¹ Banahika erind'ishiriza ly'enyanja, omu cihugo ca Bagerasi. ² Honaho, Yesu arhenga omu bwarho, abona omuntu emalanga gage, arhenga ebwa byusho, erhi alim'omuzimu mubi. ³ Oyo muntu alikola alama omu byusho, na ntaye wankacihasha oku mushweka, ciru n'emigozi. ⁴ Bulya kanji bakagi mushweka n'ebyuma omu magulu n'oku mushweka n'obudagule, cikoki anakatwa obwo budagule n'okuvunavuna ebyo byuma, na nta muntu waligi gwerhe emisi yanka muhasha. ⁵ Erhi akola abera burha husa, budufu n'omushi omu byusho n'omu mishozi, aja yama, anaja acitwa n'amabuye. ⁶ Erhi abona Yezu kuli, alibirha, afukama, emalanga gage, ⁷ Ana hamagala okwizu linene: bici ekarhi kani na nawe, Yesu, Mugala wa Nnamahanga Mukulu Bwenene? Nkugashire oku izino lya Nnamahanga, orha ndibuzize. ⁸ Bulya Yesu amamubwira: Rhenga omwoyu muntu, muzimu mubi! ⁹ Na, acimudosa: Izino lyawe wendi? Ligioni l'izino lyani, kwo amushuzize, bulya rhulibanji. ¹⁰ Anacimusengera bwenene mpu arhabahuluse muli eco cihugo. ¹¹ Aho hali, oku ntondo, buso bunene bwa ngulube bwagera. ¹² N'abazimu bamuhuna, baderha: Orhurhume omw'ezi ngulube, abe mwo rhuja. ¹³ Ana bayemerera. Nabo bazimu babi banarhenga, baja omu ngulube n'obuso bwalibirha oku mala bwahirimira omu nyanja: Lyali nka hofi bihumbi bibiri, zana yubira omu nyanja. ¹⁴ Abakagi ziyabula balibirha, balumiza emyanzi omu lugo n'omu mashwa abantu bagenda okujilola ebyabiîre. ¹⁵ Bahika hofi na Yezu, babona olya wali mw'abazimu, olya walimo balingioni, atamire, anayambirhe, akola agwerhe obu kengere bwinja, bagwarhwa n'oboba. ¹⁶ Ababwine byoshi byajirikanaga, babi ganirira ebyabire okwoyo walimw'abazimu n'ogwezo ngulube. ¹⁷ Lero baciheba omukuyinginga Yezu, mpu arhenge omu lugo lwabo. ¹⁸ Erhi ashonera omu bwarho, olya wali mw'abazimu amuhuna mpu amuyemerere abere bombi. ¹⁹ Yezu arhamuyemereraga, ci amubwira: ogende emwinyu, emwa bene winyu oba ganirire byoshi Nawirhu anakujirire, n'oku akuboneraga obwonjo. ²⁰ Anagenda, anarhangira aderha omu Dekapoli byoshi Yezu anajijire kuliye. Boshi basomerwa. ²¹ Yesu aja omu bwarho ayicirira erindi ishiriza ; eyo ehirhumbi hinene hyamuyegera. Ali oku burhambi bw'enyanja. ²² Mukulu muguma wa Sinagoge amuishira, oderhwa Yairo, oyu, erhi amubona achikweba aha magulu gage. ²³ Amu manyisa amu sengera bwenene: mwali wani murho alibufa, oyishe, omuhebe kwa amaboko, acire, analame. ²⁴ Yesu anagenda bonaye. na lubaga lwinji lwamu kulikira, lwaja lwa mufundeza. ²⁵ N'obwo, hali mukazi muguma ajaga adwa omuko lugero lwa miaka ikumi n'ibiri. ²⁶ Ali amo libuka bwenene omu maboko g'abafumu banji, ali amorhera byoshi aligwerhe, arhana bonaga murhula, ci endwala yajag'agendekera. ²⁷ Erhi ayunva balibaderha l'ogwa Yezu, anayisha omu lubaga enyuma, anahuma oku mushangi gwage. ²⁸ Bulya aderha: Nkanakahuma oku mushangi gwage kwone, erhi nnanfumire. ²⁹ Honaho oku geza omuko kwanahwa, anaciyunva omu mubiri gwage oku anafuma bulya buhanya bwage. ³⁰ Yesu anamanya honaho yene oku emisi yamo murhenga kwo; na, ahindamukira omukarhi k'olubaga, aderha: ndi wahumire oku mishangi yani? ³¹ Abaganda bage bamu bwira: k'obwine olubaga luku zungulusire, wamogali derha mpu: ndi ompumire kwo? ³² Asingiriza abamu zungulusire mpu abone ndi wajijire ntyo. ³³ Oyo mukazi, ayoboha anajuguma, erhi amomanya byoshi byamugezire kwo, ayisha acikweba aha magulu gage, anamubwira nkoku binali kwoshi. ³⁴ Ci kwone Yezu amubwira: Munyere wani, obwemere bwawe bwaku cizize; genda n'omurhula ofume n'endwala yawe. ³⁵ Oku aciri aderha, hana ciisha owarhenga emw'omukulu w'esinagogi omu bantu aderha: Omunyere wawe amofa; kurhi kwarhuma washilibuza mwalimu? ³⁶ Cikwone Yesu, buzira kushimba ebyo binwa, abwira omukulu w'Esinagogi: Orha yobohe, oyemere kwone. ³⁷ Arha yemeraga ndi mpu amuluse, orhali Petro, Yakobo na Yohana mulumuna wa Yakobo. ³⁸ Bana cihika omu nyumpa y'omukulu w'Esinagogi, aho Yezu abona olubaga luliburhe n'abandi bali balaka n'oku banda endulu. ³⁹ Adaha, anababwira: Bici birhumire mulimwajira olubi, na bici muli mwalakira? omwana arhafiri, ci ahunire. ⁴⁰ Bamushekera. Ntyo, abahulusa boshi, arhola ishe na nnina n'omwana, na ngasi bali mulusize, anaja aha omwan'ali. ⁴¹ Amugwarhira okukuboko, n'oku mubwira: Talitha kumi, kwo kuderha: we munyere, zuka, kwo nkubwizire. ⁴² Honaho omunyere azuka, anarhondera okulambagira; bulya alikola agwerhe miaka ikumi n'ibiri. Basomerwa bwenene. ⁴³ Yezu aba komereza bwenene, oku ntaye yeshi wamanyaga eby'ajirikine; n'okuderha okubahe oyo munyere ebiryo.