¹ Yesu, arheng'aho aja omu nciga z'Ebuyahudi ishiriza lye Yordani. Olubaga lwarhimanana buhyahya hofi naye, n'okushimbana n'ekomedu yage, aciri rhangira oku bayigiriza. ² Abafarisayo bamwegera; na mpu lyo bamurhangula, bamudosa erhi biyemerirwe oku mulume anahinva mukâge. ³ Abâshuza gurhi Musa abayandikire? ⁴ Baderha erhi, Musa, alikwire okuyandika amaruba n'oku lekana n'oku muhinva. ⁵ Na Yezu ababwira: erhi enyanya ly'emirhima yinyu mizibu co carhumire Musa âmuha el'irhegeko. ⁶ Ci oku murhondero gw'okulema, Nnamahanga ajira omulume n'omukazi; ⁷ Co cirhumire omulume asige ishe na nnîna, n'okuci shwekera kuli mukage, ⁸ Nabo babiri bahinduke okuba mubiri muguma. Nabo barhacibe babiri, cibabe mubiri muguma. ⁹ Ntyo omuntu arhaberulaga eci Lulema ahumanyîze. ¹⁰ Erhi bakola bali omu nyumpa, abigirizibwa bamudosagya kandi okw'eco. ¹¹ Ababwira: owanka lika mukage akarhola n'owindi, erhi ajijire obugonyi; ¹² Na nk'omukazi akasig'îba aheruke omu mw'owindi, erhi ajijire obugonyi. ¹³ Bamu lerhera abana barho, mpu abahume kwo. C'abigirizibwa ba kalihira abali badwirhe. ¹⁴ Yesu, omu kubon'eco, agaya, ababwira: Muleke abana barho baj'emwani, na murhana basike; bulya obwami bwa Mungu buli bw'ababashushire. ¹⁵ Mmubwizire okunali, ngasi yeshi orha yankirire obwami bwa Mungu nka mwana murho arhanka daha mwo. ¹⁶ Anaci babagalira omu maboko gage, n'oku bagisha, omu kubaheba kw'amaboko. ¹⁷ Nkoku Yesu ajaga omu njira, muntu muguma alibirha, aciyoha oku madwi emalanga gage: Amudosa, mwalimu mwinja, gurhi ngwasirwe okujira ly'onyima akalamu k'emyakula? ¹⁸ Yezu amubwira: Carhuma wampamagala mwinja? Ntaye mwinja kulusha Mungu yene. ¹⁹ Omanyire amarhegeko: Orhashungulaga; orhaniganaga; orhazimbaga; orha nywerheranaga, orha hushiraga omuntu yeshi; okenge sho na nnyoko. ²⁰ Amushuza: Mwalimu, mba nkozire ebyo byoshi kurhenga obusole bwani. ²¹ Yesu, erhi amulola, amusima, n'oku mubwira: Obulirwe na kantu kaguma; genda, oguze eby'ugwerhe byoshi, obihane oku bagalaganda, wayisha habwa omuhako omu mpingu. Ogali isha, ona nkulikire. ²² Ci, omukuba burhe n'ako kanwa, agenda ali burhe; bulya aligwerhe birugu binji. ²³ Yesu, alolelera eburhambi lyage, abwir'abigirizibwa bage: Oku kwashiba kudarhi oku bagale oku daha omu bwami bwa Mungu! ²⁴ Abigirizibwa barhangala okubyo Yesu aderhaga ntyo. Na, ashubirira, aabwira: Bana bani, oku biri bizibu oku bacishwekire oku birugu okudaha omu bwami bwa Mungu! ²⁵ Kuli kulembu oku "ngamiya" okugera omu burhule bw'ensingé kulusha omugale okudaha omu bwami bwa Mungu. ²⁶ Abigirizibwa baciri rhangala kulusha, bana bwirana haguma oku bandi; Ndigi wanka cunguka? ²⁷ Yesu abasinza, n'okuderha: okwo kuli kuzibu oku bantu. carhali emwa Mungu: bulya byoshi bihashikine emwa Mungu. ²⁸ Petro arhangira amubwira; alaga, rhwasizire byoshi, rhwakukulikira. ²⁹ Yesu ashuza: Nkubwizire okuli, ntaye yeshi, wasizire, erhi nie ntuma n'erhi