¹ Byanacihike, omumango ganayishe, entondo y'enyumpa ya Nnamubaho eyimngire oku cirhwa, eyinamukire oku mishozi, na embaga bakayinamukira yo. ² Amashanja gayishikajayo birhumbi, n'okuderha: Muyishe, rhuyinamukire okuntondo ya Nnamubaho, amunyumpa ya Nnamahanga was Yakobo, lyo arhuyigiriza enjira zage, na lyo rhugera omunjira zage. Bulya irhegeko lyarhenga e Sioni, na omwanzi gwa Nnamubaho gurhenge e Yerusalemu. ³ Ayishitwira bantu banji olubanja, alahiza amashanja g'oburhwali, ga kuli. Emigushu yabo bayihindula nfuka, n'amatumu gabo bagahinule gahoro; ishanja lirhakacirholera erind'ishanja engorho, barhanakaci ciyigiriza ntambala. ⁴ bayishilama ngasi muntu omu mizabibu yage na omu mizetuni yage; na ntaye muntu waba dubaga; bulya akanwa ka Nnamubaho w'emirhwe kadesire. ⁵ Cikwone ngasi ishanja lyashigenda okw'izino lya mungu walyo, nirhu rhwayishigenda okw'izino lya Nnamahanga wirhu, amango goshi na lwoshi. ⁶ Okwolwolusiku, Nnamubaho adesire, nayishi yankirira ebirema, nayishi shoboza abali hinvirwe, abarhali bonire. ⁷ Oku birema nashijira emisigala, na oku balihinvirwe ishanja lya burhwali; na Nnamubaho ayishi barhambula, okuntondo y'e Sioni, kurhangiraho n'amangon goshi. ⁸ Na nawe, mushonezo gwa buso, cirhwa can munyere we Sioni, kuliwe oburhegesi bwa mira bwayishi kuyishira, obwami bw'omunyere we Yerusalemu. ⁹ Bulyagurhigi oli wabalanjira buno? Korhacijira mwami, erhi bahanuzi lyo amalumwa gakugwarha nka mukazi ashurha? ¹⁰ munyere w'e Sioni, olibule nka mukero gwa mukazi waburha! bulya buno warhenga omumurhundu n'okujilama omunciga, wagenda kuhika e Babeli; Eyo wacira, eyo yo Nnamubaho akugombola omumaboko g'abashombanyi. ¹¹ Bunola mashanja manji gacigushire erhi werhuma: arhindibuke, kwo balibaderha, na amasu girhu gayigurhire e Sioni! ¹² Cikwone barhamanyiri entanya za Nnamubaho, barhayunvirhi emihigo yage, barhamanyiri oku abashobozize nka mburho omu nguli. ¹³ Munyere w'e Sioni, yimanga olabarhe! Nakuha ihembe ly'ecuma na enyunu z'amarhale, na wayishi vungunyula mbaga nyiji; wayishirhula ebirugu byabo emwa Nnamubaho, obugale bwabo emwa Nnahamwirhu w'igulu lyoshi.