¹ Erhi bunaca ntya, abagula bakulu b'abadahwa b'olubaga baja ihano n'abigiriza; erhi baba bamashweka Yesu, Bamuheka e mwa Pilato, bamuhaye. ² Pilato amudosa erhi: Ka we mwami w'Abayahudi; Yesu amushuza: Wakudesire . ³ Abajiji b'abadahwa bamushobeka binji. ⁴ Pilato ashubi mudosa, erhi: Ka nta kanwa washuza? K'obwine ebi bakushobesire. ⁵ Ci Yesu arhashuzagya ecinwa, kuhika Pilato asomerwa. ⁶ Ngasi lusiku lukulu, akagi balikira mushwekwa muguma, oyu bacishozire. ⁷ Obwo erhi hali mushwekwa muguma, ye wali Baraba alishwesirwe haguma n'abadi babona bali nizire omuntu. ⁸ Erhi olubaga luyinamuka, lwarhondera lwahuna okujirirwa nka kulya luyorha lujirirwa. ⁹ Pilato abashuza, erhi: Mwalonza mmulikire omwami w'Abayahudi? ¹⁰ Erhi amanyire obwo oku bwagalwa bw'abajinji b'abadahwa bamuhaniraga. ¹¹ Ci abajinji b'abadahwa bashumika olubaga mpu bahune alike Baraba erhi ye. ¹² Pilato ashubi babwira, erhi: Gurhi najira omwami w'Abayahudi? ¹³ Ci bohe bayakuza erhi: Ayirhwe! ¹⁴ Pilato abadosa erhi: Bubi buci ajizire? Nabo bashubi yakuza, kulusha, erhi: Ayirhwe . ¹⁵ Okubundi Pilato alonza okusimisa olubaga, abalikira Baraba n'erhi aba amashurha Yesu e mikoba, abaha ye mpu abambwe oku musalaba. ¹⁶ Abasirika banacimuheka omu cogo, bamujana omurhamba, bamuhira kw'olugamba lw'abasirika boshi. ¹⁷ Bamuyambika e cishuli cidukula, n'erhi baba bamaluka ecimane c'emishugi, bamuhira co omw'irhwe. ¹⁸ Barhondera bamulamusa, mpu: Asinge, Mwami w'Abayahudi! ¹⁹ Bamushurh'irhwe n'olushekesheke, Bamukayira kwo, banamufukamira, baharamya. ²⁰ Lero erhi bayusi cinaguza bamuhogola cirwa cishuli cidukula, bamuyambika e myambalo yage, bamuhulukana mpu bajimubamba oku musalaba. ²¹ Bagwarha muntu muguma wafulukaga, Simoni w'e Kirena, ishe w'Aleksandro na Rufu, mpu amurhwaze oku barhula omusalaba. ²² Bamuheka ahantu hadehwa Goligota, kw'okuderha mpu hantu h'e mpanga. ²³ Anacimuha idivayi lirimwo endulwe mpu anywe, ci arhalinywaga kwo. ²⁴ Bamubamba oku musalaba, bagaba e myambalo yage, bayiyesha cigole mpu bamanye cici ngasi muntu aheka. ²⁵ Zali nsa isharhu erhi bamubamba. ²⁶ Igwarhiro ly'olufu lwage lya yandikwa ntya: Mwami w'Abayahudi . ²⁷ Banacibamba haguma naye bishumusi bibirhi, muguma e lulyo owundi e lumosho lwage. ²⁸ Amandi ga hikirira, ga derha mpu: Aganjirwe omu babi. ²⁹ Abakigi gera baka mu jacira bana dunda irhwe, mpu: We shaba aka- Nyamuzinda, onashubi kayunjuza omu nsiku isharhu, ³⁰ cilikuzagye we nene, ohonoke k'ogo musalaba! ³¹ Nabo abajinji b'abadahwa n'abagula b'ihano bakagi mushekera n'oku derha, mpu: Acizize abandi arhankanahashi ciciza yene! ³² Kristu Mwami w'Israeli honokaga oku ogo musalaba, nirhu rhubone, rhuna muyemere. Ciru n'abalya bali bambirwe oku musalaba haguma naye bakagi mujacira. ³³ Erhi izuba liyimanga, omwizizi gwabwika ecihugo cohi kuhika amafuluko. ³⁴ Erhi kuba bijingo Yesu anaci yama n'izu linene, erhi: Eloyi, Eloyi, lama Sabaktani? Kw'okuderha Nyamuzinda wani, Nyamuzinda wani, ca rhumire ondeka? ³⁵ Baguma muli balya bahali, erhi bayunva,banaciderha mpu: Amaya y'akuza Eliya ! ³⁶ Muguma alibirha, avunvuliza ecihirholo omu nkalishi, acishwekera oku lushekesheke, amuha anywe, erhi: Muleke rhulole erhi Eliya ayishi muhonola! ³⁷ Yesu anaci yama n'izu linene, arhenga mw'omuka. ³⁸ Okubundi omwenda gwali mumanike akarhi ka ka-Nyamuzinda gwalalanguka mpande zibirhi kurhenga e nyanya kuhika e dako. ³⁹ Omukulu w'abasirika waliyimanzire amuyerekire, erhi abona gurhi ahola, aderha, erhi: Neci, kobinali, oyu muntu anali Mugala wa Nyamuzinda! ⁴⁰ Bali n'abanyazi bakagi languza. Muli bo mwali Maria Magdalena, Maria nnina wa Yakobo murho na Yusufu, na Salome. ⁴¹ Bobakagi mukulikira n'oku mukolera amango Ali e Galilaya. N'abandi banji bali yinamukire haguma naye e Yeruzasamu. ⁴² Bulya byalikola bijingo, na bulya lwali lusiku lwa marhenganyo, lwo lusiku lwa malaliro lwa sabato, ⁴³ Yusufu w'e Armatiya, mushamuka mukengwa w'ihano, akagi linga naye obwami bwa Nyamuzinda, aja e mwa Pilato n'oburhwali, amuhuna omubiri gwa Yesu. ⁴⁴ Pilato asomerwa okw'anafire duba ntyo. Anacihamagala olya mukulu w'abasirika, amudosa erhi anafire. ⁴⁵ Erhi oyo mukulu w'abasirika amumanyisa, anaci ha Yusufu omubiri gwa Yesu. ⁴⁶ Okubundi Yusufu anaci gula omw'enda mweru, arhenza Yesu oku musalaba, amuboha mwo, amubisha omu nshinda yali mpumbe omu lwala; anaci yimanza ibuye linene oku luso lw'enshina. ⁴⁷ Obwo erhi Maria Magdalena na Maria nnina wa Yusufu badwirhe balolereza aha bamuhira.