¹ Lero Yoshua ahamagala bene Rubeni, bene Gadi n'ecihimbi c'obuko bwa Manasi. ² Ababwira: mwakenzire byoshi Musa analimubwizire, mukozi wa Nnamahanga, mwanakenzire izu lyani omu ngasi byoshi namurhegesire. Murhaciberulaga kuli benewinyu kurhangira mango mali kuhika buno; mwakenzire amarhegeko, n'amahano ga Nnamubaho, Nnamahanga winyu. ⁴ Ntya lero Nnamubaho, Nnamahanga winyu, arhamusize benewinyu, nkoku anali babwizire, mugalukage munashubire omu bihando binyu, omucihugo cikola ciba cinyu, n'eci Musa, mukozi wa Nnamubaho amuhaga ishiria ly'eyordani. ⁵ Mulolereze kwone n'okujira ebi mwabwizirwe omumarhegeko mwahabirwe na Musa, mukozi wa Nnamubaho: musime Nnamubaho, Nnamahanga winyu, mugende omunjira zage, mukenga amarhegeko gage, mucishwekere kuliye, munamukolere oku mirhima yinyu yoshi n'oku buzine bwinyu bwoshi. ⁶ Na Yoshua abgisha anabashubiza emwababwe. ⁷ Musa alihire ecihimbi c'obuko bwa Manasi omwimo e Bashani, na Yoshua ahana oku Cindi cihimbi omwimo gwa benewabo olunda ly'ebwa yordani, ebuzikiro bw'izuba. Erhi Yoshua abagalula ebwa bihando byabo abagisha, ⁸ abawira: mwayishi shubira ebwa bihando binyu nabugale bunene. Na buso bunene bwa bishwekwa, nfaranga nyinji, masholo, amarhale, miringa, n'emishangi. Mugabe mwe na benewinyu empira z'abashombanyi binyu. ⁹ Bene Rubeni, bene Gadi, n'ecihimbi c'obuko bwa Manasi, bagaluka, erhi haha bamasiga abana b'israeli e shilo, omucihugo c'ekanani, bagenda omucihugo c'e galadi, co calicabo n'eyo yo baliyubasire nkoku Nnamubaho anakubwizire Musa. ¹⁰ Ehi baba bamahika omunciga z'eyordani olunda lw'ecihugo c'ekanani, bene Rubeni, bene Gadi n'ecihimbi c'obuko bwa Manasi, bayubaka y'oluhero lugali kuhika lwaka simisa amasu. ¹¹ Abana b'israeli bayunva oku balibaderha: alagi, bene Rubeni, bene Gadi n'ecihimbi c'obuko bwa Manasi, bayubasire oluhero hofi n'ecihugo c'ekanani, omu nciga z'eyordani, eburhambi bw'abana b'israeli. ¹² Erhi abana b'israeli bayunvantyo, embuganano yoshi y'abana b'israeli bacigusha e shilo, lyo babarhabalira n'okuji balwisa. ¹³ Abana b'israeli barhuma emwa bene Rubeni,bene Gadi, n'ecihimbi c'obuko bwa Manasi, omucihugo ca galadi, Fineasi mugala w'omugula Eliazari, ¹⁴ na barhwali ikumi haguma naye, murhwali mugumamuguma omu ngasi buko bw'abana b'israeli, boshi bali barhambo b'enyumpa za b'ishe muli ebyo bihumbi by'abisraeli. ¹⁵ Banaja emwa bene Rubeni, bene Gadi, n'ecihimbi c'obuko bwa Manasi, omucihugo ca galadi, bababwira omwanzi, baderha: ¹⁶ Embuganano ya Nnamubaho ntya kw'edesire: kulikuderha gurhi oku kubula obwikubagire okumwajijire emwa Nnamubaho w'israeli, na bulyagurhi mwahindamusire kuli Nnamubaho omukuciyubakira oluhero mpulyo mugomera Nnamubaho? ¹⁷ Rhucilolekwo hitya oku maligo ga Peori, kuhik'ene rhurhasigi rhenza ishembo lyabyo, ciruakaba obuhane byahizire oku nshimanano ya Nnamubaho? ¹⁸ Ene mwoyu mucihindwire kuli Nnamubaho! Mukacihindula kuli Nnamubaho ene, irhondo abera Israeli yeshi burhe. ¹⁹ Erhi akaba mucirhozire nka cibi ecihugo cinyu, muyicire muje omucihugo ca Nnamubaho, mwomuli aha Nnamubaho ashigirwa, mubarhule mwo, ci Murhaciberulaga kuli Nnamubaho murhanaciberule