¹ Okugaba ecihugo c'e Kanani yunvagi oku ab'Israheli bayimire omucihugo ce Kanani: Omujinji Eliyazari, na Yoshwa mwene Nuni, n'abagula b'emilala y'abisraheli, bo babagabiraga eco cihugo. ² Erhi bakola bagaba ebishagala babiyeshera ecigole, nk'oku Nyamubaho ali arhegesire Musa, kw'erya milala mwenda n'ecishimbi erhali ecihabwa. ³ Bukya Musa ali ahire e milala ibirhi n'ecihimbi ecabo cihugo ishiriza ly'olwishi lw'e Yordani. Balawi bone arhahaga ishwa. ⁴ Bene Yozefu barhenga mwo milala ibirhi Manase na Ifraimu. barhahaga balawi ishwa, cikwone babaha ebishagala babera mwo n'amalambo gali eburhambi bakayabulira mwo ebintu byabo n'okubikira mwo ebirugu byabo. ⁵ Abisraheli bajira nk'oku Nyamuzinda anali arhegesire Musa, bagaba eco cihugo. ⁶ Bene Yuda bayegerera Yoshwa e Gilgali. Kalebo mwene Yefuno, w'omu mulala gwa Kenazi abwira Yoshwa erhi: Koci kengere bwinja kulya Nyamubaho abwiraga mwambali wa Nnamahanga Musa e Kadeshi-Barneya kurhuyerekire we na ni. ⁷ Nali gwerhe miaka makumi gani erhi mwambali wa nyamuzinda Musa antuma e Kadeshi- Barneya, mpu nci lola gurhi eci cihugo ciyosire, nagaluka, namubwira nk'oku na nabwine ciyosire n'omurhima gukubusire. ⁸ Abirhu rhwali rhwenabo, barhuma abantu bayoboha, cikwone niehe nashimba nk'oku Nyamubaho wani ali antumire. ⁹ Olw'olusiku lwo nanene Musa acigasha aderha erhi: Kalebo, ngasi hoshi walabasire, haba hawe, n'abana wakasiga, bulya washimbire nk'oku Mungu Nnamahanga wirhu ali akurhumire! ¹⁰ Obonage oku Nyamubaho andamize nk'oku anandaganyagya. Ekola miaka makumi gani n'irhanu kurhenga amo abwiraga Musa ntyo, erhi: Abisraheli bali omu mpinga. Buno nkola ngwerhe miaka makumi gali munani n'irhanu. ¹¹ Emisi nali gwerhe amango Musa antuma eyo munda, yonaci gwerhe kuhika ene, na nacilwa entambala nkole na ngasi gundi mukolo. ¹² Ompage erya ntondo yani Nyamubaho ambwiraga bulya nawe wayunvirhe erhya impa. Nali erhi nakubwizire bulya oku Banaki bayiba kwo, n'eyo ntondo mwe mirhundu mizibu mizibu eba. Nkaba Nyamubaho aba haguma na nani, mbahinve nkakulya anandaganyagya. ¹³ Ago mango Yoshuwa agisha Kalebo, mwene Yefune, amuha ecihugo ce Hebroni gwage mwimo. ¹⁴ Ntyo kwo Kalebo mwene Yefune, Bakenazi, ahabagwa mwo omurhundu gwe Hebroni, ciru n'iburha lyage mwoliciba kuhika buno, bulya Kalebo ali ashimbire nk'oku Nyamubaho, Nyamuzinda w'Israheli alimubwizire. ¹⁵ Burhanzi Hebroni kwo akagi derhwa mpu Kiniyati- Araba. Araba abaga ;utu mukulu omu murhundu munene gwa Abamaki. Ago mango ecihugo ca dekerera, cirhacibaga mwo ntambala.