¹ Yabini, mwami w'e Hazozi, amanya eyomyanzi, arhuma embalamwanzi emwa Yobabu, mwami w'e Madoni, n'emwa mwami w'e shimroni, n'emwa mwami w'e Akshafu, ² Emw'abami bali babà enyanya omuntondo, omu cirera, omu kagarhi k'e kinereti, omukabanda, n'omubirhondo by'e Dori ebuzikiro bw'izuba, ³ n'emwa abakanani b'ebushoshokero bw'izuba n'ebuzikiro bw'izuba, n'emwa Abaamori, emwa Abahiti, emwa Abaperezi, emwa Abayebusi omuntondo, n'emwa abahevi edako z'e Hermoni omucihugo c'e Mispa. ⁴ Bahuluka bo n'abalwi b'entambala babo boshi, lwaba lubaga lurhankaganjwa nka mushenyi guli oku cikombo c'enyanja, banaherhe ebiterusi n'endogomi zabo binji bwenene. ⁵ Abola bami boshi bayunvikana ahantu bashimanana, banayishihanda haguma ebwa mishi g'e Meromu, lyo balwisa Israeli. ⁶ Nnamubaho abwira Yoshua: orhabayobohe, bulya irhondo, nkabuno, nabahana boshi bashurhwe embere z'israeli. Washitwa ebiterusi byabo entege, n'okuyoca endogomi zabo. ⁷ Yoshua, ye n'abalya balwi b'entambala boshi, babarhindakwo caligumiza ebwamishi g'e Meromu, baharhira ekarhi kabo. ⁸ Nnamubaho abahira omu maboko g'israeli; babashurha banabashimbulira kuhika e Sidoni Mugali, Kuhika e Misrefoti Maimu, nakuhika elubanda lw'e Mispa ebushoshokero bw'izuba, babashurha, barhasigaga ciru n'omuguma. ⁹ Yoshua abakola nkoku Nnamubaho anali mubwizire; atw'entege z'ebiterusi byabo n'okudulika muliro endogomi zabo. ¹⁰ Erhi akola agalusire, gonago mango, Yoshua agwarha Hazori, ashurha n'omwami wage n'engorho. Hazori burhanzi gwali murhundu mukulu gw'ago Mami goshi. ¹¹ Babashurha oku bwoji bw'engorho banabahererekeza okurhankaderhwa ngasi boshi bali omw'eco cihugo, murhasigalaga ciru akantu kaligwerhe obuzine, banayoca Hazori. ¹² Yoshua arhol'emirhundu yoshi y'abo bami n'abami bayo boshi, anabashurha oku bwoji bw'engorho, n'oku bahererekeza okurhankaderhwa, nkoku anali kurhegesire Musa, mukozi wa Nnamubaho. ¹³ Cikwone Israeli arhayocagya ciru omurhundu oku yali oku birhwa, orhali oyo Hazori yene, ayocirwe na Yoshwa. ¹⁴ Abana b'israeli bacibikira kulibone ngasibyo bahagwire omw'iyo mirhundu yoshi n'ebishwekwa; ci bajabashurha oku bwoji bw'engorho Abantu boshi, kuhika babahungumula, buzira kusiga ciru n'omuguma. ¹⁵ Yoshua ahikiriza ebyalirhegesirwe na Nnamubaho kuli Musa, mukozi wage, na ebya Musa kuli Yoshua, ntahyo aganyagusize kulibyoshi Nnamubaho alirhegesire Musa. ¹⁶ Ntya kwo Yoshua agwasire ecihugo coshi, ebwa ntondo, ekagarhi yoshi, ebwacihugo c'e Gosheni coshi, ebwa lubanda, ebwa ntondo y'israeli n'ebwa birera byage, ¹⁷ kurhondera ebwa ntondo erhalikwo bici eyinamukire e Seiri kuhika e Bali Gadi, omukabanda k'e Libani, edako l'entondo y'e Hermoni. Arhola abami bayo boshi, abashurha anabaniga. ¹⁸ Entambala Yoshua alitugasire kuli abo bami yali ya kasanzi kali. ¹⁹ Harhabaga ciru omurhundu ciru n'omuguma gwajijire omurhula n'abana b'israeli, kulusha na Gibeoni, walilamiremwo abahevi, banayigwarha yoshi omu ntambala. ²⁰ Bulya Nnamubaho alikwire okw'izo mbaga zacinyuguza okulwisa israeli , lyo israeli azihererekeza, buzira okubayunviza obwonjo, n'oku bashereza, nkoku Nnamubaho analikurhegesire Musa. ²¹ Mw'onagomango, Yoshua aheba njira, na ana hererekeza aba Anaki n'oku mushozi gw'e Hebroni, n'e Debiri, n'e Anabu, n'omuntondo yoshi y'e Yuda n'omuntondo yoshi Y'israeli; Yoshua abashereza, n'emirhundu yabo. ²² Harhasigalaga omuntu wa Anaki omu cihugo g'abana b'israeli; basigala e Gaza, e Gati na e Asdodi. ²³ Yoshua agwarha ntyo ecihugo coshi, nkoku byoshi Nnamubaho alibwizire Musa. na Yoshua aciha Israeli nka mwimo, ngasiye n'eryage ishwa, kushimbana emilala yabo. Natyo, ecihugo c'arhamuka na buzinda ntambala.