mwanzi gwa kalembe, enyumpa yage, erhi bene wage, erhi bâci bâbo, nnina, erh'ishe erhi bana bage, erhi mashwa gage, ³⁰ Orhakamarhe kel'igana, omu agano mango hano, enyumpa , bene wage, bali babo, ba nnina, abana, n'amashwa, n'okulibuzibwa, na, n'omu nsiku zaisha, akalamu k'ensiku n'amango. ³¹ Banji ba mbere baciba bazinda, na banji bazinda baciba bambere. ³² Erhi bali omunjira okushonera e Yerusalemu, na Yesu abashokolire. Ab'igirizibwa balilugusire n'okumu kulikira n'ecoba. Yesu aciri rhola balya ikumi na babiri hofi naye, anarhangira oku babwira ebigwasirwe okumu yishira. ³³ Alagi, rhushonîre e Yerusalemu, na Mwene Muntu ahanwa omu maboko g'abagula bakulu n'ag'abandisi. Bamu twira olubanja mpu afe, na bamuhana omu maboko g'abapagani. ³⁴ Bamu ganyagusa, bamu twira kw'amarhi, bamu shurh'emikoba, bana munigisa; na, nsiku isharhu enyuma, afuka. ³⁵ Bene Zebedayo, Yakobo na Yowana, bayegera Yesu, n'okumubwira: Mwalimu, rhulonzize orhujirire eci rhwakuhuna. ³⁶ Ababwira: Bici mulonzize mmujirire? ³⁷ Bamubwira, orhuhe, okutamala muguma ekulyo kwawe n'owindi ekulembe kwawe, han'oja omu burhwali bwawe. ³⁸ Yesu abashuza: Murhamanyiri eci muhunyire. Ka mwanahashi nywa ecikombe nanywa, erhi oku batizibwa obubatizo nabatizibwa? ³⁹ Baderha, erhi rhwanahasha. Na Yesu abashuza: biri okuli oku mwashi nywa ecikombe ngwasirwe nywe, erhi okubatizibwa obubatizo n'abatizibwa; ⁴⁰ Cikwone oku biyerekire oku dahala ekulyo kwani erhi ekulembe kwani, ebyo birhanyerekiri, kurhanahabwe kulusha balya bakurheganyizibwe. ⁴¹ Baly'ikumi erhi bayunva ntyo, barhangira bagaya Yakobo na Yowana. ⁴² Yesu abahamagala, n'oku babwira: Mumanyire oku ngasi babonekana bakulu enyanya l'yolubaga, bana barhambule oku misi, n'abakulu bana barhegeke. ⁴³ Arhali ntyo omu kagarhi kinyu. Cikwone owankalonza okuba mukulu omu karhi kinyu, agwasirwe abe mukozi winyu; ⁴⁴ Na yeshi olonzize okuba wa burhanzi omu karhi kinyu, agwasirwe abe mujà wa boshi. ⁴⁵ Bulya Mwene Muntu ayishire, arhali mpu ayishi kolerwa, ci kwishi kola n'okuhana obugumanana bwage okuba ntungo ya banji. ⁴⁶ Bahika e Yeriko. Na, amango Yesu arhengaga omwo lugo, haguma n'abigirizibwa bage n'olubaga lunene, mwene Timoteyo, Bartolomayo, olya muhurha wakagijahuna, alidahire oku njira. ⁴⁷ Ayunva oku Yesu we Nanzareti oyishire, anacirhangira ahamagaza; Mwene Daudi; Yesu onfe bwonjo! ⁴⁸ Banji bamukalihira, mpu bamu hulisé; Ci kwone aka hamagala bwenene kulusha; Mugala wa Daudi, onfe bwonjo! ⁴⁹ Yesu ayimanga, n'okuderha: Hamagali ye. Bahamagala ogwo muhurha, bamubwira: Ocihangane, yimuka, akuhamagire. ⁵⁰ Ogwo muhurha gwakabulira igoti lyagwo, na, omu kuyimuka, acikweba, aja emunda Yesu ali. ⁵¹ Yesu, arhola ecinwa, amubwira: Bici olonzize nkujirire? Mwalimu mukulu, oyo muhurha amushuza, mpabwe okubona. ⁵² Na Yezu amubwira: Genda, obwemere bwawe bwakucizize. Honaho anashweguka amasu, anakulikira Yesu omu njira.