kulirhwe, omukuciyubakira oluhero, lurhali lwa Nnamubaho, Nnamahanga wirhu. ²⁰ Akana, mwene Zerashi, k'arhajiraga ebirhashinganini enyana z'ebintu byali lahizibwe, n'oku burhe bwa Nnamubaho burhayakaga oku mbugananano yoshi y'israeli? Karhali yene wanayishiri hererekera enyana ly'obubi bwage. ²¹ Bene Rubeni, bene Gadi, n'ecihimbi c'obuko bwa Manasi, bashuza abarhambo ba birya bihumbi b'israeli: ²² Nnamahanga, Nnamahanga, Nnamubaho, Nnamahanga, Nnamahanga, Nnamubaho akumanyirire, na Israeli ayishi kumanya! Erhi akaba oku bugoma na erhi ebwa kurhacikubagirwa kuli Nnamubaho, arhayishe ali rhurhabala kuli lunolusiku lw'ene. ²³ Erh'akaba rhwaciyubakire oluhero lyo rhucihindula kuli Nnamubaho, erhi akaba ebwa kukalerhakwo enterekero z'okusiriza n'entulo, n'erhi ankaba kukarhulirakwo entulo z'omurhula, Nnamubaho arhuhanire byo. ²⁴ N'obwo, obwoba bwarhumaga rhajirantyo, rhwarhanya nti hanacibe lusiku luguma abana binyu bayishi bwira abana birhu: lushange luci mujira na Nnamubaho, Nnamahanga w'israeli? ²⁵ Nnamubaho ahebire yordani nka lubibi ekagarhi kirhu na ninyu, bene Rubeni na bene Gadi; murhagwerhi lushange na Nnamubaho! Nantyo abana binyu banayishibà cihanzo oku banabirhu okurhakenga Nnamubaho. ²⁶ Cocarhumire rhwaderha: rhuyubake luhero luguma, lurhali lwa kukarhulirakwo nterekero za kusiriza na enshushagize, ²⁷ cikwone nka muhamirizi muguma kulimwe na nirhu, kuli enkulikanyo z'iburha lirhu n'elinyu, okurhulonzize rhukolere Nnamubaho emalanga gage oku nterekero zirhu z'okusiriza n'ezindi nterekero z'ebyaha, n'enterekero z'omurhula, lyo abana binyu barhaki yishibwira abirhu lusiku luguma: murhagwerhi lushage kuli Nnamubaho! ²⁸ Rhwadesire ntya: erhihankayishibà omumango gayishe enderho zantya kulirhwe erhi kuli enkulikanyo y'abana birhu, rhanayishi shuza: alagi enshusho y'oluhero lwa Nnamubaho balarha wirhu bajiraga, c'arhali kuderha mpu kerherekererakwo enterekero z'okusiriza n'ez'oku shushagiza, cikwone nka buhamirize kulirhwe naninyu. ²⁹ Hali nanirhu entanya z'okuciberula kuli Nnamubaho n'oku cihindula ene kuliye, omukuyubaka oluhero lw'enterekero z'okusiriza, n'enterekero z'oku shushagiza, n'enterekero z'omurhula, kulusha oluhero lwa Nnamubaho, Nnamahanga wirhu, luli embere z'ahashigirwa! ³⁰ Erhi omugula Fineasi, n'abarhwali b'embuganano, abarhambo b'ebihumbi b'israeli, baliboshi naye, bayunva emyanzi badesire bene Rubeni, bene Gadi na bene Manasi barhimukwa. ³¹ Na Fineasi, mwene omugula Eliazari, abwira bene Rubeni, bene Gadi na bene Manasi: rhumanyirire lero oku Nnamubaho ali haguma nirhu, bulya murhajijire bubi kuli Nnamubaho, mwalikuzize abana b'israeli omu maboko ga Nnamubaho. ³² Fineasi, mugala w'omugula Eliazari, na balya barhwali, barhenga emwa bene Rubeni na bene Gadi, n'okushubira omucihugo c'egaladi omu kanani, emw'abana b'israeli, bobajagi lambulira omukolo. ³³ Abana b'israeli barhimukwa; bakuza Nnamahanga, na barhanaci derhaga oku baciyinamuka n'emiherho okuji shandaza ecihugo ca bene Rubeni na bene Gadi. ³⁴ Bene Rubeni na bene Gadi bayirika olwo luhero Edi, bulya, baderha, buli buhamirize kulirhwe oku Nnamubaho ali Nnamahanga.