¹ Erhi ayegerera e Yerusalemu, n'erhi akola hofi ne Betfage n'Ebetaniya, lunda lw'entondo y'Emizeituni, Yesu arhuma abigirizibwa bage babiri, ² Ababwira: Mugende omu lugo luli embere zinyu; hano muja omu lugo, mwabona omwana wa punda mushweke, kuli ye nta muntu osingi mutamala kwo, mumushwekule mumunderhere. ³ Erhi omuntu akababwira: bulya gurhi mujijire ntyo? Mushuze: Nnahamwirhu acifinjire ye, Anamuleka muyishe honaho. ⁴ Abigirizibwa, erhi bagenda, babugana omwana wa punda hofi n'olunvi, oku burhambi bw'enjira, bana mushwekula. ⁵ Abali aho babadosa: bici mugwerhe mwajira? Bulya gurhi mushwekwire oyo mwana wa punda? ⁶ Bashuza nkoku Yesu anali babwizire. Babaleka bagenda ⁷ Bahekera Yesu omwana wa punda, bamu bamba kw'emishangi, na Yezu amutamala kwo. ⁸ Bantu banji babamba emishangi omu njira, n'abandi batwa amarhami omu mashwa. ⁹ Abali shokwire n'abalinyuma bajayimba: Hosana, agishwe oyishire okw'izino lya Nnahamwirhu. ¹⁰ N'obwami buyishire bugishwe, bwami bwa Daudi, larha wirhu! Hosana omu hantu himana hayinamule bwenene! ¹¹ Yesu adaha omu Yerusalemu, adaha omu ka nyamuzinda, erhi ayusa kusinza byoshi, bwayira, agenda e Betaniya haguma n'abigirizibwa bage ikumi na babiri. ¹² Lisirhondo, erhi barhenga e Betaniya Yesu ayunva ishali. ¹³ Balangira oku murhi gw'omuzabibu gwali kw'abasi, basinza erhi babona kw'akantu, bagu yegera babona basi bone bakuli, bulya karhali kasanzi ka mizabibu. ¹⁴ Aderha, abwira ogwo murhi mpu: Omuntu yeshi yeshi arhacilyaga oku malehe gawe, abigirizibwa bage erhi bali bayunva. ¹⁵ Bahika e Yerusalemu, na Yesu adaha omu ka Nyamuzinda. ahinva abakagi guza n'okugula omu ka Nyamuzinda, abalandula ameza g'abakagi kaba enfaranga; n'aha bakagiguliza enjiwa; ¹⁶ Arhalekaga ciru n'omuguma okurhenza akantu omu kanyamuzinda. ¹⁷ Ayigiriza aderha: Ka birhayandisirwi: enyumpa yani yahamagalwa ya mahuno oku mbaga zoshi? Cikwone mwehe, mwana yihindula lwala lwa bishambo. ¹⁸ Abagula bakulu n'abandisi, erhi babiyunva, balonza obulyo bw'oku murhenza, bulya bali muyobohire, bulya olubaga lwoshi lwali lwana yemera enyigirizo zage. ¹⁹ Erhi buyira, Yezu arhenga omu lugo. ²⁰ Sezi sezi, erhi bagera, abigirizibwa babona gulya murhi gwayumire kuhika oku mizi. ²¹ Petro, akengera ebyagezire, abwira Yezu: Rabi, lola, gulya muzabibu wa hehereraga oku gwa yumire. ²² Yesu arhol'obuderhe, ababwira: Mube n'obwemere muli Nnamahanga. ²³ Mubwizire okunali, erhi omuntu akabwira eyi ntondo: rhenga aho ocikwebe omu nyanja, nka arhali mwo karhinda omu murhima gwage, ci ayemere oku ebi adesire byaba, anabona bya hikirira. ²⁴ Co cirhumire mmubwizire: ngasi byoshi mwakahuna omu kushenga, muyemere oku mubiyankirire, n'oku mwabona byahikirira. ²⁵ N'erhi mwaka yimuka mwa shenga, nkogwerhe ecisarhazo n'omuntu, onababalire, lyo larha winyu oli omu mpingu amu babalira amabi ginyu. ²⁶ Cikwone nka murhababaliri, larha winyu oli omu mpingu naye arhaka mubabalira amabi ginyu. ²⁷ Bashubira e Yerusalemu, n'erhi Yezu aba akola aja lambagira omu ka Nyamuzinda, abagula bakulu, abandisi nabashosi bamuyishira, ²⁸ Bamubwira: oku burhwali buci oli wajira ebyo, nandi wakuhaga obuhashe bw'oku bijira? ²⁹ Yezu abashuza: nani namudosa: munshuze nani, namubwira oku buhashe buci ndi najira ebi. ³⁰ Obu batizo bwa Yowane k'enyanya bwarhengaga erhi emw'abantu? Munshuze. ³¹ Cikwone barhengi bwirana bone: mpu rhukashuza: okw'enyanya, arhubwira: mpu bulyagurhi rhurha muyemiri? ³² Na rhuka mushuza: Emw'abantu... Bali yobohire olubaga, bulya boshi bali yemire oku Yowane ali mulebi. ³³ Lero banacishuza Yesu: Rhurha manyiri. Yezu naye ababwira: Nani kwonoko ntababwire oku buhashe bwani buci ndi najira ebi.