¹ Entimanano yoshi y'abana b'israeli barhimanana e Shilo, bahebayo ihema ly'okurhimanana. Ecihugo cali oku burhegesi bwabo. ² Halisigire buko nda bw'abana b'israeli harhali cihabwa ogwabo mwimo. ³ Yoshua abwira abana b'israeli: guhika mangaci mwayoloha okugwarha ecihugo Nnamubaho, Nnamahanga wa ba sho amuhaga? ⁴ Mulondole bantu basharhu omu ngasi buko, na nabarhuma. Bayishizuka n'okugera omucihugo, bajire omuhigo gw'okugaba, na bashubire emundandi. ⁵ Bayishi cigaba bihimbi nda; Yuda ayishijira omumbibi zage ekagarhi, na enyumpa ya Yusufu hayishibà omumbibi enyanya. ⁶ Mwe lero, mwabera ecihugo bihimbi nda, munabanderhere hano. Nayishi bakwebera ecigole embere za Nnamubaho, Nnamahanga wirhu. ⁷ Cikwone harhabe ecigabi c'abalawi egarhi kinyu, bulya ecikono ca Nnamubaho two mwimo gwabo; Gadi, Rubeni, na ecihimbi c'obuko bwa Manasi bahabirwe ogwabo mwimo, gulya Musa, mukozi wa Nnamubaho abahaga ishiriza ly'e Yordani e bushoshokero. ⁸ Amango abobantu bazukaga okujira omuhigo gw'okugaba ecihugo, Yoshua abana er'irhegeko: mugende, mugere omucihugo, mucape omuhigo, na mushubire emundandi, nani namujirira ecigole embere za Nnamubaho e Shilo. ⁹ Abobantu banagenda, bagera omucihugo, banacigabana kushimbana emirhundu, bigabi nda, na baheba omucitabu bashubira emunda Yoshua ali om'ikampi e Shilo. ¹⁰ Yoshua abayeshera ecigole e Shilo embere za Nnamubaho, na agabira abana b'israeli ecihugo, omukuha ngasimuguma ecigabi cage. ¹¹ Ecigole cahirimira obuko bw'abana ba Benyamini, kushimbana emilala yabo, na ecigabi cabahirimire oku cigole calibibikinwe na bene Yuda na bene Yusufu. ¹² Olunda lw'enyana olubibi lwabo lwali rhonderire oku Yordani. Lwaliyinamusire enyanya ly'e Yeriko, lwagera omuntondo kuyerekera ebuzikiro okw'irungu ly'e Beti Aveni. ¹³ Lwali gezire eburhambi lya Luzu, omugarhi ka Luzu, talk Beteli, na lwalihonosire e Ataroti Adari omuntondo eri omu kagarhi ka Beti Horoni edako. ¹⁴ Oluhande lw'ebuzikiro, olubibi lwali kululusire na okuzunguluka ekagarhi kurhangira omuntondo eri ishiriza lya Beti Horoni; lwanagendekera ekagarhi, na kuhika e kiriati Baali, oli Kiriati Yearimu,murhundu gwa bene Yuda. Yali eluhande lw'ebuzikiro. ¹⁵ Oluhande lw'idaku lwalirhangirire oku lubibi na Kiriati Yearimu. olubibi lwali kululusire oluhande lw'ebuzikiro kuhika oku nshoko y'amishi ga Neftoashi. ¹⁶ Lwalihonosire oku lubibi n'entondo yali ishiriza lya Bene Hinomu, omulubanda lw'e Refaimu enyanya, okulubibi lw'idako ly'abayebusi, kuhika e Ene Rogeli. ¹⁷ Lwaliyerekire enyanya e Ene Shemeshi, nakandi e Geliloti, yali ishiriza ly'omushozi gw'e Adumimu, na lwalihonosire okw'ibuye Bohane, mwene Rubeni. ¹⁸ Lwaligezire oku lubibi lw'enyanya ishiriza ly'e Araba, lwayandagala e Araba. ¹⁹ na kugendekera oku lubibi lw'enyanya lya Beti Holga, kuyulubukira oku lulimi lw'enyanya lw'enyanja y'omunyu, oluhande lw'enshalalo ya Yordani ekagarhi. Olwo lwali lubibi lw'idaku. ²⁰ Oluhande lw'ebushoshokero, Yordani walijijre olubibi. ogwo gwo gwali mwimo gwa bene Benyamini, kushimbana emilala yabo, na embibi z'enyunda zoshi. ²¹ Emirhundu y'obuko bwa bene Benyamini, kushimbana emilala yabo, yali: Yeriko, Beti Holga, Emeki Ketsite. ²² Beti Araba, Tsemaraimu, Beteli, ²³ Avimu, Para, Ofra, ²⁴ Merari, Amonai, Ofni, na Gibea; mirhundu ikumi n'ibirhi, n'enciga zayo. ²⁵ Gabaoni, Rama, Beeroti, ²⁶ Mispa, Kefira, Mosa, ²⁷ Rekemu, Yipele, Tereala, ²⁸ Sela, Elefe, Yebusi, yeri Yerusalemu, Gibeati, na Kiriati; mirhundu ikumi n'ini n'enciga zayo. ogwo gwo gwali mwimo gwa bene Benyamini, kushimbana emilala yabo.