¹ Erhi oly'akalinda erhi lugera, Mariamu we Mangadalene, Mariamu, nnina wa Yakobo, na Salome, banacigula arashi, mpu baji shiga Yezu. ² Olusiku lurhanzi ly'omugobe, banacija e bwa nshinda, hibungu-bungu, nk'okw'izuba lirhali cibasha. ³ Baderhezana bone na bone, indi warhubulundira ibuye oku luso lwa kaburi? ⁴ N'erhi balola bashimana oku elyo ibuye lya bulundwirwe; lyanali linene bwenene. ⁵ Bahika ebwa makaburi babona omusole atamire olunda lw'o kulyo, ayambirhe omushangi mweru; basomerwa. ⁶ Naye ababwira, Murha somerwe; muli mwalonza Yesu mnanzareti, olwa wanigagwa; anafusire; arhali hano; mulole ahantu bali muhebire. ⁷ Cikwone muci genderage, mubwire abanafunzi bage, na Petero, oku abashokolire okuja e Galilaya; eyo munda mwamubona, nk'oku ababwizire. ⁸ Bahuluka omu nshinda n'oku libirha. Ecoba n'oboba bya bagwarha; barhabwira ciru n'omuntu, aha nyanya z'ecoba. ⁹ Naye erhi afuka cisezi olusiku lurhanzi lw'iposo, abonekera kwanza Mariamu Magdalena, olya akulaga mwo abazimu nda. ¹⁰ Oyo arhola enjira ajibwira balya bali boshi emyanzi, nabo bali baliba cirhuliriza n'okuyama. ¹¹ Ci erhi nabo bayunva oku azine, anana mubwine, barha yemeraga. ¹² Enyuma lyaho arhengera bantu babiri omu kagarhi babo, aligwerhe nshusho yindi yindi; bali omu njira okuja ebwisha. ¹³ Nabo bacigenderaga bajibwira ababo emyanzi; nabo barha yemeraga. ¹⁴ Buzinda abonekera balya bandi ikumi na muguma erhi balibalya, aba shoholera enyanya ly'okurha yemera kwabo n'obuzibu bw'e mirhima yabo, bulya barhayemeraga balya bamubwine erhi afuka omu bafire. ¹⁵ Ababwira, Mugende omw'igulu ly'oshi, muyalagaze emyanzi ya lulema oku ngasi ciremwa. ¹⁶ Owayemera n'okubatizibwa acunguka; orha yemiri, ahanwa. ¹⁷ N'ebisomerine byashimbulira abayemire; okw'izino lyani bakula abazimu; baderha n'oku luderho luhyahya. ¹⁸ Bagwarha enjoka; ciru bankanywa akantu kanka bayirha, karha bajire gurhi; baheba amaboko gabo oku balwala nabo banafume. ¹⁹ Lero larha Yesu, erhi amala okuderha nabo, arheremera empingu, atamala ekulyo kwa Mungu. ²⁰ Nabo barhenga, baja yigiriza emyanzi y'akalembe hoshi hoshi, Nnamahanga akakola omukolo haguma nabo, n'oku kuhikiriza ogulya mwanzi oku bisomerine byajaga bya gushimbulira.