¹ Yeriko ali muyigale na muhamike embere z'abana b'israeli. Ntaye muntu wakagihuluka, nantaye muntu wakagidaha. ² Nnamubaho abwira Yoshua: lola, mpebire Yeriko n'omwami wage omu maboko gawe, entwali zage z'abasirika. ³ Muzunguluke olugo, mweshi bantu balwi b'entambala, muzunguluke omurhundu liguma, wayishijirantyo lugero lwa nsiku ndarhu. ⁴ Bagula nda bayishishokolera isandaku na mishekera nda ya mahembe ga ngandabuzi; olusiku lw'akalinda, mwayishi zunguluka omurhundu kalinda, n'abagula bayishija babuha emishekera. ⁵ Erhi bakabuha ihembe ly'engandabuzi, erhi mukayunva izu ly'omushekera, olubaga lwoshi lunajire ecihogero cinene. Lero olukuta lwa gulya murhundu lunahirimage, na olubaga lunasokeremwo, ngasimuguma embere zage. ⁶ Yoshua, mwene Nuni, ahamagala abagula, ababwira: mubarhule isandaku ly'endagano, na bagula nda baheke mishekera nda ya mahembe ga ngandabuzi embere ly'isandaku lya Nnamubaho. ⁷ Anabwira olubaga: mulambagire, muzunguluke omurhundu n'abalume badwirh'emiherho baj'embere z'isandaku lya Nnamubaho. ⁸ Erhi Yoshua amabwir'olubaga, bagula nda balifumbasire mishekera nda ya mahembe ga ngandabuzi embere za Nnamubaho barhangira okulambagira n'okubuha emisheheka. Isandaku ly'endagano ya Nnamubaho lyajayisha Enyuma zabo. ⁹ Abalume b'emiherho baja bagenda embere z'abagula bajaga babuh'emishekera, n'abandi balanzi balishimbulire isandaku; okubajabagenda, banabuh'emishekera. ¹⁰ Yoshua ahana er'irhegeko oku lubaga: murhajiraga olubi, murazusagy'amazu ginyu, nantaco cinwa warhengaga omu rhunwa rhwinyu kuhika olusiku namubwira: mujire olubi! Lero munajirage olubi. ¹¹ Isandaku lya Nnamubaho lyazunguluka omurhundu, lyaka guzunguluka liguma omu lusiku; n'okushubira omucihando, banalalemwo. ¹² Yoshua anazukiriza hibungubungu n'abagula babarhwire isandaku lya Nnamubaho. ¹³ Abagula nda balidwirhe mishekera nda ya mahembe g'engandabuzi embere z'isandaku lya Nnamubaho bashokola banaja babuha emishekera. Abantu b'emiherho bajagenda embere zabo, n'enyuma abalanzi bakulikira isandaku lya Nnamubaho, amango g'olugenzi, banaja babuh'emishekera. ¹⁴ Banazunguluka omurhundu liguma, olusiku lw'akabiri; banagaluka omucihando. Bajirantyo nsiku ndarhu. ¹⁵ Olusiku lw'akalinda bazukiriza, hibungubungu, banajira kwonakulya kalinda bazunguluka omurhundu; Olwolusiku luguma lwone bazungulusire omurhundu kalinda. ¹⁶ Obw'akalinda, nkoku abagula banajaga babuha emisheheka, Yoshua abwira olubaga: mujirage olubi, bulya Nnamubaho amuhire omurhundu. ¹⁷ Omurhundu gwaba gwa Nnamubaho oku mwigasho, gwo nangasi byoshi birimwo; cikwone mulekere Rahabu akalamu, eryanduba na ngasi boshi hayishibà bali boshi omunyumpa, bulya afulisire entazi rhwalirhumire. ¹⁸ Mucilange kwone na ngasi coshi cilahizibwe, bulyalira erhi mwankarhola eci mwalahizibwe, mwayishi hira ecihanda c'israeli omu buhanya mubone mwanacilerhera akadali. ¹⁹ Enfaranga zoshi n'amasholo goshi, n'ebirugu by'amarhale n'ebyemiringa byayishiba birherekerwa bya Nnamubaho, byanayishija omu muhako gwa Nnamubaho. ²⁰ Olubaga lwanajira olubi, N'abagula babuha emishekera. Erhi abagula luyunva izu ly'emishekera lwahologoma bwenene, n'olukuta lwana kunduka; olubaga lwasokera omumurhundu, ngasiye embere zage. Bashandala omurhundu, ²¹ Banahererekeza oku ngorho ngasi byoshi byali omurhundu, baluma n'abakazi, bana n'abagikulu, kuhika oku nkafu, bibuzi na ba punda. ²² Yoshua abwira Balyà balume babiri bajagi labiriza ecihugo: mudahe omunyumpa yolya mukazi w'endumba, muhulusemwo oyo mukazi nangasi byage byoshi, nkoku mwana mwigashire. ²³ Ayomisole, zirya ntaazi, banadahamwo n'okuhulusa Rahabu, ishe, nina, benewabo, na ngasi byoshi aligwerhe, bahulusa boshi ab'omu mulala gwage, banabaheba embuga z'ecihando c'israeli. ²⁴ Banadulika omurhundu gwoshi muliro na ngasi byoshi byali mwo; cikwone baheba omu muhako gw'enyumpa ya Nnamubaho Enfaranga, amasholo, n'ebirugu by'amarhale na eby'emiringa. ²⁵ Yoshua alekera Rahabu w'endumba obuzine, enyumpa y'ishe, na ngasi boshi balibokuye, balama omukagarhi k'israeli kuhik'ene, bulya afulisire entaazi Yoshua arhumaga oku bajilabiriza Yeriko. ²⁶ Byanajiragwa nkoku Yoshua anacigashaga, aderha: ahehererwe embere za Nnamubaho omuntu wanaciyimuke mpu alungula guno murhundu gw'eyeriko! owanahebe eciriba aha, afirwe n'enfulayage, na erhi akaheba emihango afirwe n'omuzibo gwage. ²⁷ Nnamubaho aba haguma na Yoshua, olya irenge lyage lya yalagalaga omucihugo coshi.