¹ Erhi abagula lwoshi luba lwamayusa okuyicira yordani, Nnamubaho abwira Yoshua: ² orhole balume ikumi na babiri omu lubaga, mulume muguma omu ngasi buko. ³ Obahe lino irhegeko: murhole muno kagarhi ka yordani, ahantu abagula baliyimanzire, mabuye ikumi na gabiri, go mwaheka mweshi munagayise aha mwalala omw'obu budufu. ⁴ Yoshua ahamagala balya bimangizi ikumi na babiri alondolaga omu lubaga lw'israeli, mulume muguma wa ngasi buko. ⁵ Ababwira: muj'embere z'isandaku lya Nnamubaho, Nnamahanga winyu, omukagarhi ka yordani, na ngasi muguma winyu abarhule ibuye liguma okucirhugo cage, nkoku omubale gw'abuko bw'israeli, ⁶ Lyo eci ciba cimanyiso egarhi kinyu. Erhi abana binyu bakamudosa: bici agamabuye badesire kulimwe? ⁷ Mwanayishi babwira: amishi ga yordani gayimanzibwe embere z'isandaku ly'endagano ya Nnamubaho, erhi lyayikira yordani, amishi ga yordani gayimanga, Nagano mabuye hayishibà nkengezo oku israeli. ⁸ Abana b'israeli bajira ebi Yoshua abarhegekaga. Bayimusa mabuye ikumi na gabiri omukagarhi ka yordani, nkoku Nnamubaho abwira Yoshua. Nkoku emibale y'obuko bw'abana b'israeli, bagagendana, bagayisa ahantu balazire. ⁹ Yoshua akereka gandi mabuye ikumi na gabiri omukagarhi ka yordani, haly'amagulu g'abagula balibarwir isandakuly'endagano galiyimanzire; ho ganasigire kuhik'ene. ¹⁰ Abagula balibarhwire isandaku gayimanga omu kagarhi ka yordani kuhika okuhikirira kwa byoshi Nnamubaho alirhegesire Yoshua abwira olubaga, kushimbana byoshi Musa alirhegesire Yoshua. N'olubaga lwa harhulira okuyicira. ¹¹ Erhi olubaga lwoshi luba lwamayicira, isandaku lya Nnamubaho n'abagula bager'embere z'olubaga. ¹² Bene Rubeni, bene Gadi n'ecihimbi c'obuko bwa Manasi barhaluka n'emiherho embere w'israeli nkoku Musa anali babwizire. ¹³ Lugero lwa bantu bihumbi makumi gani, balihagarhizize emiherho y'entambala banacirheganyize okulwa, bagera embere za Nnamubaho omundekera z'eyeriko. ¹⁴ Olwolusiku Nnamubaho atugika Yoshua omumasu g'abisraeli boshi, nabo bamuyoboha nkoku bayobohaga Musa, ensiku zoshi z'akalamu kage. ¹⁵ Nnamubaho abwira Yoshua: ¹⁶ Orhegeke abagula balibarhwire isandaku ly'obuhamirizi barhenge omu yordani. ¹⁷ Na Yoshua ahana er'irhegeko oku bagula: rhengagi omu yordani. ¹⁸ Erhi abo bagula balibarhwire isandaku ly'endagano ya Nnamubaho bababamarhenga omu yordani, n'erhi enshando zabo zinalabarha oku cikombo, amishi ga yordani gashubira ahagali, n'okulumira nkoku byanali oku bikombo byoshi. ¹⁹ Olubaga lwarhenga omu yordani olusiku lwakalikumi lw'omwezi murhanzi, banahanda e gilgali, oku lubibi lw'ebushoshokero bw'izuba bw'eyeriko. ²⁰ Yoshua akereka aha gilgali galya mabuye ikumi na gabiri barholaga omu yordani. ²¹ Abwira abana b'israeli: amango abana binyu banadose bishe lusiku luguma: kwokuderha gurhi gano mabuye? ²² Mwanabiyigirize abana binyu, mwayishiderha: Israeli ayikire omu yordani buzira kuloba. ²³ Bulya Nnamubaho, Nnamahanga winyu, aganyize emalanga ginyu amishi ga yordani guhika mwayikira nkoku Nnamubaho, Nnamahanga winyu, ajiraga oku nyanja ndukula, ayiganyize embere zirhu kuhika rhweshi rhwayikira, ²⁴ lyo ngasi mashanja goshi g'omwigulu gamanya oku okuboko kwa Nnamubaho kuli kwa buhashe, lyo mukayorha mwayoboha Nnamubaho, Nnamahanga winyu.