna bage bagwerhe obwemere, bushinganine kuli-ye anashwekerwe olusho omw'igosi lunene, n'oku bulundulira omu nyanja. ⁴³ Nk'okuboko kwawe kwakaba kuli-we bulyo bwa kukuhirimya, twa-kwo; lir'iragi e mwawe oku daha cirema omu buzine, ⁴⁴ aho okuba na mabokw'abirhi n'oku daha nag'omu cihenama, omu muliro gurhazima. ⁴⁵ Nk'okugulu kwawe kwaka kuhushisa okujira ecaha ona kutwe; kulikwinja kuli-we odahe cirema omu buzine, ⁴⁶ ah'okugwarha magulu gabirhi n'oku kwebwa omu muliro gurhazima. ⁴⁷ Na nk'isu lyawe lyanka kuhushisa okujira ecaha ona lirhomole; iragi kuli-we odahe omu bwami bwa Nnamahanga, n'isu liguma, ahokuba na masû gabirhi n'okuyisi kwebwa omu cihenama, ⁴⁸ omwo ebivinja byamwo birhafa n'omuliro gurhazima. ⁴⁹ Bulya ngasi muntu yeshi yeshi ayishi hebwa kw'omunyu n'omuliro. ⁵⁰ Omunyu guba mwinja; Cikwone erhi gwankaheza irehe, bici mwankaheba-mwo lyo gununa? Mube n'omunyu muli mwenene, munabe n'omurhala mwene nanene.