¹ Okuhandi Yezu arhondera okubabwira oku migani. Muntu muguma arhwera olukoma. Aluzungulusa k'olugurhu, abinja omukenzi, n'okuyubaka omulunga gw'okulanguliza; enyuma lyaho aheba mw'abahinzi, Anacibalama. ² Erhi amango g'okuhumbula gahika arhuma omwambali emunda abahinzi bali, mpu bamuhage agage malehe g'omw'olukoma. ³ Cikwone bagwarha olya mwambali, bamushurha banamugalula maboko mumu. ⁴ Ashubi barhumira obwakabiri owundi mwambali; bamushurhira okw'irhwe, n'okumujacira. ⁵ Ashubi rhumayo owakasharhu, yehe bamuniga, n'abandi banji, nabo babashurha erhi kubaniga. ⁶ Kandi aligwerhe omugala muzigirwa; abarhumira ye okubuzinda, aderha: bakenga mugala wani. ⁷ Cikwone abobahinzi babwirana bone nane: alaga enfula yage;mugishe, rhumunige, n'ogwo mwimo gwayishiba gwirhu. ⁸ Banacimugwarha, bamuniga, n'oku mukweba enyuma ly'olukoma. ⁹ Ntyo, kurhigi ayishigijira oyo n'elishwa? Ayishiyisha aheze abo bahinzi, n'ishwa ayishi liha abandi. ¹⁰ Kamurhasangi soma ogu mwanzi gw'amandiko: Gudesire mpu ibuye abubasi balahiraga lyahebirwe aha murhondero bw'enyumpa; ¹¹ Karhali oku bulonza bwa Nnahâmwirhu lya hebirwe ho, lyanaba ihano oku masu girhu? ¹² Balonza oku mugwarha ci bayoboha olubaga. Bayunvirhe oku enyanya zabo Yezu aderha ogw'omugani. Banaci murhengaho n'okucigendera. ¹³ Barhumira Yezu baguma b'omubafarisayo n'abaherodi, mpu bamurhege omu binwa byabo. ¹⁴ Banaciyishi mubwira mpu: Mwigiriza, rhumanyire oku w'okuli, arhanarhinya ndi; bulya orhalola nshusho y'abantu, n'okuyigiriza enjira ya Nnâmahanga omu okuli. Kabiyemerirwe oku vurha ikoli emwa mwami Sezari? ¹⁵ Karhwa navurha, erhi rhurhanka vurha? Yezu, anacimanya obulyalya bwabo, abashuza: Bulya gurhi mwantangula ntya? Nderheri olufaranga, ndulolekwo. ¹⁶ Balerha ho luguma; Yezu anacibadosa: Biribyandi eyinshusho n'aga mandiko? Bya Sezari, ko bamushuzize. ¹⁷ Lero anaci babwira mpu: Mugalulire Sezari ebiri byage, n'emwa Nnâmahanga ebiri byage. N'oku abashuzize kwabarhangaza. ¹⁸ Abasandukayo, bobakaderha oku harhakaciba obufûke bw'abafire, bayishira Yezu n'oku muha er'idoso: ¹⁹ Mwigiriza, lola ebi Musa ebi arhubwizire: erhi mukulu w'omuntu akafa, asige n'omukazi buzira bana, mulumuna wage anarhola oyo mukana, lyo aburhira mwene wabo. ²⁰ N'obwo, hali bana nda balondanyi. Owaburhanzi aja omu buhya, anacifa nshizo. ²¹ Owakabiri anaciyinjira namukazi, anacifa nshizo. Kwo byahikirire n'oku wakasharhu, ²² na muli abo bali nda nta mwana basizire. Enyuma lyabo boshi, omukazi naye afa. ²³ Oku bufuke, oyo mukazi ayishi ba wandi? Bulya abo boshi bamuyansire. ²⁴ Yezu anacibashuza: Kamurhahabusiri, okuba murhayunva ciru amandiko, erhi ciru