¹ Muli ago mango haba irhegeko lya Cesari Auguste, arhegeka mpu bajire omuganjo gwigulu lyoshi. ² Ogwo gwo muganjo murhanzi gwajiragwa amango Kwiniruyusu ali murhegesi w'Esuriya. ³ Bagenda boshi oku yandikwa, ngasi muguma omu cishagala cage, ⁴ Yosefu naye ainamuka kurhenga Egalilaya omu cishagala c'Enanzareti, lyo aja Ebuyahudi, omu cishagala ca Daudi, cihamagalwa Betlehemu, bulya naye ali w'omu nyumpa n'omu buko bwa Daudi, ⁵ Lyo ajiciyandisa bona Mariya, ali shebire, wali izimi. ⁶ Amango balikola bali eyo, akasangi Mariya aligwasirwe okuburha kahika, ⁷ ana burha omugala lwo lubere lwage. Amubwika ebirere anamugwishiza omu ciranga, bulya barhali gwerhe aha babera omu nyumpa y'ebigolo. ⁸ Habaga, muli eco cihugo co nnene, abangere bakagi gera omu ishwa balile budufu omu kulanga orhurhumbirhwabo. ⁹ Na ntya, malaika muguma wa Nnahamwirhu ababonekera, nobukuze bwa Nnahamwirhu bwa langashana eburhambi lyabo. Boshi bagwarhwa n'ecoba. ¹⁰ Cikwone malaika ababwira erhi: murha yobohaga; mudwirhire omwanzi mwinja, gwayishibera oku lubaga lwoshi gwa bushagaluke bunene. ¹¹ Ene, omu cishagala ca Daudi, amu burhirwe omu ciza, yeri Kristo, Nnahamwirhu. ¹² Ntya ecimanyiso mwa manya mwo co ceci: mwashimana omwana abwisirwe ebirere ana gwishire omu ciranga. ¹³ Honaho obwinji bwa ba malaika b'enyanya baba haguma n'olya malaika baka kuza Nnamahanga n'okuderha mpu: ¹⁴ Akuzibwe Nnamahanga oli enyanya bwenene, n'omurhula en'igulu oku bantu asima! ¹⁵ Erhi ba malaika babarhenga ho bashulira enyanya, abengere baderha bone na nene: rhugendage kuhika Ebetlehemu, rhulole ebyabire, ebi Nnahamwirhu anarhu manyusagya. ¹⁶ Bagenda bulibirha, bana cibugana Maria na Yosefu, n'omwana murho agweshire omu ciranga. ¹⁷ Erhi banamubona, baganira ebya desirwe ok'oyo mwana murho. ¹⁸ Ngasi boshi babayunvirhe basomerwa n'emyanzi abengere baba bwiraga. ¹⁹ Maria abika ebyo byoshi aka bigerereza emurhima. ²⁰ N'abengere bagaluka, bajakuza n'okucikumba Nnamahanga oku byoshi bayunvirhe n'oku bibona, n'okwo kwo binali nkoku bana bwiragwa. ²¹ Olusiku lwa kali munane, lw'omwana oku karhwa, lwana cihika, bana cimuyirika izino lya Yezu, izinolya yerekanagwa na malaika embere nnina arhachirhola izimi. ²² Na, amango ensiku zoku cesibwa kwabo za hikiriraga, kushimbana n'irhegeko lya Musa, Yusufu na Mariya banacimuheka eyerusalemu, ²³ kushimbanana n'ebya yandisirwe omu marhegeko ga Nnahamwirhu: ngasi murhabana lubere lwa nnina aderhwa mtakatifu wa Nnahamwirhu. ²⁴ N'omu kuhana entulo nguku ibiri erhi bana babiri ba nguku, nkoku byali desirwe omw'irhegeko lya Nnahamwirhu. ²⁵ Sinzagi, e Yerusalemu yali muntu oderhagwa Simoni. Oyo muntu ali wokuli na mwirhonzi, akagi langalira oburhulirize bw'Israeli, na muka mwimana ali enyanya zage. ²⁶ Naye aliyeresirwe na muka mwimana oku arhafe buzir'okubona omuchunguzi wa Nnahamwirhu. ²⁷ Ntyo aj'omw'ishengera, adwirhwe na muka, n'amango ababusi balerhaga omwana Yezu mpu bamujire nkoku bworhere bwamarhegeko bwali, ²⁸ Amurhola omu maboko gage, akuza mungu, anaderha: ²⁹ Buno, Nnahamwirhu, olikule mwambali wawe agende n'omurhula, nk'oku waderhaga. ³⁰ Bulya amasugani gabwine obuchize bwawe, ³¹ Obuchunguke warheganyagya emalanga ga bantu boshi, ³² Bulangashane bw'okulomekera abeindi milala, n'okuba bukuze bw'Israeli, lubaga lwawe. ³³ Ishe na nnina barhangala enyanya ly'eyo mianzi yaderhagwa enyanya lyage. ³⁴ Simoni abagisha, abwira na Mariya, nnina: sinzagya, oyu mwana ajijirwe omu kuhihima, n'oku imanga kwa banji omw'Israeli, anayishi ba cimanyuso coku jachirwa, ³⁵ Nakuli we ngorho yarhula omu murhima gwawe, mpu ly'enyegererezo z'emirhima minji ziishi fululwa. ³⁶ Hali mulebi muguma mukazi, Ana, munyere wa Fanueli; w'obuko bw'Aser. Ali gwerhe emisi n'omugikulu, ali lamire myaka nda bon'omulume wage. Kurheng'ebusole bwage. ³⁷ Ayishi sigala mukana, na mukulu wa miaka makumi gali munani nnini, arhakagi karhenga omw'ishengero, anakagi kakolera mungu budufu n'omushi omw'ifungo n'okuhuna. ³⁸ Hanaciba akasangi, naye yene, omwako kashanzi konenene, akagi haramya Mungu,n'okuka derha enyanya za Yezu emwa balya boshi bakayunva obuchunguke bw'abeyerusalemu. ³⁹ Erhi baba bama hikiriza ebyali rhegesirwe n'irhegeko lya Nnahamwirhu, Yosefu na Mariya banacigaluka e Galilaya, e Nanzareti omu murhundu gwabo. ⁴⁰ N'obwo, omwana ali amakula ana zibuha. Aliyunjwire obumanye, n'olukogo lwa Nnamahanga lwali kuli ye. ⁴¹ Ababusi ba Yesu bakagi ja ngasi mwaka e Yerusalemu, oku lusiku lwa pasaka. ⁴² Erhi agwarha miaka ikumi n'ibiri, akagi yinamuka, nk'oku obworhere bw'olusiku lukulu. ⁴³ Kandi, Ezo nsiku erhi zigera, zoku galuka bwabo, oyo mwana Yezu asigala e Yerusalemu. Ishe na nnina barhacimanyiri. ⁴⁴ Bakamanya mpu boshi bali omu lugenzi lwabo, bajira lusiku luguma omu njira, banacija bamulonza omu milala yabo n'omubo banalimanyire. ⁴⁵ cikwone, barhamubonaga, bashubi galuka e Yerusalemu baja mulonza. ⁴⁶ Enyuma lya nsiku zisharhu, banacimurhingana omwishengero, adahire aha karhi k'abigiriza, akagi bayunvirhiza n'oku badosa. ⁴⁷ Boshi bamuyunvirhe basomerwa n'obwenge bwage n'amashuzo gage. ⁴⁸ Erhi ababusi bage bamubona, boshi basomerwa, na nnina amubwira: mwana wani, bulya gurhi warhujirisize ebiri nkebi? sinzagya, sh'oyu na nani, rhwajaga rhwakulonza n'oboba. ⁴⁹ Anacibabwira: bulya gurhi wajaga wandonza? kamurha manyiri okubimpunyire nchishwekere omu nyumpa ya larha? ⁵⁰ Cikwone barhayunvagya eby'ababwiraga. ⁵² Na Yezu anagendekera akula n'obwenge, n'oku lugero, embere za mungu n'embere za bene bantu.