¹ Omukumanya ebyo byoshi, ngasi bami boshi bali olundi lunda lwa yordani, omucirhwa n'omu cirera n'oku ntabi yoshi y'eburhambi by'enyanja, kuhika hofi n'e Libni. Abahiti, aba amori, aha kanani, aba peresi, aba hivite n'aba yebusi. ² Banacigusha haguma oku muhigo muguma enyanya za Yoshua n'israeli. ³ Abikala b'e Gibeoni, okulwabo luhande, erhi bayunva ngasi kwoshi Yoshua ajiraga yeriko na hai, ⁴ Bajira obwengehushu, banaciheba omu lubalamo n'entanda. Barhola babusunzu bakulukulu babaheba enyanya ly'ebihesi byabo n'orhubindi rhwamira rhw'idivai, rhukola rhukoyire, na rhuhangirize, ⁵ Emagulu gabo bayambala enkwero mpangirize, n'orhushangi rhukoyire, n'omugati baliciyikire gwalikola mumu gunakola guvunzire. ⁶ Bahika aha Yoshua ali oku cihando c'e Gilgali, banamubwira, ntya oku b'israeli bashi: rhuyishire omucihugo c'ekuli nantyo rhujire endagano rhweshi. ⁷ Abantu b'israeli bashuza abahiviti: Nkabaga erhi mulamire egarhi kirhu, nagurhi rhwankajira endagano na ninyu? ⁸ Babwire Yoshua: rhuli bakozi bawe. Na Yoshua ababwira: mwe bandi, na ngahi mwarhenga? ⁹ Bamushuza: abakozi bawe bayishire omucihugo c'ekuli bwenene, okuyishi kuza izino lya Nnamubaho, Nnamahanga wawe; bulya rhwayunvirhe baderha ogwage, enyanya lya byoshi ajijire e misiri, ¹⁰ n'olwiganyo lw'oku akolaga abami babiri b'aba Amori, n'olunda lwa yordani, Sioni, mwami w'e Hesboni, na Ogu mwami w'e Bashani, ali aha Bestoroti. ¹¹ Abashosi birhu n'abomu cihugo cirhu coshi barhubwizire: mpu, rholi entanda y'olubalamo, mugende embere zabo, munabawire: rhuli bakozi binyu, nantya mujire endagano na birhu. ¹² Al'omugati gwirhu: gwaciri mudurhu amango rhwagujiraga ntanda omunyumpa zirhu, olusiku rhwagendaga n'okuyisha emunda muli, buno gukola mumu na muvundu. ¹³ Orhu rhubindi rhw'idivayi, rhwarhuyunjuzagya erhi rhuciri rhuhyahya, ala oku rhukola rhuberesire. ¹⁴ Bene Israeli banarhola okubiryo byabo buzira okudosa Nnamubaho. ¹⁵ Yoshua ajira omurhula nabo, ajira endagano yali shinganine abalekera akalamu, n'abakulu b'ihano bacigashirabo. ¹⁶ Nsiku isharhu enyuma ly'okujira eyo ndagano, abana b'israeli bamanya oku bali haguma nabo, n'oku ekagarhi kabo balamaga. ¹⁷ Bulya abana b'israeli bagenda, banahika omumurhundu yabo olusiku lwakasharhu; Emirhundu yoabo yali, Gibeo, Kefira, Beeroti, na Kiryati Yearimu. ¹⁸ Barhabalwisagya, bulya abakulu b'ihano bali bacigashirebo kuli Nnamubaho, Nnamahanga w'israeli, okubalekera akalamu. Cikwone olubaga kwoshi lwacidudumira abakulu babo. ¹⁹ N'abakulu boshi babwira olubaga lwoshi: rhwacigashirebo kuli Nnamubaho, Nnamahanga w'israelin na ntakwo rhwankacibahumakwo. ²⁰ Lolagi okurhwabajira: rhwabaleker'akalamu, lyo rhuleka okucikululira obukunizi bwa Nnamubaho, enyanya z'omwigasho rhwacigashiragabo. ²¹ Banalame, abakulu bababwira. Cikwone bayishi kakolesibwa okutw'enshali n'oku dom'amishi oku mbuganano yoshi ya bene Israeli nkoku abakulu banababwiraga. ²² Yoshua abahamagala: anabwira ntya: carhumaga mwarhurheba, omukuderha: rhuli bahali naninyu, N'obwo haguma na nirhu mulama? ²³ 23 Ntya mukola baheherere murhakanacihusa okubà omu mukolo, gw'okutwa enshali, n'okudoma amishi enyana lyenyumpa ya Mungu wani. ²⁴ bashuza Yoshua, banaciderha: bulya rhwono rhuli bakozi bawe rhwabwizirwe, nka gurhi oyo Nnamubaho, Nnamahanga wawe, arhegekaga omukozi wage Musa okumuha ebihugo n'okushaba embere zinyu abikala boshi, n'okubonekana kwinyu kwarhulerhamwo ecobà cinene oku kalamu kirhu: byobyarhumire rhwajirantyo. ²⁵ Nabunola rhwono okola obwine omumaboko gawe; orhujire nkoku obwine kwinja kunashinganine okurhujira. ²⁶ Yoshua ajira kulibo nkoku byanali rheganyizibwe; abaheba omu maboko g'abana b'israeli, barhanacilonzagya okubayirha. ²⁷ Cikwone abarheganya okukatw'enshali n'okudoma amishi oku mbuganano, n'oku kagombe ka Nnamubaho omuhango Nnamubaho ali cishozire: kwobanacijira kuhik'ene.