¹ Yoshua, azuka sezisezi, agenda e shitimu boshi n'abana b'israeli. Bahik'e yordani, bayilala, embere bayikire. ² Enyuma lya nsiku zisharhu, abarhambo bageragera omucihando, ³ bahana er'irhegeko oku lubaga: erhi mukabona isandaku ly'endagano ya Nnamubaho, Nnamahanga winyu, libarhwirwe n'abagula, b'abalawi, mwayishirhenga ahamuli, na mwanayishi likulikira. ⁴ Cikwone hayishibà egarhi kinyu nalyo lugero lwa makano bihumbi bibiri: murhajaga mwaliyegera. Lyayishija lyamuyereka enjira mwashimba, bulya murhasagi gera omw'eyo njira. ⁵ Yoshua abwira olubaga: mucicese bulya irhondo Nnamubaho ajira ebirhangaza egarhi kinyu. ⁶ Na Yoshua abwira abagula: mubarhule isandaku ly'endagano munashokolere olubaga. Babarhula isandaku ly'endagano, n'oku genda embere z'olubaga. ⁷ Nnamubaho abwira Yoshua: ene, narhondera nakuyinamula embere z'abisraeli boshi, lyo bamanya oku nayishibà haguma nawe nkoku nanali haguma na Musa. ⁸ Oyishi hana er'irhegeko oku bagula babarhwire isandaku ly'endagano: erhi mukahika oku cikombo c'amishi ga yordani, munayimange omu yordani. ⁹ Yoshua abwira abana b'israeli: muyegere, munayunvirhize emyanzi ya Nnamubaho, Nnamahanga winyu. ¹⁰ Yoshua aderha: kulyuku mwayishirhenga oku Nnamahanga ozine ali ekagarhi kinyu, n'oku ayishi hinva embere zinyu abakanani, abahiti, abahivi, abaperesi, abagirigasi, abaamori, n'abayebusi: ¹¹ alagi, isandaku ly'endagano ya Nnamubaho w'igulu lyoshi lyagera embere zinyu omu yordani. ¹² Ntya, murholage balume ikumi na babiri omu buko bw'israeli, mulume muguma omu ngasi buko. ¹³ N'erhi abagula babarhwire isandaku lya Nnamubaho, Nahamwirhu w'igulu lyoshi, ehi enshondo zabo zikanalabarha omu mishi ga yordani, amishi ga yordani gayishi yimanga, amishi bakagi hulula gacigusha haguma. ¹⁴ Olubaga lwanahuluka omu mahema gabo n'okugenda eyordani, n'abagula bali barhwire isandaku ly'endagano bashokolera olubaga. ¹⁵ Erhi abagula balibarhwire isandaku bahika eyordani, n'erhi amagulu gabo galoba oku cikombo, yordani anaka yunjula arhaluke ebikombo byage amango g'okusarhula, ¹⁶ amishi garhenzire enyanya gayimanga, gayunjulira okubà ntula oku makano mali bwenene, hofi n'omurhundu gwa Adamu, guli eburhambi bwa tsartani; n'agakagi yandagalira omu nyanja y'omucirera, nyanja ya munyu, goshi gayimanzibwa lwoshilwoshi. Olubaga lwayicira ishiriza ly'eyeriko. ¹⁷ Abagula balibarhwire isandaku ly'endagano ya Nnamubaho bayimanza amagulu gabo ahakazire, omukagarhi ka yordani, erhi Israeli yeshi ayicira ahakazire, kuhika olubaga lwoshi lwayusa lwayicira omu yordani.