¹ Adoni Sedeki, mwami w'eyerusalemu, amanya oku Yoshua anagwasire Hai n'oku mushereza okurhankaderhwa, kwajijire Hai n'omwami wage nkoku ajiraga yeriko na mwami wage, n'oku abikala be gibeoni Bajijire omurhula n'israeli na banali mulibo. ² Lero ayoboha bwenene; bulya gibeoni gwali murhundu munene, nk'emirhundu y'akanabwami eyorha, yewali munene kulusha Hai, n'abantu bage boshi z'ali ntwali. ³ Adoni Sedeki, mwami w'e yerusalemu, arhumiza emwa Hohamu, mwami w'e Hebroni, emwa Piramu, mwami w'e Yarmuti, n'emwa Yafia, mwami w'e Lakishi, n'emwa Debiri, mwami w'e Egloni: ⁴ Muyishe emundandi, muntabale, lyo rhulwisa Gibeoni, bulya Bajijire omurhula na Yoshua n'abana b'israeli. ⁵ Bami barhanu bab'amori, mwami w'e Yerusalemu, mwami w'e Hebroni, mwami w'e Yarmuti, mwami we Lakishi, mwami w'e Egloni, bacishubuza haguma banayinamuka n'emiherho yabo; bagendi handa hofi na Gibeoni, banamurhabalira. ⁶ Abikala b'e Gibeoni barhuma oku bajibwira Yoshua, omucihando c'egilgali: mashi orhayake Abakozi bawe, oyishe emundarhuli dubaduba, orhucize mashi, orhuhe uburhabale; bulya abami boshi bab'amori, balama omu ntondo, barhurhabalire. ⁷ Yoshua anagenda e Gilgali, ye boshi n'abantu b'entambala, n'entwali z'abantu. ⁸ Nnamubaho abwira Yoshua: orhabayobohaga, bulya mbahizire omu maboko gawe, Ntaye mulibo warhindira embere zawe. ⁹ Yoshua abayishira caligumiza, enyuma z'okulala agenda budufu gwoshi kurhenga e Gilgali. ¹⁰ Nnamubaho abashandaza embere z'israeli; n'israeli abaniguza kugalu eyo hofi n'e Gibeoni, babashimbuluza omunjira yasokera e Beti Horoni, Babashurha kuhika e Azeki n'e Makeda. ¹¹ Okwo balibirhaga embere z'israeli; erhi bakola bayandagalira e Beti Horoni, Nnamubaho anabahonezakwo amabuye manene kurhenga emalunga kuhika e Azeki, bahererekera; abafire n'ago mabuye g'olubula bo bali banji kulusha abayisirwe n'engorho n'abana b'israeli. ¹² Lero Yoshua abwira Nnamubaho, olulusiku Nnamubaho ahanaga ab'amori oku bana b'israeli, aderha emalanga g'israeli: we izuba, yimanga kuli Gibeoni, na we, mwezi, oku lubanda lwe Ayaloni! ¹³ Izuba lyana yimanga, n'omwezi gwatwa olugenzi lwagwo, kuhika ishanja lyacihola oku bashombanyi babo. K'ebyo birhayandisirwi omu citabu c'omushinganya? Izuba lyayimanga omu malunga, lirhana harhuliraga okuji gwishira, hofi lusiku lwoshi. ¹⁴ Harhacibaga bundi olundi lusiku luli nk'olwo, n'oli omuzagezire n'omu zayishire, aha Nnamubaho ayunvirhe izu ly'omuntu; bulya Nnamubaho alwiraga Israeli. ¹⁵ Na Yoshua, n'israeli yeshi, bashubira ebwa cihando e Gilgali. ¹⁶ Nalya Bami barhanu balibirha, banaji cifulika omu lwala luguma e Makeda. ¹⁷ Baguhisakwo Yoshua, baderha: balya bami barhanu bababwine bacifulika omu lwala luguma e Makeda. ¹⁸ Yoshua aderha: musigulire amabuye manene oku muhango g'olwo lwala, n'aho muhebeho abalanzi. ¹⁹ Naninyu, murhayimange, mushimbuluze abo bashombanyi binyu, mubagorhe enyuma; murhabayemerere okudaha omu mirhundu yabo, bulya Nnamubaho, Nnamahanga winyu, anabahizire omu maboko ginyu. ²⁰ Erhi Yoshua n'abana b'israeli baba bamacihimula bwenene kulibo, n'okubashurha lwoshi, abarhulubusire balibirhira omu mirhundu mizibuhye, ²¹ N'olubaga lwashubira oku murhula omu cihando emunda Yoshua ali e Makeda, na nta muntu yeshiyeshi wacidesire kubi kuli abana b'israeli. ²² Lero Yoshua aderhaga: muyigule omuhango g'olwo