¹ Erhi abami boshi b'aba Amozi b'ebuzikiro bw'izuba bwa yordani n'abami boshi b'abakanani hofi n'enyanja bamany'oku Nnamubaho anaganyize amishi g'omu yordani embere z'abisraeli kuhika bayikiramwo, bahez'obushibirizi banarhiruka okubona obuzirhu bw'abana b'israeli. ² Agomango, Nnamubaho abwira Yoshua: ocijirire orhwere rhw'ibuye, n'okuciri kembula buhyahya abana b'israeli, obwakabiri. ³ Yoshua anacijirira orhwere rhw'ibuye, n'oku kembula abana b'israeli okumushozi gw'e araloti. ⁴ Alaga ecarhumire Yoshua abakembula. Olubaga lwoshi lwarhengaga emisiri, abalume, abantu boshi balwi b'entambala, baferire omw'irungu, omu lugenzi, Enyuma ly'okurhenga emisiri. ⁵ Olubaga lwoshi lwarhengaga emisiri lwali lukembule; cikwone olubaga lwaburhiragwa omw'irungu, amango g'olugenzi, Enyuma ly'okurhenga emisiri, lurhalisigi kembulwa. ⁶ Bulya abana b'israeli bagenzire myaka makumi gani omw'irungu kuhika oku hererekera kw'olubaga lwoshi lw'abantu balwi b'entambala barhengaga emisiri barhayunvagya okw'izu lya Nnamubaho; Nnamubaho acigashirabo oku arhakaci bayereka ecihugo ali cigashire b'ishe oku arhuhaco, cihugo c'ahulula mwo amarha n'obuci. ⁷ Abana babo bo ahebire ahali habo, naye Yoshua abakembula, bulya barhali bakembule, bulyalira barha bakembuliraga omu lugenzi. ⁸ Erhi baba bamayusa oku kembula olubaga lwoshi, banabera ahabanali omu cihando kuhika bafuma. ⁹ Nnamubaho abwira Yoshua: ene, namukuzire kw'enshonyi zinyu z'emisiri. Nahola hantu hahamagirwe okw'izino lya Gilgali kuhik'ene. ¹⁰ Abana b'israeli, bahanda e Gilgali; banajirirayo olusiku lukulu lwa basaka olusiku lw'ensiku ikumi na zini z'omwezi, omucajingwe, omumbanda z'eyeriko. ¹¹ Balyà engano y'omucihugo lisirhondo lya basaka, emigati erhalimwo ngeso n'emogomogo nkalange; babirya Lwon'olwo lusiku. ¹² Amana ganahwa lusiku luguma enyuma lya basaka, erhi banalya oku ngano y'omweco cihugo; abana b'israeli barhacibonaga amana, n'ogwomwaka Balyà emburho y'omu kanani. ¹³ Nkokwo Yoshua alikola ali hofi n'eyeriko, ayinamula amasu, analola. Sinza, mulume muguma anayimanga embere zage, n'engorho yage erhali omu lubarhi omu maboko. Aj'emundali, amubwira: k'oli wirhu erhi was bashombanyi birhu? ¹⁴ Ashuza: nanga, cikwone ndi mukulu w'abasirika ba Nnamubaho, yishire buno.Yoshua ahirima bubi emalanga gage, afukama, amubwira: bici Nahamwirhu adesire emw'omukozi wage? ¹⁵ N'omukulu w'abasirika ba Nnamubaho abwira Yoshua: ohogole enkwera zawe omu magulu gawe, bulya ahantu oyimanzire hali himana. Na Yoshuaajirantyo.