¹ Yezu adaha buhyahya omu Sinagoge. Mwaligi mulume muguma waligwerhe okuboko kuyumire. ² Balolereza Yezu, mpu balole erhi amubuka olw'esabato: kwali kulonza bamusongere. ³ Na Yezu abwira oyu muntu wali yumire okuboko: yimuka, aho kagarhi. ⁴ Ababwira: kakuyemerirwe, olusiku lwa sabato okujira aminja erhi okujira amabi, okuchiza omuntu erhi oku muyirha? cikwone bahulika. ⁵ Ntyo abageza mw'amasu g'obukunizi, erhi alina burhe enyanya ly'emirhima yabo mizibu, abwira oyo muntu: lambula okuboko kwawe. Akulambula, n'okwo kuboko kwage kwanafuma. ⁶ Abafarisayo bahuluka, ho naho barhimanana n'abaherodi omu kulonza enjira z'okumuniga. ⁷ Yezu agenda e bwa nyanja haguma n'abigirizibwa bage. olubaga lunene lwamu kulikira kurhenga e galilaya; n'ebuyahudi, n'eyerusalemu, na b'e Idumeya, n'ab'ishiriza ly'Eyorodani, na omu nchiga z'e Tiro n'eze Sidoni, lubaga lunene, lwayunva byoshi akagijira, bamwishira. ⁹ Abwira abigirizibwa bage oku bashegeze obwarho, busungunu hofi naye, ly'olubaga luleki mufundeza. ¹⁰ Bulya, nkoku aligwerhe afumya abantu banji, ngasi boshi bali gwerhwe n'endwala baciyoha kuli ye mpu bamuhume kwo. ¹¹ Abazimu babi, erhi bamubona, baka hirima emalanga gage, bana kayama: Oli mwene Mungu (Nnamahanga). ¹² Ci abakomereza bwenene mpu barhamumanyisagya. ¹³ Buzinda ayinamukira oku ntondo; ahamagala abali lonzinze, banayisha emunda ali. ¹⁴ Alondola mwo ikumi na babiri, mpu bakaba haguma naye, n'oku barhuma okuj'ayigiriza. ¹⁵ N'obuhashe bwoku kaga abazimu, ¹⁶ Aba ikumi na babiri alondwire: Simoni, yadesire Petro; ¹⁷ Yakobo, mwene Zebedayo, na Yohana, mulumuna wa Yakobo, balya ashembaga izino lya Boamerge, kwo kuderha mpu bana ba mukungulo; ¹⁸ Andrea; Bartolomayo; Mateo; Tomaso; Yakobo; mwene Alfayo; Tadeyo; Simoni w'e Kanana. ¹⁹ Na Yuda Escariote, olya wahanaga Yezu. Bashubir'omu nyumpa. ²⁰ N'olubaga lwachiri rhimanana, kuhika babula ciru akasanzi balya ebiryo byabo. ²¹ Ababusi ba Yesu, erhi bayunva ecagezire, bayisha mpu bamugwarhe; bulya baderha: mpu ali musire. ²² Nabakarani, balya balihonosire kurhenga E Yerusalemu, baderha: ali mwo Beelizebuli; oku mukulu w'abazimu kw'ali ahinva abazimu. ²³ Yezu abahamagala, anababwira oku migani: Gurhi Lyangombe ankahinva mwo Lyangombe? ²⁴ Nk'obwami bwaka gabanuka kuli bwone, obwo bwami burhanka yimanga; ²⁵ N'enyumpa nka yanka berulukanwa kuli yone, eyo nyumpa erhanka lama. ²⁶ Nka Lyangombe anka cilwisa, agabanusire, arhanka ciyimanga, ci erhi akola agwerhe obuzinda. ²⁷ Ntaye wankaja omu nyumpa y'omuntu w'emisi n'oku hagula ebirugu byage, arhana rhanziri mushweka; Lyo ahagula eyo nyumpa. ²⁸ Okuli mmubwizire , ebyaha byoshi byayishi babalirwa oku bene muntu, n'ebijaci byoshi byaba rhenzire omu kanwa; ²⁹ Ci ngasi yeshi wajacire Mûka Mutakatifu arhaka babalirwa: ci agwerhe okutwirwa olubanja lw'ecaha ensiku n'amango. ³⁰ Yezu adesire ntyo bulya bakagi derha: ali mw'omuzimu mubi. ³¹ Kwaciyisha nnina na balumuna bage, babera êmbuga, bamurhumiza. ³² Olubaga lwalidahire eburhambi bwage, ba mubwira: alaga, nyoko na balumuna bawe bali ahambuga baku lonzize. ³³ Anashuza: ndi nyâma, na balumuna bani bo bahi? ³⁴ Lero, alola kuli abo bali dahire hofi naye: aderha, alagi nyâma na balumuna bani. ³⁵ Bulya, ngasi yeshi ojira amalonza ga Nnamahanga, oyo ye mulumuna wani, mwali wirhu, na nyâma.