¹ Idinye lya basaka n'ely'emigati erhali mwo lwango lya liyegerire okuba erhi hasigire nsiku zi birhi. abarhegesi n'akulu n'abandisi, balonza ombulyo bwokugwarha yezu omubulyalya n'okumuyirha. ² Bulya, balidesire mpu garhabe amago g'idinye bileke okulerha ehidugundu omu olubaga. ³ Nk'oku Yezu ali Ebetania omu mwa Simoni mushomyo, mukazi muguma ayisha, erhi aciri alya. Erhyafumbirhe ecikombe c'amavurha, mavurha gangulo ndarhi; anacifunula ecikombe, n'okugarhulira okw'irhwe lya Yezu. ⁴ Baguma mulibo bayerekana oburhe bwabo: Bulya gurhi okuheza amavurha manga na? ⁵ Banka na gaguzize nfaranga zirhalusire magan'asharhu, zinarhabale abakenyi. Banacilungulwa bwenene enyanya z'oyo mukazi. ⁶ Cikwone Yezu aderha: Mumuleke. Bulya gurhi mwa mulibuza? Ajijire ecijiro cinja emunda ndi; ⁷ bulya abakenyi mweshi nabo muba, mwanabajirira amindja amango mulonzize, ci nyehe murha ngwerhi amango goshi. ⁸ Anajijire okw'anahashire; ciru ashokwire okushiga omubiri gwani kurheganya olufu. ⁹ Okunali mmubwizire ngasi hoshi omwanzi gwani gwayigirizibwa omw'igulu bayishi derha oku nkengero z'oyo mukazi okweco cijiro ajijire. ¹⁰ Yuda Iskariti, muguma w'omw'ikumi na babiri, agenda emw'abagula bakulu, mpu abahe Yezu. ¹¹ Enyuma ly'okumuyunvirhiza, bashagaluka, banamulaganya enfaranga. Yuda alongereza obulyo bw'okumuhana. ¹² Olusiku lurhanzi lw'emigati erhali mw'olwango, lyo bakagi kengera basaka, abagirizibwa bamudosa: mpu ngahi olonzize rhujikurhaganyiza Basaka? ¹³ Anacirhuma babiri b'omu bigirizibwa, mpu: Muje omu murhundu; mwarhimana omulume aberhwire akabindi kamishi, mumushimbe. ¹⁴ Ahakaja, mubwire n'eyo nyumpa oku: Omwigiriza adesire: mpu ngahi nalira basaka rhweshi n'abigirizibwa bani? ¹⁵ Naye abayereka ecihando cinene c'enyanya, ciri mw'ebitumbi n'ameza na ngasi kantu kali karhegany'omwo: aho homwarhurheganyiza basaka. ¹⁶ Abigirizibwa banagenda, banahika omu murhundu, banabona byoshi nkoku analibabwizire; banarheganya basaka. ¹⁷ Erhi ebijingo biba, anayisha haguma na balya ikumi na babiri. ¹⁸ Amango bali tamire bali balya, Yezu ababwira erhi: Okuli mmubwizire, muguma muli mwe oliwalya haguma nanye, ampana. ¹⁹ Barhangira okuba burhê, n'okumudôsa, muguma okuwundi: Kanye? ²⁰ Abashuza: muguma w'omw'ikumi na babiri olya okuboko kwage kuli kwarhimanana n'okwani omucibo. ²¹ Mwene omuntu acigendera nk'oku byanali yandisirwe kuli ye. Ci obuhanya bw'owamuhana! Lyankabire iragi kuliye nkarhankabusirwe. ²² Erhi bababa badwirhe balya, Yezu ayanka omugati; n'enyuma ly'okuvuga omunkwa, agubega, abaha, aderha: Rholi, ogu guli mubiri gwani. ²³ Kwon'okwo ayanka akabehe; avuga omunkwa, abaha, banywa kwo boshi. ²⁴ Ababwira mpu: ogu guli muko gwani na gwa ciragane, gwa bulagwa enyanya ly'abali banji. ²⁵ Mmubwizire okunali, ntakacinywa ciru ecinyebwa c'omuzabibu, kuhika amango nayishiganywa buhyahya omu bwami bwa Nyamuzinda. ²⁶ Enyuma ly'okuyimba enyimbo, bayinamukira oku ntondo y'emizetuni. ²⁷ Yezu ababwira: Mweshi mwasarhazibwa; bulya biyandisirwe: Nashurha omwengere, n'ebibuzi bya shandala. ²⁸ Cikwone, enyuma ly'obufuke bwani, namushokolera e Galilaya. ²⁹ Petro amubwira: Ciru abandi boshi bakasarhazibwa, ntaka sarhazibwa. ³⁰ Na Yezu amubwira: Nkubwizire okunali, wehe, enene, obudufu bwene, embere oluhazi lubike kabiri, erhi wamandahira kasharhu. ³¹ Cikwone Petro ashubi hikiriza okukuderha: Ciru bya nkampuna okufa haguma nanawe, nta kakulahira. Na boshi baderha Kwon'okwo. ³² Buzinda baja ahantu haderhwa Gestemani, Yezu abwira abigirizibwa bage: Damali aha, oku ndi nahuna. ³³ Anacirhola haguma naye Petro, Yakobo na Yohana, anacirhondera ayunva obwoba n'oburhe. ³⁴ Anaciderha: Omurhima gwani guli burhê kuhik'okufa; mubere aha, munalalire. ³⁵ Kandi, acitunda lugero lwa makano magerwa, acirhimba okw'idaho, ahuna, nkabyankahashikine, akakasanzi kamuje kuli. ³⁶ Aderha: Abba, Larha, byoshi biri bilembu emwawe, onyanse cino cikombe! Ci arhali, okunonzize, cikwone amalonze gawe gajirikane. ³⁷ Ayisha emunda abigirizibwa bali, ashimana bahunire, anacibwira Petro: Simoni, kol'iro! Orhalalire ciru n'ensanguma! ³⁸ Mulalire munahune, lyo murhagi hirimira omu marhangulo; omurhima guli muzibu, ci omubiri guba muzamba. ³⁹ Ashubi ciyegula, n'okujira gon'ogo musengero. ⁴⁰ Anacigaluka, ababugana kandi bali l'iro; bulya amasu gabo gali mazirhu. Barhacihashaga oku mushuza. ⁴¹ Agaluka obw'akasharhu n'oku babwira: Hungagi, murhamuke! Byamaluga! Akasanzi kahisire; lola, oku mwana w'omuntu amahanwa omu maboko ga banabyaha. ⁴² Muzuke, rhugende; ala, owampana oyu oyegerire. ⁴³ Honaho, oku aciri aderha, Yuda muguma w'omubalya ikumi na babiri, haguma naye ehirhumbi hya Bantu badwirhe engorho, n'amahiri, barhumirwe na baguma bakulu n'abandisi n'abajinji. ⁴⁴ Owamuhana ali bahire eci cimanyiso: Oyu na yishi nyunyugurha, ye yo-yo; munagwarhe, n'okuseza ye bwenene. ⁴⁵ Erhi ahika, ayegera Yezu, aderha: Mwigiriza (Rabbi)! Amunyunyugurha. ⁴⁶ Okubundi Yezu abo Bantu bamuhuma nfune, n'oku mugwarha. ⁴⁷ Muguma omu bali ho, ayomola engorho, ayilikira , musirika w'omugula mukulu, anamushishimbula okurhwiri. ⁴⁸ Yezu, akula akanwa, ababwira: kamuyishire nk'abajigwarha ecishumusi, n'engorho