¹ Yesu arhenga aho, anaciyerekeza omu cihugo cage. Entumwa zage zamushimbulira. ² Erhi olusiku lwa kalinda luhika, arhondera ayigiriza omu mw'ishengero. Bantu banji bakamuyunvirhiza n'okusomerwa n'oku derha erhi: Ngahi y'ebyo byoshi bikamurhenga? Bumanyi buhi yehe ahabirwe, na gurhi ebyo bisomeza bikwajirikane oku maboko gage? ³ Karhali mulenga wakuyubaka, mugala wa Maria, mulumune wa Yakobo, na Yozo, na Yuda, na Simoni? na bali babo kabarhali haguma na nirhu? byahikira mulibo ahabagoma. ⁴ Cikwone Yesu aba bwira: Omulebi arhaba omu cihugo cage, omu babusi bage, n'omu mwage. ⁵ Arhajiraga cisomerine aho, ecirhali cirya c'oku lambulira-kwo abalwala ebigasha n'okubafumya. ⁶ Anacisomerwa ahanyanya ly'okurhayemera kwabo. Yesu anagendekera acigeza geza omol'olugo n'eburhambi, ajayigiriza. ⁷ Honaho anacihamagala lir'ikumi na zibirhi, anacirhondera abarhuma babirhi babirhi, n'okubaha obuhashe oku mpusi ngalugalu. ⁸ Abahanula oku barharhola ciru n'akantu kaguma omu lubalamo, akarhali karhi; ciru n'omu mugati, ciru n'isaki, ciru n'enfranga omu cisuku; ⁹ ciru n'ebirato by'emikarabandi, ciru murhayambalaga bushuli bibirhi. ¹⁰ Kandi anababwira erhi: N'enyumpa mwanadah'emwo, munamubere kuhika amango mwagende. ¹¹ Na, nka hakabaga abantu banka lahira barhamunyankirire n'oku muyunvirhiza, munaharhenge, munagukumule enshando z'ebirato binyu,ly'ebyo biyishi sigala buhamirizi bwabo. ¹² Bagenda, bayigiriza obucunguke. ¹³ abahinva bazimu banji, b'ashiga n'abalwala amavurha n'okubafumya. ¹⁴ Mwami Herodi ayunvirhe baderha ahanyanya za Yesu, bulya izino lyage lyali manyikine bwenene, anadera erhi: Yohana-Mubatiza afusire omu bafire, co cirhumire muli ebyo byakajira mw'ebisomeza. ¹⁵ Abandi bakaderha erhi: y'Eliya. N'abandi mpu: Naye ali mulebi omu bandi balebi. ¹⁶ Cikwone Herodi, erhya manya ebyo, aderha erhi: Olya Yowana nasiringulaga irhwe, ye wafusire. ¹⁷ Bulya Herodi yenene wayirhaga Yowana, ye wamuzingirikaga omu mpamikwa, ahanyanya lya Herodia, muka Filipo, mulumuna wage, bulya ali muyansire, ¹⁸ Na nk'oku Yowana akagi mubwira erhi: Birhakwanini okuyanka muka mulumuna wage. ¹⁹ Herodia, aganyagusa Yowana, alonza aku muniga. ²⁰ Cikwone arhahashaga; Bulya Herodi akagi yoboha Yowana, ali manyirire okwali mtu w'okuli na mucese; akagi mulanga, ciru, n'okumuyunva, akagiba mubidu w'okumuyunva n'okuyunvirhiza buzibu buzibu. ²¹ Hayishi-ba, olusiku lw'okufa lwahika, gomango Herodi, akagi shagalukira olusiku lw'okuburhwa, ajira idinye oku barhambo bage, oku bakulu b'abasirika n'abagula boshi b'e Galilaya. ²² Mwali wa Herodia anacija omu mbaraza; arhondera asama, asimisa Herodi ciru n'abantu boshi bali-mo. Mwami adosa nnamunyere erhi: Ompune byoshi walonza n'akuhabyo. ²³ Akuderha n'obwalagale erhi: Ngasi byoshi wampuna, nakuhabyo, ciru akaba luhande lw'obwami bwani. ²⁴ Erhi ahuluka, abwira nnina erhi: mpune bici? Na nnina amushuza erhi: Irhwe lya Yowana- Mubatiza. ²⁵ Honaho anagaluka duba duba embere za mwami, amuhuna erhi: Buno buno, mpunyire ompe irhwe lya Yowana-Mubatiza oku nsahani. ²⁶ Mwami honaho ababurhe; cikwone, ahanyanya ly'okuyalagaza acayalagazagya n'oku cisimisa, arhacilonza alahire. ²⁷ Bonobo anacirhuma omulanzi, n'irhegeko oku bamulerhere irhwe lya