lwala, muhuluse balya bami barhanu, munabanderhere. ²³ Bajirantyo, banamulerhera abo bami barhanu bahulusagya omu lwala, mwami w'e Yerusalemu,mwami w'e Hebroni, mwami w'e Yarmuti, mwami w'e Lakishi, mwami w'e Egloni. ²⁴ Erhi bamalerhera Yoshua abo bami, Yoshua ahamagala abalume boshi b'israeli, abwira abarhambo b'abalwi b'entambala bajaga bagenda boshi naye: muyegere, mubayimange oku magosi. Bagerera, na banaheba amagulu gabo oku magosi gabo. ²⁵ Yoshua ababwira: murhaderhe mpu mwakenga erhi kujuguma, mucihe omurhima muzibuhe, bulya ntya kwo Nnamubaho ayishi kajira ngasi bashombanyi binyu boshi mwanalwise. ²⁶ Enyuma lyebyo, Yoshua abashurha anabaniga; abatundika oku mirhi irhanu, banakulegerera kuhika bijingo. ²⁷ Erhi buyira, Yoshua arhegeka oku babahonolage okw'eyo mirhi, banabakweba omwalulya lwala banalicifulisire, baheba n'amabuye oku muhango gw'olwala, ganahabezire kuhik'ene. ²⁸ Yoshua anagwarha Makeda lwon'olwo lusiku, na okumushurha oku bwoji bw'engorho, na mwami wayo arhaciderhagwa bundi, omurhundu n'ebyamuli byoshi; barhasigaga kantu, bajira mwami w'e Makeda kulya banajiraga mwami w'e yeriko. ²⁹ Yoshua, n'israeli yeshi, barhamuka Makeda kuhika baja e Libni, banamurhabalira. ³⁰ Nnamubaho amuhana naye, n'omwami wage, omu maboko g'israeli, n'okumushurha oku bwoji bw'engorho, ye na ngasi byoshi byali muliye; barhasigaga ciru n'omuguma, bajira mwami wage kulya banajiraga mwami w'e yeriko. ³¹ Yoshua, n'israeli yeshi, barhaluka Libni kuhika e Lakishi; banahanda embere zage, banamurhabalira. ³² Nnamubaho ahana Lakishi omu maboko g'israeli, bamugorha olusiku lwakabiri, naye bamushurha oku bwoji bw'engorho, ye na ngasi byoshi byali muliye, nkoku banajiraga Libni. ³³ Horamu, mwami w'e Gezeri, ayinamuka okujirhabala Lakishi. Yoshua amushurha, ye N'olubaga lwage lwoshi, buzira kusiga ciru omuguma. ³⁴ Yoshua, boshi n'israeli yeshi, barhaluka Lakishi baja e Egloni, banahanda embere zage, banamurhabalira. ³⁵ Bamugwarha lwon'olwo lusiku, banamushurha oku bwoji bw'engorho, ye na ngasi byoshi byali muliye, Yoshua amuhererekeza okurhankaderhwa olwolusiku, nkoku ajiraga Lakishi. ³⁶ Yoshua, na Israeli yeshi, bayinamuka omu Egloni baja e Hebroni banamurhabalira. ³⁷ Bamugwarha, bamushurha oku bwoji bw'engorho, ye, mwami wage, ngasi mirhundu yali kuliye, na ngasi byoshi byali muliye; Yoshua arhasizagya kantu, nkonku anajiraga Egloni, anamuhererekeza okurhankaderhwa na ngasi byoshi byali muliye. ³⁸ Yoshua, n'israeli yeshi, bagenda baja e Debiri, banamurhabalira. ³⁹ Bamugwarha, ye, n'omwami wage, n'emirhundu yoshi yali kuliye, babashurha oku bwoji bw'engorho, banabahererekeza okurhankaderhwa na ngasi byoshi byali mwo, buzira kusiga owafumire; Yoshua ajira Debiri n'omwami wage nkoku ajiraga Hebroni n'oku ajiraga Libni na mwami wage. ⁴⁰ Yoshua ashurha ecihugo coshi, entondo, ekagarhi, olubanda, n'entambi, ashurha n'abami boshi; arhasizagya ciru omuntu yeshiyeshi, anahererekeza ngasi yeshi walimwo omuka, nkoku Nnamubaho, Nnamahanga w'israeli anakuderhaga. ⁴¹ Yoshua abashurha kurhangira e Kadesi Barnea kuhika e Gaza, ashurha ecihugo coshi ca Gosheni kuhika e Gibeoni. ⁴² Yoshua arhola agomango abami n'ebihugo byabo, bulya Nnamubaho, Nnamahanga w'israeli, akagi lwira Israeli. ⁴³ Yoshua, n'israeli yeshi haguma naye, bashubira ebwa cihando e Gilgali.