¹ Ayingira e Kapernaumu kandi, enyuma lya nsiku nyinji, bya yunvikana oku ali omu nyumpa. ² Barhinganana bantu banji, arhasigalaga ciru nafasi oku mulango, aka shambala nabo omwanzi gwage. ³ Abantu baisha bamudwirhire omuntu ohozire, ali aberhwire na bantu bani. ⁴ N'erhi b'aba barha hashiri oku muyegerera enyanya ly'olubaga lwinji, barhula idari aha Yesu ali, nerhi bama hongola ho bahonolera ho enchingo bali mugwishize kw'oyo mulwala. ⁵ Naye Yesu, erhi abona obwemere bwabo, abwira oyo wali hozire erhi: Mwana wani, ocesibwe ebyaha byawe. ⁶ Na bandisi banji bali eyo, balitamire, bakarhanya omu mirhima yabo. ⁷ Mpu: Ci oyu adesire ntyo? Ama jacira Mungu. Indi waka babalira ebyaha nk'arhali muguma, ye Mungu? ⁸ Lero Yesu amanya omu murhima gwage oku barhanyize omu ndalala zabo, ababwira, mpu ci mwama rhanya ntyo omu mirhima yinyu? ⁹ Ebilembu bili bihi, okubwira ohozire, wama babalirwa ebyaha byawe erhi kuderha, yumuka oberhule enchingo yawe ogende? ¹⁰ Cikwoki mumanye oku omwana wa Adamu agwerhe obuhashe omw'igulu bw'oku babalira ebyaha, (akagi bwira oyo wali hozire), ¹¹ Nkubwizire, Yimuka, olengeze encingo yawe ogende emwawe. ¹² Honaho anayimuka, alengeza encingo yage, arhenga emalanga gabo boshi; kuhika abantu boshi basomerwa, bakuza Nnamahanga, baderha, okuli nk'oku rhurha singi kubona bundi. ¹³ Aciri rhenga, aja ishiriza ly'enyanja, olubaga lw'oshi lwamugendera, aluyigiriza. ¹⁴ Nerhi akola agera, abona Lawi wa Alfayo, atamire eforozani, amubwira, onshimbe, naye ayimuka amushimba. ¹⁵ Nerhi aba akola ali alya ebilyo omu mwage, abalyuz'ikodi banji na banyabyaha balitamire haguma na Yesu na abanafunzi bage; bulya bali banji bamu shimbulire. ¹⁶ N'abandisi n'abafarisayo erhi bamubona ali alya n'abalyuz'ikodi na banya byaha, babwira abanafunzi bage erhi: Ci agwerhe alya na balyuza ikodi na banyabyaha? ¹⁷ Yesu erhi ayunva ababwira, erhi abagwerhe obuzine barhalonza kubukwa, ci abarha cihashiri; ntali bahamagala nka abashinganine, ci ba nyabyaha. ¹⁸ N'abanafunzi bage Yoane n'Abafarisayo bali omu mafungo; lero bayisha, bamubwira, Bulya gurhi abanafunzi ba Yoane n'aba bafarisayo bakafunga, ci abanafunzi bawe barhafunga? ¹⁹ Yesu ababwira erhi: Abalalisirwe omu karamu kurhi bakafunga n'omuhya mulume ali haguma nabo? Ngasi nsaa bali n'omuhya mulume haguma barhanka hasha bafunga. ²⁰ Ci ensiku ziyishire hano baleka omuhya mulume, lyo bayishi funga olo lusiku. ²¹ Ntaye muntu ohanga eciraga c'omushangi muhyahya oku mushangi mukulukulu; nanka bakacihanga, cina shereze ogwo mushangi mukulukulu, na ahali beresire hanagendekere habereka bwenene. ²² Bulya nta muntu oheba edivai myahya omu ndaha nkulu nkulu, n'akaheba, eyo divai mpyahya ena bere ezo ndaha, edivai ena bulajike, ezo ndaha zina haribike. Ci bana hebe edivai mpyahya omu ndaha mpyahya. ²³ Erhi aba ali agera omu mashwa olusiku lw'esabato, abanafunzi bage bagendekera omu njira baja bavuna ebihumbulwa. ²⁴ Abafarisayo bamubwira, Ala, ci bamajira ebirha shinganini olusiku lw'e sabato? ²⁵ Ababwira, Kantaho mwasomire oku akagi jira Daudi, nka acifinjire, na nk'ashalisire, ye n'ababo? ²⁶ Oku akagija omu nyumpa ya Nnamahanga, amango ga kuhani mukulu Abiatari, alya emigati y'Obuyerekere, erya erhashinganini okulibwa nkaba babe badahwa bone, aha n'ababo? ²⁷ Yesu, ababwira, esabato yajijirwe enyanya lya bene bantu, ci arhali mwene muntu enyanya ly'esabato. ²⁸ Lero Mwana wa Adamu ye mukulu w'e sabato.