n'amàhiri, lyo mu mpeka. ⁴⁹ nakagiba namwe ensiku zoshi, na nakayigiriza omu kanyamuzinda, murhana ngwarhaga.chi ebi bibire mpu lyo amandiko gahikirira. ⁵⁰ Oku bundi boshi bamuyaka balibirha. ⁵¹ Wamusole mugula wali mukulikire, erhi acihundikire ecibwikwa cone. Bamugwarha; ⁵² ci abashugunuka abasigira omushangi, alibirha bushugunu. ⁵³ Baheka Yezu emw'omugula mukulu ho hali entimanano y'abagula bakulu boshi, n'abajinji bakulu n'abandisi. ⁵⁴ Petro amuyisha nyuma kuhika omu luhya lw'omugula mukulu; adamala haguma n'abakozi, aka kaluka hofi n'omuliro. ⁵⁵ Abagula bakulu n'ihano likulu Sanhadreyo bakalonza obudima enyanya lya Yezu, lyo bahasha oku muyirha, ci barhabubonaga; ⁵⁶ bulya banji bakagi hamiriza obunywesi enyanya lyage, ci enderho zirhacikashushana. ⁵⁷ Baguma mulibo bayimuka, n'okulerha obuhamîrizi bw'obushumi enyanya zage, mpu: ⁵⁸ Rhwamuyunvirhe ali aderha oku: Ayishi hongola akanyamuzinda kayubakagwa n'amaboko g'abantu, n'omu nsiku zisharhu ashubi yubaka ho akandi karhaciri k'omu maboko g'abantu. ⁵⁹ Ciru kuhika-aho enderho zabo kuli ye zirhashushanaga. ⁶⁰ Okuhandi omugula mukulu, ayimuka mulyubo burhimanane, adosa Yezu, aderha: Korhashuzizi cici? Bici aba Bantu bakubarhuzize? ⁶¹ Yezu ahuza, arhana shuzagya bici, omujinji mukulu ashubi mudosa obwa kabirhi n'okuderha: Ka we kristo, Mugala wa Nyamuzinda mugishe? ⁶² Yezu ashuza: Niendi ye, mwayishi bona mwene omuntu abwarhire ekulyo kw'obuhashe bwa Nnâmahanga n'okuyishi n'ehitu hy'empingu. ⁶³ Lero omurhegesi mukulu abera emishangi yage, aderha mpu: Bicigi bindi rhwacidosa nka buhamirizi? ⁶⁴ Mwayunvirhe obugoma. Gurhi mubiyunvirhe? Boshi bamutwira olubanja oku ashinganine olufu. ⁶⁵ Nabaguma mulibo bakamukayirakwo, n'okumushwek'obusu n'oku mushurha ebifundo, banakamubwiira: Lebaga! N'abakozi bahikirira oku mulaha emise. ⁶⁶ Agomango erhi Petro aciri omuluhya, hanaciyisha mujakazi muguma w'omugula mukulu. ⁶⁷ Abona Pétro ali akaluka amusingiriza, n'oku mubwira: Nawe wali haguma na Yezu w'enanzareti. ⁶⁸ Acigasha ye, aderha: ntamanyiri, ntanayunvirhi ebi walonza okuderha. Anachihuluka aja omungombe. Oluhazi lwanacibika. ⁶⁹ Oyo mujakazi, aciri mubona, abwira abantu baciri aho: Oyu ali w'omubalya Bantu. ⁷⁰ Aciri mulahira. Hisanzi hisungunu, abâli aho bashubi bwira Pétro: Okunali oli muguma wa mulibo, bulya oli mu Galilaya. ⁷¹ Lero arhondera okuheherera n'okucigasha: Ntamanyiri oyo muntu muli mwaderha. ⁷² Honaho, oluhazi lwabika obwakabiri. Naye Pétro anacikengera akanwa Yezu amubwiraga: Embere oluhazi lubike kabiri, erhi wamandahira kasharhu. Erhi abigerereza, alaka.