¹ Mwaka gw'ikumi na karhanu kw'oburhambuzi bwa Tibere Kayizari, amango Ponse Pilato erhy'ali mulongolanyi we Yudeya, herodi terarque we Galilaya, mulumuna wa Filipo terarque we Ituria now'omunchiga ze Trachonite, Lysanias terarque we Abilene, ² Nab'oku kasangi ka balya batwi b'emanja Anasi na Kayafa, omwanzi gwa Nnamahanga gwanaciyishira Yohana, mugala wa Zakayo, omw'irungu. ³ Anacigenda omu bihugo byoshi n'ebye burhambi bw'eyordani , ayigiriza obu batizo n'obuciyunjuze n'okuhungama ebyaha byabo, ⁴ Lugenda ebyali yandisirwe omu citabu c'emyanzi y'Isaya, mulebi: lir'izu ly'olya wajaga w'ahamagaza omw'irungu: murheganye enjira ya Nnahamwirhu, mukubule n'enjira zage. ⁵ Akabanda koshi kayishi yunjuzibwa, ngasi ntondo na ngasi cirhwa byoshi byaishi honolwa; ahakubire hayishi kubulwa, n'enjira z'ebirimbirimbi zayishi kubulwa. ⁶ Na ngasi boshi b'emibiri baishi cungulwa na Nnamahanga. ⁷ Cikwone anaciderha emwa balya bayishaga omulubaga mpu babatizibwe naye: mw'iburha ly'enjoka, ndi wamuhanwire okuyaka obuhanya buyishire? ⁸ Ntyo mulehekage amalehe gw'okuli gw'obwiyunjuze, na murhakagi derha mpu: mugwerhe Ibrahimu nka sho winyu! Bulya mubwizire oku omwaga mabuye Nnamahanga anagusa abana oku Ibrahim. ⁹ Ntyo embasha ekola eli ahacisina cemirhi: nangasi murhi gurha lehesiri amalehe minja gwatwibwa n'okukwebwa okuciko. ¹⁰ Olubaga lwana cimudosa, erhi: gurhi birhukwanine okujira? ¹¹ Anacibashuza erhi: ngasi ogwerhe milondw'ibiri ahe olya orhagwerhi muguma, n'olya ogwerhe ebiribwa ajire naye kwonokwo. ¹² Hana ciyisha olundi lubaga mpwalu batize, lwamu bwira erhi: Mashi Nnahamwirhu, gurhi rhwankajira? ¹³ Anacibabwira erhi: murhalyuzagya kulusha oku bamurhegesire. ¹⁴ Abasirika nabo bamudosa: nirhu kurhigi rhwakajira? abashuza: erhi murhalibuzagya erhi kunyaga omuntu oku bulenganya, mushagalukire oluhembo mugwerhe. ¹⁵ Nk'okulubaga lwakagi lindirira, n'okucidosa mpu ka Yohana arhali ye kristu, ¹⁶ Anacibiderha emwaboshi: nie, ndi wakubatiza oku mishi; cikwone oyishire, agwerhe obuhashe bwinji kundusha, ntana shinganini oku shwekula ciru emikaba y'ebirato byage. ye, waishi mubatiza oku muka mucesibwa n'oku muliro. ¹⁷ Agwerhe omu kuboko ecifyagiro; ayishi cesa engo, n'okulondola engano omu nguli yage, cikwone ayishi yoca abasi omu muliro gurhakazima. ¹⁸ Nantyo ko Yohana akagi manyisa emyanzi y'akalembe oku lubaga, n'oku mubwira kandi marhegeko manji. ¹⁹ Cikwone Herodi erhya shoholerwa na Yohana enyanya za Herodiasi, nka mulumuna wage, n;oku mabi goshi ajijire, ²⁰ Ayushula kandi okwagalya goshi n'okushweka Yohana omu mpanikwa. ²¹ Olubaga lwoshi lwakayisha mpu lubatizibwe, Yezu naye abatizibwa; n'erhi, aba ali ahuna, empingu yayiguka. ²² Na muka mutakatifu anacimuhonokera ko nka mugani gwa mubiri, nka nguku. N'izu lyana ciyunvikana empingu lya derha: oli mugala wani muzigirwa; omuwe mwo nahebire obuzigire bwani bwoshi. ²³ Yezu alikol'agwerhe hofi miaka makumi gasharhu erhi arhondela omukolo gwage, nka, oku bakagi murhanyiza, mpu mugala wa Yusufu, mugala wa Eli, ²⁴ Mugala wa Matati, mugala wa Lawi, mugala wa Meleki, mugala wa Yona, mugala wa Yosefu, ²⁵ mugala wa Matiasi, mugala wa Amosi, mugala wa Nahumu, mugala wa Esli, mugala wa Nagayi, ²⁶ mugala wa Maathi, mugala wa Matatiasi, mugala wa Semeyi, mugala wa Yosefu, mugala wa Yuda, ²⁷ Mugala wa Yohana, mugala wa Resa, mugala wa Zerubabeli, mugala wa Shealtieli, mugala wa Neri, ²⁸ mugala wa Melki, mugala wa Adi, mugala wa Kosamu, mugala wa Elmadamu, mugala wa Eri, ²⁹ mugala wa Yoshwa, mugala wa Eliezeri, mugala wa Yorimu, mugala wa Mathati, mugala wa Lawi, ³⁰ Mugala wa Simoni, mugala wa Yuda, mugala wa Yosefu, mugala wa Yonamu, mugala wa Eliakimu, ³¹ Mugala wa Melea, mugala wa Mena, mugala wa Mathata, mugala wa Nathani, mugala wa Daudi, ³² Mugala wa Yese, mugala wa Obedi, mugala wa Boazi, mugala wa Salmoni, mugala wa Nashoni, ³³ Mugala wa Aminadabu, mugala wa Adimini, mugala wa Aramu, mugala wa Hesroni, mugala wa Faresi, mugala wa Yuda, ³⁴ Mugala wa Yakobo, mugala wa Izaki, mugala wa Ibrahimu, mugala wa Tera, mugala wa Nakoni, ³⁵ Mugala wa Seruki , mugala wa Rogau, mugala wa Faleki, mugala wa Eberi, mugala wa Sala, ³⁶ Mugala wa Kainani, mugala wa Arfaksadi, mugala wa Shemu, mugala wa Nuhu, mugala wa Lameki, ³⁷ Mugala wa Methusela, mugala wa Henoko, mugala wa Yaredi, mugala wa Mahaleli, mugala wa Kenani, ³⁸ Mugala wa Enoshi, mugala wa Sethi, mugala wa Adamu, mugala wa Mungu.