¹ Yezu anacirhondera kandi ayigiriza oku burhambi bw'enyanja. Lubaga lwinji lwali hofi naye, anacishonera n'okutamala omu bwarho bwali enyanya za mîshi. N'olubaga lwoshi batamala eburhambi bw'enyanja. ² Anacibayigiriza bintu binji omu migani, anaci babwira omu nyigirizo zage: ³ Mûyunve. murhwezi muguma agenda ajirhwera. ⁴ Omukurhwera, nguma za nacirhogera oku burhambi bw'enjira:orhunyunyi rhwayisha, rhwazirya. ⁵ Ezindi mburho nazo zarhogera omu mabuye, murhali budaka bwinji; zamêra, cikwone harhali budaka bwinji; ⁶ cikwone, erhi izuba libasha, zahya zanayuma bulya zirhacigwerhi mizi. ⁷ Ezindi zarhogera omu mishugi: emishugi ya kula ya kazirhula, zirha cileheka. ⁸ N'ezindi zarhogera omu budaka bw'inja: za kula zaleheka n'amalehe, nguma yajako makumi asharhu, makumi galindarhu, n'igana. ⁹ Anaciderha: ogwerhe amarhwiri gw'okuyunva ayunve. ¹⁰ Erhyali yene, abâli muzungûlusire haguma n'abalya ikumi na babiri banacimudosa omu migani. ¹¹ Anacibashuza: mwe mwahirwe okumanya amahwe gw'omu bwami bwa Nnâmahanga; cikwone abâli embuga byoshi binaka bagera oku migani, ¹² n'omukubona bâkabona barhanabwini bwinja, n'okuyunva bakayunva barhanayunvirhi bwinja mpu lyo barhagihindamuka n'okubabalirwa ebyaha byabo. ¹³ Anacibabwira kandi: kamu rhayunvirhi ogu magani? kurhigi muyunvirhage eyi migani? ¹⁴ Omrhwezi arhwera omwanzi. ¹⁵ Baguma bali oku burhambi bw'enjira, ah'omwanzi gwarhwezirwe; erhi bayiyunva, lyo shetani ayisha n'oku gukula omulibo. ¹⁶ N'abandi, ntyo, banarhwere emburho omu mabûye; erhi bakayunva omwanzi; bakaguyankirira burhanzi n'obushagaluke; ¹⁷ Cikwone barhalekaga mpu kagwarhe emizi muli bo, banaka seze hisanzi hisungunu amango gw'omwanzi gwarhuma amalibuko kandi erhi kushimbululwa banaleke obuyemere bayemeraga ¹⁸ Abandi barhwera emburho omu mishugi, balibalya bakaginyunva omwanzi, ¹⁹ n'okurhabala kw'en'igulu, n'okurhebana kw'ebirugu, n'irala l'ebintu likahanja, ebyo binafundeze omwanzi guyorhe burhanzi gurhaciburhe. ²⁰ Abandi Bantu banayankirire emburho omu budaka bwinja; bali balya baguyunvirhe omwanzi, baguyankirira, gulehek'amalehe; makumi asharhu, makumi galindarhu, n'igana oku nguma. ²¹ Anacibabwira kandi: Kahali owankalonza itara mpu aliyubikire kw'enyungu, erhi alihire idako ly'encingo? karhali kuliheba ahaly'aboneza? ²² Bulya ntabyo byankaba bifulisirwe birhankabonekana, nt'ihwe lyakaba lifulishirwe lirhankamanyikana. ²³ Ogwerhe amarhwiri gw'okuyunva, ayunve. ²⁴ Anacibabwira kandi: Mulalire omubyo mukayunva. Olugero mwagezire lwo mwanagererwa na banaluyushule kuli mwe. ²⁵ Bulya bayishikaha ogwerhe, cikwone orhagwerhi ayishînyagwa ciru n'ehitya agwerhe. ²⁶ Aciri derha Kandi: Obwami bwa Nnâmahanga bushushanyibwe n'omuntu w'akwebaga emburho omu budaka bwinja; ²⁷ Agweshere erhi alimasu, budufu erhi mûshi, emburho zinamêre Kandi zinakule buzirw'okumanya. ²⁸ Obudaka bunakarhenga mwobone, burhanzi olubala, na ntyo omuhuli, buzinda, buzinda engabo eyezire oku muhuli. ²⁹ N'erhi mburho zamayera, omuntu anarhondera okuhumbula, bulya amango g'okuhumbula gamahika. ³⁰ Aderha: Bicirhwakashushanya n'obwami bwa Nnâmahanga, erhi oku mugani gûhi rhwankamushushanya nâgo? ³¹ Bunakashushana n'emmogomogo y'omurhi gw'eharadali, erhi, bayirhwera omu budaka, yo sunguni bwenene kulusha ezindi mburho zoshi; ³² Cikwoki, erhi emera, yanakula kulusha ezindi mburho zoshi, yanagwarha amarhabi manenene, ciru n'orhunyunyi rhunayishi karhwa oku marhabi gagwo. ³³ Omu migani minji ya mweneyo akagibamanyisa emyanzi, kushimbana n'okubakaziri iyunva. ³⁴ Arhakagi baganirira buzira migani; Cikwoki, erhi bankabire bakola balibone anayihugulire abaganda bage. ³⁵ Lonolo lusiku, omwebyo bijingo, Yesu ababwira, rhuyikirize elind'ishiriza. ³⁶ Erhi balika olubaga, Anacibabwira omu bwarho emunda bâli; hali agandi marho gamu shimbulira. ³⁷ Hanacizuka akalaba kanene, n'amishi gakacikweba omu bwarho, bwakalinziyunjula mîshi. ³⁸ Nayehe, erhyagweshire omu ndalala oku mushegemo banachimuzusa, Banamubwira: Mwigiriza kwo kufa kwirhu kurhakubwiziri gurhi? ³⁹ Erhi azuka, akalihira empusi, anabwir'enyanja: hulika! yanahulika! n'empusi ya hulika,haba omurhula mwinji. ⁴⁰ Anacibabwira: cirhumire muyobohire ntyo? kanta bwemere mugwerhe? ⁴¹ Boshi basomerwa bwenene, bakabwirana bone na nene, yendi oyu wani, ciyehe empusi n'enyanja bili bya munyunva?