¹ Nnamubaho abwira Yoshua, orhayobohe, orhanajugumaga! orhole abalwi b'entambala, yimuka ohonere e hayi, Lola, omanyire omwami was hayi omu maboko gawe, n'olubaga lwage, n'omurhundu n'ecihugo cage. ² Owayishi jira hayi n'omwami save kulya wayirhaga yeriko n'omwami wage;cikwone lero muhagul'ebirugu n'ebishwekwa, ozongoloke omurhundu. ³ Yoshua anaciyimuka boshi n'abalwi b'entambala, baja e hayi. Alondola ntwali Bantu bihumbi makumi gasharhu abaheka budufu. ⁴ Mulyukwo abaaha er'irhegeko: muyunve, muzunguluke enyumpa n'omurhundu; murhajaga Hali n'omurhundu munacirheganye. ⁵ Cinye rhweshi n'olubaga rhulinalwo lwoshi, rhwayisi yegera hofi n'omurhundu. Na hano bayisha barhimbulire nka kulya burhanzi, rhwayishi yaka embere zabo. ⁶ Bayishi rhushimba kuhika rhubakulule hali n'omurhundu, bulya nayishi derha: bamarhuyaka nkakulya bulya burhanzi! rhunaciyakire embere zabo. ⁷ Manarhengage ahamwali zungulusire n'okugwarha omurhundu. Nnamubaho, Nnamahanga winyu ayishi guheba omumaboko ginyu. ⁸ Hano mwamagwarha omurhundu, munagudulike muliro, mujire nkoku Nnamubaho anadesire: lir'irhegeko muhire. ⁹ Yoshua abalikula, banagenda bakereka bazunguluka egarhi ka beteli na hayi, ebuzikiro bw'izuba bwa hayi. cikwone Yoshua ageza obwobudufu omugahi n'olubaga. ¹⁰ Yoshua azuka muceracera, agera omu lubaga n'okulola, buzinda ashokola n'okugenda n'okurhabalira Hayi, n'olubaga lwali longolinwe n'abagula b'israeli. ¹¹ Ngasi balwi b'entambala baliboshi naye bayinamuka n'okuyegera, erhibaba bamahik'ebwa murhundu, bajir'ecihando enyanya lya hayi, aho ho hali olubanda lwalibaberwire bone hayi. ¹² Yoshua arhola hofi bihumbi birhanu bya balume abaheba bazunguluka egarhi kwa beteli na hayi, ebuzikiro bw'izuba bw'omurhundu. ¹³ Erhi aba ecihando coshi ciba camalalira oluhande lw'enyanya ly'omurhundu n'oku guzungulika ebuzikiro bw'izuba, Yoshua acishegeza omubwo budufu ekegarhi k'akabanda. ¹⁴ Erhi mwami we hayi abona ntyo, abehayi bazuka dubaduba oku muceracera, bagenda rhimanana n'israeli okubalwisa; mwami agenda, n'olubaga lwage, aja ahantu balilaganine, olunda lw'ebwa cirera arhanacimanyaga oku hali abamuzungulusire enyuma z'omurhundu enyanya zage. ¹⁵ Yoshua n'abisraeli boshi bayorha nkbahimirwe embere zabo, banayaka kugerera enjira y'ebw'irungu. ¹⁶ Lero olubaga lwoshi lwali omu murhundu lwacigusha omu kubakulikira, baakulikira Yoshua, bakuluka Hali n'omurhundu. ¹⁷ Harhabonekanaga omu hayi n'omu beteli ciru n'omulume muguma orhagendaga akulikire israeli. Basiga omurhundu guli muyigule banashimbulira israeli. ¹⁸ Nnamubaho abwira Yoshua: yerekeza itumu lyawe ogwerhe omukuboko e hayi, bulya naguhira oku buhashe bwawe. Na Yoshua ayinamula itumu kuyerekera ebwa murhundu. ¹⁹ Oku aciyimanzize okuboko kwage, abantu bali zungulusire barhenga aha bali; dubaduba badahirira omurhundu banagugwarha. Banaharhula bagudulika muliro. ²⁰ Abe hayi erhibalol'enyuma zabo, babon'ecigi omurhundu gwakagi yinamuka emalunga, nantakwo bakagi cizize ciru n'olunda luguma. Olubaga lwaliyakire ebw'irungu bagaluka oku bali bashimbire. ²¹ Bulya Yoshua n'israeli yeshi, babona omurhundu gwagwasirwe n'abantu bazungulusirwe, n'ecigi c'omumurhundu cakagi shonera emalunga, bagaluka banalwis'abantu be hayi. ²² Abandi bayimuka omu murhundu omukubarhimana, n'abehayi bagorhwa n'israeli enyunda zoshi. Israeli abahima buzira kusiga ocizine erhi ofumire. ²³ Bagwarha omwami we hayi mpira, banamuhekera Yoshua. ²⁴ Erhi Israeli ayusi niguza abikala boshi b'e hayi, omunciga, omw'irungu, mwobali bashimbire, nabashi oku banali bagera oku bwoji bw'engorho, Israeli yeshi agaluka kuli hayi anamushurha n'obwoji bw'engorho. ²⁵ Kwahika Bantu bihumbi ikumi na bibiri byanizirwe olwolusiku balume n'abakazi, boshi b'omu hayi. ²⁶ Yoshua arhagalulaga okuboko alifumbasire mw'itumu kuhika boshi balicisigre bahererekera. ²⁷ Cikwone Israeli abahima ebishwekwa n'ebirugu byomumurhundu kushimbana irhegeko Nnamubaho alibwizire Yoshua. ²⁸ Yoshua ayokera hayi, harhacisigalaga kantu kuhika byaba biguka kuhik'ene. ²⁹ Atungika omwami we hayi oku murhi guhika bijingo, ahakusimisa kw'izuba; Yoshua ahana oluhuma lw'okuhonola omurhumba gwage oku murhi; bagukweba ahamuhango gw'okudaha omurhundu, bashonya n'entubi y'amabuye, ganacihaba kuhik'ene. ³⁰ Yoshua ayubaka oluhero lwa Nnamubaho n Nnamahanga w'israeli oku ntondo y'e bali, ³¹ Nkoku Musa, mukozi was Nnamubaho alikubwizire abana b'israeli, na nkoku byalibiyandike omucitabu c'amarhegeko ga Musa: lwali luhero lwa mabuye mashogole garhajakwo cuma, bayishi karhulira okwolwo luhero entulo z'okusingonola emwa Nnamibaho, n'oku kalerha entulo mbagwa z'omurhula. ³² Aho yoshua aliyandisire oku mabuye olupapura lw'amarhegeko Musa iliyandisire embere z'abana b'israeli ³³ Israeli yeshi, n'abagula bage, abakulu bage, abatwi b'emanja, bayimanga enyunda zombi z'isandaku, embere z'abagula n'abalawi bakagi barhula isandaku ly'amalaganyo lya Nnamubaho; ebigolo n'abana b'israeli baliho cihumbi okulunda lw'entondo ye egerizimu na cihumbi okulunda lw'entondo ya ebali kushimbana irhegeko lya Musa, mukozi wa Nnamubaho, okugisha olubaga lw'israeli. ³⁴ Yoshua asoma bwonobwo emyanzi y'amarhegeko, eyokugisha n'eyoku heherera, kushimbana ebyari biyandike omu citabu c'amarhegeko. ³⁵ Harhabaga ciru n'ehi, omubyo Musa aliyandisire, Yoshua arhasomaga embere z'embuganano y'israeli, bakazi n'abana, n'ebigolo byajaga byagenda ekagarhi kabo.