Yowana- Mubatiza. ²⁸ Omulanzi agenda atwa irhwe lya Yohana-Mubatiza wali omu mpamikwa, ayisha adwirhe irhwe lya Yohana-Mubatiza oku nsahane. Ali hereza olya munyere, n'oyo munyere ahereza nnina. ²⁹ Abakulikizi ba Yowana, erhi bamanya ebyo, bagenda bajirhola omubiri gwage, n'oku guheba omu nshinda. ³⁰ Entumwa, erhi zikumbirhe Yesu, akababwira ebyajijire na byoshi ayigirizize. ³¹ Yesu anacibabwira erhi: Muyishe rhuciyegule ahantu h'irungu, munarhamuke hitya. Bulya hali banji bakuyisha na banji bakugenda, barhagwerhi ciru n'akasanzi k'oku colya. ³² Banacigenda omu bwarho, lyo bahika ahantu h'irungu. ³³ Banji bwenene bamubona agenda banabamanya, mirhundu minji yalibirha n'amagulu lyo bamuja embere eyo munda ajaga. ³⁴ Erhi ahonoka omu bwarho, Yesu abona lubaga lunene, aba babalira, bulya bali nka bibuzi birhagwerhi mwengere; arhondera abayigiriza bintu binji. ³⁵ Cikwoki kushimbanana oku akasanzi kalikola kashegire, entumwa zage zana cimushegerera ho, n'okuderha erhi: Hano hantu l'iri irungu n'akasanzi kashegire; ³⁶ bahinvé bagende emwababwe n'omu nciga zahofofi, baji cigulira ebi balya. ³⁷ Yesu anabashuza erhi: Mubahe mwene ci balya. Cikwone bamubwira erhi: Karhugende rhujigula emigati oku nsimuni zibirhi, kanabo barhuha eci rhwalya? ³⁸ Anacibabwira erhi: Migati nga mugwerhe? Mujilola. Bamanyirira, banaderha erhi: Irhanu, na nsamaki zibirhi. ³⁹ Honaho, anacibarhegeka erhi mubadahaze birhumbi birhumi oku lubala. ⁴⁰ banadahala birhumbi birhumbi b'igana na makumi garhanu. ⁴¹ Anacirhola erya migati irhanu na zirya nsamaki zibirhi, n'oku laba n'amasu empingu, ayigisha. Enyuma, ajonajona erya migati, anayihereza entumwa, bayigabire olubaga. Honaho anacigaba zirya nsamaki oku boshi. ⁴² Boshi balya n'oku yigurha, ⁴³ banasiga ngega ikumi na zibirhi ziyunjwire birholo bya migati n'ebya sigalaga oku nsamaki. ⁴⁴ Abalyaga e migati balihisire bihumbi birhanu bya balume. ⁴⁵ Enyuma zaho, arhegeka entumwa zage bashonere omu bwarho bamushokolere ishiriza, baje e Betsaida, oku yenene aciri ahinva olubaga. ⁴⁶ Erhyaba amabahinva, engenda oku ntondo, ajihuna. ⁴⁷ Ebijingo byahika, obwarho bwalikola buli ekagarhi k'enyanja, na Yesu aciri yene oku budaka. ⁴⁸ Anacibona oku bacigwerhe ntambala nyinji bacilwisa; ecihusi ca bayishira oku barhali rhanyize. Erhi kuba hofi oku muceracera, anacibagendera, ajagera oku nyanja, alonza ciru n'oku barhaluka. ⁴⁹ Erhi banamubona ajagera oku nyanja, barhanya mpu cizungululu, barhondera bayakuza; ⁵⁰ bulya akagi babona boshi, na boshi bali bamarhemuka. Honaho Yesu anabahamagala, anababwira erhi: Mumanyirire, oku nie niono, murhayobohe! ⁵¹ Ashonera omu bwarho, n'eco cihusi cahwa. Boshi bagwarhwa n'empemu n'ecikango; ⁵² bulya barhamanyaga eci somerine c'emigati, bulya emirhima yabo yali mizibu. ⁵³ Enyuma z'okuyicira enyanja, banacibona omu cihugo c'e Genezareti, bahashimika. ⁵⁴ Erhi barhenga omu bwarho, abantu, nabo bamanya Yesu, ⁵⁵ bagera-gera enyunda zoshi, banayisha bajenjesire abalwala oku ncingo, ngasi hoshi bakagi manya ali. ⁵⁶ Ahantu haguma haguma akagi hika, omu ngo, omu mirhundu ciru nciga, bakagi heba abalwala ahantu hali bantu banji, banamuyinginge ahune oku bushumiro bw'emishangi yage. Na ngasi balya bakagi ihumako bakagi fuma.