¹ Bunola, munyere wa birhumbi, rhumbika ebirhumbi byawe! Barhuzungulusire, balibashurha irhama ly'omuzuzi w'israeli n'akahi. ² Na we, Betlehemu Efrati, murho omu bihumbi bya Yuda. Muliwe mwomwantengera owarhegeka omw'israeli, na olywa omurhangiro guli gwamango ga mira, nskiku za myakula. ³ Byobirhumire ayishi bashwekula kuhika aburhe ogwasirwe aburhe, na emisigala ya benewabo bashubira emw'abana b'israeli. ⁴ Ayishicibonesa, na ayishi rhegeka oku burhwali bwa Nnamubaho, Nnamahanga wage: bayishigwarha n'enyumpa esezize, bulya ayishij'irenge omw'igulu lyoshi. ⁵ Ye waishi lerha omurhula, olusiku amuashuru anayishe omucihugo cirhu, na okudaha omunyumpa zirhu, rhwayishi muhaza na badahwa nda na barhwali munani omu lubaga. ⁶ Nabo bayishi shereza ecihugo c'e Ashuru oku ngorho, na omucihugo ca Nimurodi omundalala z'emihango yage. Ayishirhucizantya oku mu Ashuru, amango anayishe omucihugo cirhu, na okudaha omu nciga zirhu. ⁷ Emisigala ya Yakobo yayishiba omukagarhi ka mbaga nyinji nka lume lurhenzire emwa Nnamubaho, nka mirhonyi ya mishi oku lubala: birhacikubagiri bantu, birhanacikubagiri bene bantu. ⁸ Emisigala ya Yakobo yayishiba omumashanja, omugarhi kambaga nyinji, nka ntale omu nsimba z'emuzirhu, nka mwana wa ntale omu buso bw'ebibuzi: erhi agera, analabarhe na okuberanga, na ntaye waciza. ⁹ Okuboko kwawe kulambukire abashombanyi bawe, n'abashombanyi bawe boshi bahererekere. ¹⁰ Omwagomango, Nnamubaho adesire; nayishi hererekeza egarhi kawe ebiterusi byawe, nayishi shereza endogomi zawe. ¹¹ Nayishi hererekeza emirhundu b'omucihugo cawe, na nayishibirundula obwakiro bwawe bwoshi. ¹² Nayishi hererekeza omukuboko kwawe ebyobulagu, orhakanacigwarha baluguzi. ¹³ Nayishi hererekeza omukagarhi kawe enshushano, na orhakanaci cikumba embere z'omukolo gw'amaboko gawe. ¹⁴ Nayishi hererekeza omukagarhi kawe enshushano nteganye, nshabule n'emirhundu yawe. ¹⁵ Nayishi cihola n'omutula, n'oburhe, oku mashanja garhayunvagya.