¹ Murhondero gw'emyanzi ya kalembe ya Yezu kristu, Mugala wa Nnamahanga. ² Nka oku biyandisirwe muli Isaya, mulebi: Lolaga, ntumire embere zawe omurhumisi wani, warheganya enjira yawe; ³ L'ir'izu ly'owaja hamagala kurhenga omw'irungu: Murheganye omuhanda gwa Nnahamwirhu, mukubule n'enjira zage. ⁴ Yohane aboneka, abatiza omw'irungu, anayigiriza obubatizo bw'obwiyunjuze, namababale g'ebyaha. ⁵ Abayahudi boshi, n'abantu b'Eyerusalemu boshi bagenda emundali, n'oku hungama ebyaha byabo, n'okubatizibwa naye omu lwishi lwe yordani. ⁶ Yohana agwerhe omushangi gw'oboya bw'engamiya, n'omukaba gw'oluhu ecibunu cage. Akagi lya eminunu n'obuci bw'emuzirhu. ⁷ Akagi yigiriza, n'okuderha: Ayishire enyuma zani ogwerhe obuhashe kundusha, Ntashinganini oku shwekûla emigozi y'ebirato byage. ⁸ Nie, namubatiza oku mishi, Yé, ayishi mubatiza oku mûka mwimana. ⁹ Ago mango Yezu arhenga e Nanzareti ye Galilaya, abatizibwa na Yohana omu yordani. ¹⁰ Omu kurhenga kwage omu mishi, amalunga gayiguka, Mûka amuhonokera nka mugani gwa mgûku. ¹¹ Izu lya rheng'enyanya: we Mwana wani muzigirwa, muliwe w'ompire obuzigire bwani. ¹² Ho naho Mûka ayegera Yezu omwirungu. ¹³ Amala nsiku makumi gani, na shetani amurhangula, ali eyo n'ensimba z'emuzirhu na ba malaika bamukolera. ¹⁴ Enyuma z'ebyo Yohana ahânwa, Yezu agenda e Galilaya, ayigiriza emyanzi y'akalembe ya Nnamahanga. ¹⁵ Akazigi derha: Amango gahisire, n'obwami bwa Nnamahanga buyegire. Muciyunjuze muna yemere omwanzi mwinja. ¹⁶ Erhi aba ajalambagira eburhambi ly'enyanja y'e Galilaya, abona Simoni na Andrea mulumuna, erhi bali bakweba akeshe omunyanja bulya bali badubi. ¹⁷ Yezu ababwira: Munshimbulire nani na mujira badubi ba bantu, ¹⁸ Ho naho, basiga orhweshe rhwabo bamushimbulira. ¹⁹ Erhi bahika hali, babona Yakobo, mwene Zebedayo na Yohana mulumuna wage, nabo erhi bali omu bwarho erhi bali balungula orhweshe rhwabo. ²⁰ Honaho abahamagala; basiga ishe Zebedayo omu bwarho n'abakazi babo, ba mushimbulira. ²¹ Bayerekera e Kapernaumu, n'olusiku lw'esabato, Yezu adaha omu cishagala, anayigiriza mwo. ²² Enyigirizo zage zabayoca, Bulya akagi yigiriza n'oburhwali, arhali nk'abandisi. ²³ Omweco cishagala mwali omuntu walimw'omuzimu mubi, a yakuza: ²⁴ Bici na nani, Yezu w'e Nanzareti? Ka waishire okurhuheza. Mmanyire wendi: Mucesibwa wa Nnamahanga. ²⁵ Yezu amukalihira, aderha: Hulika, orhenge omw'oyo muntu. ²⁶ N'oyo muzimu mubi arhenga omw'oyo muntu, omu mujugumo bwenene omukuband'endulu. ²⁷ Abantu bali omwo chishagala basomerwa, kuhika bakadosanya mpu byo bici ebi, nyigirizo mpyahya? Ciru aliakalihira abazimu oku burhwali, bana mukenge. ²⁸ N'oburhwali bwage bwa manyikana duba omw'ezonciga zali zungulusir'egalilaya. ²⁹ Erhi bahuluka omu cishagala, bagenda haguma na Yakobo na Yohane omu nyumpa ya Simoni na Andrea. ³⁰ Nazala wa Simoni aligweshire, bulya ali shushîrwe, honaho babimanyisa Yezu. ³¹ Aha yegera, amugwarhira oku kuboko amuzusa, honaho ishushira lyana hirigirha, abajirira ebyo. ³² Bijingo, erhi izuba lizika, bamulerhera abalwala n'abasirhe. ³³ N'olubaga lwoshi lwayunjula aha mwage. ³⁴ Afumya bantu banji bali lwazir'endwala za ngasi lubero, ahinva n'abzimu banji, arhana kagi yemera abazimu baderhe, Bulya ali bamanyire. ³⁵ Erhi buca, alamukira hibungubungu agenda omw'irungu aji salira. ³⁶ Simoni na balya bali boshi barhondera okumulonza. ³⁷ N'erhibaba bama mubona, bamu bwira: Abantu boshi bajakulonza. ³⁸ Abashuza erhi, rhugende handi, omunciga ziri eburhambi, lyo nji yigiriza, bulya cocirhumire nayishire. ³⁹ Anayigiriza omu bishagala, omu Galilaya mwoshi, ahinva abazimu boshi. ⁴⁰ Omubenzi muguma amuyishira, acikweba oku magulu gage, amubwira n'okuyingiga: nka wakalonza wanancesa. ⁴¹ Yezu ayunva obwonjo, alambula okuboko, amuhuma kwo, aderha: nkulongize, oce. ⁴² Honaho ebibenzi bya murhenga anafuma. ⁴³ Yezu amugalula honaho, ana murhegeka. ⁴⁴ Amubwira: omanye orhabwire omuntu yeshi, ci ogende emw'abadahwa, ona hane ebi Musa amurhegesire enyanya z'okucesibwa kwawe, lyo ebyo buba buhamirize. ⁴⁵ Ci kwone oyo muntu, erhi agenda, aja ayalagaza ntyo, kuhika Yezu arhacikazigija omulugo n'obwalagale. Akabera eburhambi, ahantu h'irungu, bakayishi mulonza hoshi hoshi.