obuhashe bwa Nnamuzinda? ²⁵ Bulya, okubufuke bw'abafire, abalume barhakaciyanka bakazi, erhi abakazi barhakaciheruka, ci bayishi yorha nka bamalahika omu mpingu. ²⁶ Okubiyerekire obufûke bw'abafire, kamurhasomaga, omu citabu ca Musa, okubiyerekire ecinyebwa: Nyendi Nyamuzinda wa Abrahamu, Nyamuzinda wa Isaka, na Nyamuzinda wa Yakobo? ²⁷ Nyamuzinda arhali Nyamuzinda w'emifu, ci w'abazine. Mulibwenene omu mahushe. ²⁸ Mugumu w'omu bandiyandisi, wayunvagya bali baja budada (kadali), amanya oku Yezu alishuzize bw'inja Abasandukayo, ayegera, n'okumudôsa: Irhegeko lihi likulu lyagabo? ²⁹ Yezu ashuza: Alaga elirhanzi: Yunva, Israeli, Nnâhamwirhu, Nnâmahanga, ali yene Nnahano; ³⁰ Onakazigira: Nyakasane, Nyamuzinda wawe, n'omurhima gwawe goshi, n'obugumana bwawe bwoshi, n'obukengere bwawe bwoshi, n'emisi yawe yoshi. ³¹ N'ery'akabiri: Ozigire omulungu wawe nk'okucizigira wenene. Ntalind'irhegeko lilushure ago. ³² Abandisi bamubwira: Kukwanine, Mwigiriza; wamaderha okunali oku Nyamuzinda aba muguma na nta wundi oli nkaye, ³³ N'okuzigira: Nyakasane, Nyamuzinda wawe, n'omurhima gwawe goshi, n'obugumana bwawe bwoshi, n'obukengere bwawe bwoshi, n'emisi yawe yoshi, n'okuzigir' omulungu wawe nk'okucizigira wenene, bilushire entulo n'eterekero. ³⁴ Yezu, abon'oku anashuzize n'oburhimanya, amubwire: Oli hofi n'obwami bwa Nyamuzinda. Na nta muntu wa ci mudosize. ³⁵ Yezu, agendeker'okuyigiriz'omu ka Nyamuzinda, aderha: Bulya gurhi Abandisi bakaderha oku Yezu aba mwene Daudi? ³⁶ Daudi yenene erhi ayunjuzibwe na Mûka mwimâna, adesire: mpu Nyamuzinda abwira Nnâhamwirhu: Odamale ekuboko kwani kulyo kuhika ngendese abashombanyi bawe bigulu ntebe. ³⁷ Daudi yene anakamuhamagala mpu Nnâhamwabo; kurhi aligi mwo mugala? Na lubaga lunji lwakagi muyunvirhiza okw'irala. ³⁸ Anacibabwira omu nyigirizo zage: Mucigage n'abandisi, basima okujagenda n'ebishuli biliri, n'okulonza balamusimbwe ahantu h'ebanga nyinji; ³⁹ bakalonza entebe za burhanzi omu bishagala, n'entebe za burhanzi omu madinye; ⁴⁰ balya bakayagulira enyumpa z'abakana, n'okucishushanya nka bwenene bashenga. Bayishidosibwa kulusha bwenene. ⁴¹ Yezu, erhi atamire hofi n'ecibo c'okurherekerera, akazi labiriza gurhi olubaga luli lwarherekera mw'enfaranga. Bahirhi banji bakaheba mwo binji. ⁴² Hanaciyisha mukana muguma, anaciheba mwo makuta gage gabiri, gahisire cihimbi cha kani c'olusimu. ⁴³ Oku handi Yezu, ahamagala entumwa zage, ababwira: mmubwizire okunali, oyu mukana mugalaganda anahanyire kulusha abandi boshi barherekire omu cogo; ⁴⁴ bulya byoshi bahebire okumuha ba gwerhe binji ciyehe anahebire ebianaligwerhe byoshi kokanali kalamo kage.