¹ Yoshwa ashimamanyanya e milala yoshi ya b'israheli e Shikemu, ahamagala abashoshi b'israheli, abashamuka, abazuzi n'abarhambo babo. Banayisha e mbere za Nnamahanga. ² Yoshwa abwira olubaga loshi: Ntya kwa desire Nnamubaho, Nyamuzinda w'israheli: Basho, Tera, ishe wa Abrahamu, n'ishe wa Nahori, mira bayubakaga olundi lunda lw'enyanja bakagi kolera abandi ba mungu. ³ Narhenziza sho winyu Abrahamu olw'olwindi lunda lw'enyanja, namugeza mucihugo coshi ca Kanani; naluza ibra lyage namuha Isaki. ⁴ Isaki namuha Yakobo na Esau; Esau namuha ahage e ntondo ye Seiri, cikwone Yakobo, n'ibra lyage baje e Misri. ⁵ Narhumire yo Musa na Aruni. Na nashurha misri na amahanya gangasi lugero nakagi kolesa omu kagarhi kabo; buzinda narhenza yo olubaga lwinyu. ⁶ Namarhenza basho e Misri, bahika oku nyanja. Aba Misri bakulikira basho kuhika oku nyanja ndukala, n'engale n'e farasi. ⁷ Basho banalakira Nnamubaho. Na Nnamubaho ahira omwizizi e kagarhi kabo n'ab'e Misri; abalerha ab'e Misri abahonda kw'enyanja, nayo yabafunika. Amasu ginyu gabwine ebinakolire aba e Misri. N'omw'irunga mwabezire mwo nsiku nyinji. ⁸ Namuheka omu cihugo ca Aba Amori, bayubakaga olundi lunda lw'e Yordani, bamulwisa. Nabaheba omu maboko ginyu. Mwanyaga e cihugo cabo, boshi nabamalira embere zinyu. ⁹ Balaki mwene Sipori, mwami w'e Moabu, ayimuka mpu alwisa Israheli. Ahamagala Balamu mwene Beori, mpu abaheherere. ¹⁰ Ci ntalozangya okumuyunva Balamu; amagisha, na ntyo na murhenza omu maboko gage. ¹¹ Mwanayikira e Yordani mwanahika e Yeriko. Abantu b'e Yeriko bamulwisa, n'aba Amori, n'aba Perisi, n'aba Kanani, n'aba Yebusi, aba Gigasi, n'Abahivi; n'abaheba omu maboko ginyu, ¹² na nabarhumira e nyisibo, nazo zabahinva embere zinyu, nka balya bami babirhi b'aba Amori: Na kuliko, orhakolesagya ciru engorho yawe, ciru omuherho gwawe. ¹³ Nnana muha ecihugo murha hingaga, emirhundu murha yubakaga yo y'eyi mukola muyubasire mwo, mwarhola amashwa g'emizabibu, n'agemizetuni, eyi murha rhweraga, yeyi egwerhe yamuha ebilyo. ¹⁴ Kuziga mugwasiragwe muyobohe, mukenge Nnamubaho, muka mukolera kulya kunashinganine, kunali kw'okuli. Murhenze abandi- ba mungu basho bakagi kolera olundi lw'ishiriza lw'enyanja n'amango bali e Misri, mukolere Nnamubaho yene. ¹⁵ N'akaba mubwine oku kuli kubi oku kolera Nnamubaho mulondolo ene oyu mwa kakolera, babe balya ba mungu basho bakagikolera, bakagi bahera ishiriza ly'enyanja, erhi babe ba mungu b'aba Amori, aba mukola muyubasire ecihugo cabo. Niono n'enyumpa yani rhakolera Nnamubaho. ¹⁶ Ntamango rhwankaleka Nnamubaho mpu rhugendi kolera abandi ba mungu, ¹⁷ bulya Nnamubaho ye Nnamuzinda wirhu; ye warhurhenzagya omucihugo ce Misri, omu nyumpa y'obuja, rhwene na balarha; ye wajagajira birya birhangaza byoshi omu masu girhu yene anaja arhulanga mulya njira yoshi rhwajaga genga, muli zirya mbaga rhwajaga agera mwo. ¹⁸ Ahinva embere zirhu embaga zoshi, n'aba Amori babaga omw'eci cihugo. Nirhu Nnamubaho yene ye rhwana kolera, bulya yene ye Nnamahanga wirhu. ¹⁹ Yoshwa abwira olubaga: Murhankahasha okukolera Nnamubaho, bulya aba Nnamubaho ocire, aba Nnamahanga mwagalwa, arha babalire amabi ginyu n'ebyaha binyu. ²⁰ Erhi mukaleka Nnamubaho na mukakolera aba bandi ba mungu b'emahanga, ashubi muhana, amuyirhe erhyanali amu anamujirira aminja. ²¹ Olubaga lwabira Yoshwa: Nanga! Bulya Nnamubaho rhwakolera. ²² Yoshwa abwira olubaga: Mwene mwahibera badima nk'okwo mudesire mpu mucishozire oku kolera Nnamuzinda. Bamushuza erhi: Rhuyemire rhuli badima. ²³ Murhenze ba-nnamahanga b'ahandi bali omu karhi kinyu, n'emirhima yinyu muyiyerekeze Nnamubaho, Nnamuzinda w'Israheli. ²⁴ Olubaga lwabwira Yoshwa mpu: Rhwakolera Nnamubaho, Nnamuzinda wirhu, n'izu lyage lyone rhwakakenga. ²⁵ Olusiku Yoshwa aheba olubaga omu ciragane aha Sikemu, abaha- amarhegeko n'amahano bashimba. ²⁶ Yoshwa ayandika ebyo binwa byoshi bashuzagya omu citabu c'amarhegeko ca Nnamahanga. Arhola ibuye linene, aligwika omw'idaho ly'omurhi gwali hofi na hantu hacire ha Nnamubaho. ²⁷ Yoshwa abwira olubaga lwoshi erhi: Loli er'ibuye liri budima bwirhu, bulya lya yunvirhe birya binwa byoshi Nnamahanga arhubwiraga, lyamubera mudima, lyo murhagihinduka muleke Nnamahanga wirhu. ²⁸ Enyuma ly'ebyo Yoshwa abasengeruka, ngasi baguma bashubira omu cihugo bali babahire. ²⁹ Enyuma ly'ebyo, Yoshwa mwene Nuni, mwambali wa Nnamubaho, afa, erhi agwerhe miaka igana n'ikumi. ³⁰ Bamubisha omu cihugo cage ali ahabirwe ce Timnati- Seraki, omu ntondo ye Efraimu olunda lw'enyanja lw'entondo Gaashi. ³¹ Israheli akolera Nnamubaho Bwinja, amango Yoshwa acihali goshi, ciru n'amango goshi g'abashosi balilamire enyuma z'okufa kwa Yoshwa, balya bali manyire emikolo yoshi Nnahamwirhu ajirire Israheli. ³² Ebivuha bya Yozefu, bene Israheli bali dwirhe kurhenga e Misri, bayibisha eyo Shekemu omw'ishwa Yakobo agulira bene Hamori, ishe wa Sikemi, oku ngulo ya nfaraga igana; byana ciba mwimo gwabene Yusufu. ³³ Eliazari mukulu wa Haroni afa bamubisha aha Gibeya lugo lw'omugala Finehasi, ye wali aluhirwe omu ntondo ya Ifraimu.