¹ Ecigabi cahirimire obuko bwa Manasi oku cigole, bulya ye wali muburhwa waburhanzi wa Yusufu. Makiri, nfula ya Manasi na ishe wa Galadi, ahabirwe Galadi na Bashani, bulya ali mulwi wa ntambala. ² Bahana oku cigole ecigabi okubandi bana bene Manasi, kushimbana emilala yabo, oku bene Abiezeri, oku bene Heleki, oku bene Asrieli, oku bene Sishemu, oku bene Heferi, oku bene Shemida: abo bo bana barhabana ba Manasi, mwene Yusufu, kushimbana emilala yabo. ³ Selofeadi, mwene Heferi, mwene Galadi, mwene Makiri, mwene Manasi, arhaburhaga murhabana, cikwone aburha abanyere n'amazino gabo: Mashla, Noa, Holga, Milka na Tirsa. ⁴ Bayisha embere z'omugula Eliazari, embere za Yoshua, mwene Nuni na embere z'abarhwali, omukuderha: Nnamubaho alibwizize Musa oku arhuhe ogwirhu mwimo omu benewirhu. Na banabahagwo kushimbana irhegeko lya Nnamubaho, mwimo muguma omu bana ba b'ishe. ⁵ Bihimbi ikumi byahirimira Manasi, kuleka ecihugo can Galadi na Bashani, biri ishiriza lya Yordani. ⁶ Bulya bali Manasi bahabwa omwimo omu benewabo, na ecihugo can Galadi cali c'abandi bene Manasi. ⁷ Olubibi lwa Manasi lwalihisire e Asere Mikmetati, eri hofi n'e Shekemu, na kugera e Yamini oluhande lw'abikala be Antapushi. ⁸ Ecihugo c'e Tapuashi cali ca bene Manasi, cikwone Tapuashi oku lubibi lwa Manasi ali wa bene Efrahimu. ⁹ Olubibi lwalihonosire oku lwishi lw'e Kana, omukarhi k'olwishi. Eyi mirhundu yali ya Efrahimu, omukagarhi k'emirhundu ya Manasi enyana lw'olwishi kuhika oku nyanja. ¹⁰ Ecigabi c'ekagarhi cali ca Efrahimu, ecenyanya cali ca Manasi, na enyanja lwali lubibi; balihisire e Asheri oluhande lw'enyanya, na kuli Isakari e bushoshokero. ¹¹ Manasi aligwerhe muli Isakari na kuli Asheri: Beti Sheani n'emirhundu yage, Yibleamu n'emirhundu yage, Abikala b'e Dori n'emirhundu yage, abikala be Taanaki n'emirhundu yage, bihugo bisharhu. ¹² Bene Manasi barhahashaga okugwarha eyo mirhundu, na abakanani nalilonzize babere omucihugo. ¹³ Amango abana b'israeli bagwasire oburhwali, barhegeka abakanani oku buko buguma, ci barhabahinvaga. ¹⁴ Bene Yusufu babwira Yoshua, banaderha: bulyagurhi warhuhire mwimo muguma? cigabi ciguma, nobwo rhuligi lubaga munene na oku Nnamubaho arhugishire kuhik'ene? ¹⁵ Yoshua ababwira: nkaba muli lubaga lunene, muyinamuke emuzirhu, mukube emirhi mugalihye obulambo omucihugo c'aba Peresi na Refaimu, Bulya entondo ya Efrahimu eri nsungunu kulimwe. ¹⁶ Bene Yusufu baderha: entondo erharhulumiri, na hali endogomi z'ecuma emwa abakanani balamire omu lubanda, okubo Bali e Beti Sheani na omu mirhundu yage, na okubo Bali omu lubanda lwa e Yizreli. ¹⁷ Yoshua abwira enyumpa ya Yusufu, kuli Efrahimu na Manasi: muli lubaga lenene, na oburhwali bwinyu buli bunene, arhali cigabi cisungunu mwagwarha. ¹⁸ Mwagwarha entondo bulya muzirhu mwakuba, n'ebyarhengamwo, byaba binyu, na mwahinva abakanani ciruakaba bagwerhe endogomi w'ecuma bagwerhe n'emisi.