¹ Kurhenga mira Nnamubaho ahire Israeli oluhuma, omukubalikuza n'abashombanyi boshi bali bazungulusire. Yoshua alikola mushosi, was myaka minji. ² Lero Yoshua ahamagala Israeli yeshi, abajinji bage, abarhambo bage, abatwi b'emanja bage, n'abimangizi bage. Ababwira: nkola mushosi, nkolandi wa myaka minji. ³ Mwabwine ngasibyoshi Nnamubaho, Nnamahanga winyu ajijire kuli olu lubaga lwoshi embere zinyu; bulya Nnamubaho, Nnamahanga winyu, ye wamulwirire. ⁴ Lolagi, namuhire omwimo oku cigole, kushimbana obuko bwinyu, ezi mbaga za sigalaga, kurheng'eyordani, n'embaga zoshi naniguzagya kuhika oku nyanja nene ebwa buzikiro bw'izuba. ⁵ Nnamubaho, Nnamahanga winyu, abasunsunika embere zinyu n'okubahinva embere zinyu; naninyu mwayishigwarha ecihugo cabo, nkoku Nnamubaho, Nnamahanga winyu anamubwizire. ⁶ Mucihangane bwenene oku kenga ngasibyoshi biri biyandike omucita c'amarhegeko ga Musa, buzira kuhindamukira ekulyo erhi ekumosho. ⁷ Murhacigushaga n'ezo mbaga zasigalaga mulimwe, murhakazigi derha amawino gaba mungu wabo, murhana gakolesagya omukucigasha; murhabakoleraga ciru, murhana fukamaga emalanga gabo. ⁸ Ci mucishwekere kuli Nnamubaho, Nnamahanga winyu, nkoku mwanakujijire kuhik'ene. ⁹ Nnamubaho ahinvire embere zinyu mashanja manji na ga burhwali; na ntamuntu, kuhik'ene, wacimusharirekwo. ¹⁰ Muguma winyu akagi libisa cihumbi ciguma; bulya Nnamubaho, Nnamahanga winyu, akagimulwira, nkoku anamubwiraga. ¹¹ Mulalire bwenene oku murhima yinyu, lyo muzigira Nnamubaho, Nnamahanga winyu. ¹² Erhi mwakahindamuka n'okucishwekera kuli zirya mbaga zasigalaga ziciri omugarhi kinyu, erhi mwakacigusha haguma nabo okunjira z'obuhya, na erhi mwankajira olushange nabo, ¹³ mube mumanyirire oku Nnamubaho, Nnamahanga winyu, arhakagenderera ahinva ezo mbaga embere zinyu; cikwone zayishiba kulimwe kasà na murhego, garhi omu nkanga zinyu na mishugi omu masu ginyu, kuhika muyishi linda muhererekera omw'eci cihugo cinja Nnamubaho, Nnamahanga winyu, amuhaga. ¹⁴ Lolagi, Nkolaga nagenda omunjira y'igulu lyoshi. Mumanyirire oku mirhima yinyu Yoshi na oku buzine bwinyu bwoshi oku ntaco muli ebinwa binja byoshi Nnamubaho amuderhire, Nnamahanga winyu, birhahikiriraga; byoshi byahikirire kulimwe. ¹⁵ Na nkoko ngasi binwa binja Nnamubaho, Nnamahanga winyu amubwiraga byajirikine kulimwe, kwonokwo Nnamubaho ayishi hikiriza ngasi binwa bibi byoshi, kuhika ayishi muhererekeza kuhika obuzinda muli cino cihugo cinja Nnamubaho, Nnamahanga winyu, amuhaga. ¹⁶ Erhi mwaka yanga endagano ya Nnamubaho, Nnamahanga winyu, amurhegesire, n'erhi mwanka jikolera eyindi myungu n'oku kacikumba emalanga gabo, oburhe bwa Nnamubaho bwanayishi zuka kulimwe, naninyu mwayishi hererekera dubaduba muli cino cihugo amuhaga.