¹ Abimeleki, mwene Yerubali, agenda e Shekemu emunda bashinja ba nina bali, na lolaga anababwirantya, n'oku mulala gwoshi gw'enyumpa y'ishe wa nina. ² Mubwire, muhunyire, omumarhwiri g'abikala boshi b'e Shekemu: kabibakwanine bana makumi galinda, boshi bagala ba Yerubali, bamurhegeke, erhi muntu muguma amurhegeke? Na mukengere okundi bivuha binyu na mubiri gwinyu. ³ Bashinja ba nina banashubulula ebyo binwa omumarhwiri g'abantu boshi b'e Shekemu, n'emirhima yabo yayerekera Abimeleki, bulya bakagicibwira: ali mwenewirhu. ⁴ Bamuha shekeli makumi galinda za nfaranga, bakulaga omunyumpa ya Baali Berite. Abimeleki azikolesa okugula abarhacihashiri n'ebinganyi, bajaga mukulikira. ⁵ Ayisha omunyumpa y'ishe e Ofra, na ayirha benewage, bene Yerubaali, balume makumi galinda okw'ibuye liguma. Yotamu yene wafumire, omurhi wabo bene Yerubaali, bulya alicifulisire. ⁶ Abikala boshi b'e Shekemu n'enyumpa yoshi ya Milo bacigusha, bayisha, bamuyalagaza mwami Abimeleki, hofi n'olukere lwalirhwezirwe omu Shekemu. ⁷ Yotamu akumanyiswa. Agenda aj'okuntondo ya Gerizimu, na ololage oku ayakuzize okw'izu linene: munyunvirhize b'ikala b'e Shekemu, na Nnamahanga amuyunve. ⁸ Emirhi yagenzire okushiga omwami n'okumuheba enyanya lyabo. Babwira omuzetuni: orhurhegeke. ⁹ cikwone omuzetuni gwabashuza: kanaleka amavurha gani, gampa olukengwa lw'emwa Nnamahanga n'abantu, mpulyo nji yima omu mirhi? ¹⁰ N'emirhi yabwira Omtini: yisha we orhurhegeke. ¹¹ Cikwone Omtini gwabashuza: kanaleka oburhuza bwani n'amalehe gani minja mpulyo njirhambula emirhi? ¹² N'emirhi abwira omuzabibu: oyishe orhurhegeke. ¹³ Cikwone omuzabibu gwashuza: kanaleka ecinywebwa cani, cishagalula Nnamahanga n'abantu, lyonjirhambula emirhi? ¹⁴ Lero emirhi yoshi yabwira ishaka ly'emishugi: yisha, we orhurhegeke. ¹⁵ N'ishaka ly'emishugi lyashuza emirhi: nkaba okubwinji mulonzize okunshiga nka mwami winyu, muyishe muyakire omu cihoho cani, nkaba nanga, omuliro gwarhenga omw'ishaka ly'emishugi, n'okushereza ecetre c'e Libani. ¹⁶ Nkantyola, k'oku murhima mwinja mwajijire okuheba Abimeleki nka mwami? Kamwajirire Yerubaali obushinganya n'enyumpa yage? kamwamujirire kushimbana omukolo aùukolire? ¹⁷ Bulya larha amulwirire, aheba akalamukage omu bidarhi, anamurhekuza omumaboko ga Mediani. ¹⁸ Na ninyu, mwamayimuka okurhabalira enyumpa ya larha, mwamayirha abagala, balume makumi galinda okw'ibuye liguma, na mwamayimika Abimeleki mwami, okubantu b'e Shekemu, mugala w'omujakazi wage, bulya ali mwenewinyu. ¹⁹ Nkaba oku murhima mwinja na oku bushinganya mwajirire Yerubaali n'enyumpa yage, ntyola! Abimeleki amushagalule ninyu mumushagalule! ²⁰ Nkaba arhalintyo, omuliro gurhenge muli Abimeleki gushereze abikala boshi b'e Shekemu n'enyumpa ya Milo, na omuliro gurhenge omu b'ikala b'e Shekemu n'enyumpa ya Milo, gushereze Abimeleki. ²¹ Yotamu arhengaho analibirha, aja e Beeri, alamayo kuli na Abimeleki, mwenewabo. ²² Abimeleki arhambwire miaka isharhu kuli Israeli. ²³ Lero Nnamahanga arhumira Abimeleki muka mubi n'abikala b'e Shekemu, abikala b'e Shekemu bagomera Abimeleki, ²⁴ lyo obulyalya ajiraga oku bana makumi galinda, bene Yerubaali bucihola,n'omuko gwabo gujekwo Abimeleki, mwenewabo, wabayirhaga, n'oku b'ikala b'e Shekemu, bamurhabalaga okuyirha benewabo. ²⁵ Abikala b'e Shekemu bamuhebera emirhego, okuntondo, bantu bakagi shakula ngasi boshi bakagigera omunjira hofi nabo. Na Abimeleki amanyisibwa ebyo. ²⁶ Gaali, mwene Ebedi, ayisha n'abalumuna, anagera e Shekemu. Abikala b'e Shekemu bamwikubagira. ²⁷ Bagenda omumpingiro basarhula emizabibu, bashereza engaja, banaciheba okucishinga; banana omunyumpa za ba muntu wabo, balya banywa, banaheherera Abimeleki. ²⁸ Na Gaali, mwene Ebedi, aderha: Abimeleki alindi, na Shekemu alindi, lyorhukolera Abimeleki? Karhali mwene Yerubaali, ka na Zebuli arhaliye murhumisi wage? Mukolere abantu ba Hamori, ishe wa Shekemu, cikwone rhwe, bulyagurhi rhuli rhwakolera Abimeleki? ²⁹ Mashi! nka nie nalikulire olu lubaga, nakabalandwire Abimeleki: ozibuhye omurhwe gwawe, oj' n'omulugenzi. ³⁰ Zebuli, murhegesi w'omurhundu, amanya ebi Gaali aderhaga, mwene Ebedi, n'oburhe bwage bwazuka. ³¹ Arhumira Abimeleki entumwa okw'ihwe okumubwira: lolaga, Gaali, mwene Ebedi n'abalumuna, bayishire e Shekemu, na bayinwire omurhundu kuliwe. ³² Bwonobuno, ogende budufu, we n'olubaga mulimweshi, na ohebe omurhego omu mpingiro. ³³ Na muceracera izuba lishoshoka, wayishi rhabalira omurhundu, na hano Gaali, n'olubaga baliboshi bakurhabalira, wayishibajira nkoku obuhashe bwawe bunali. ³⁴ Abimeleki n'olubaga lwoshi baliboshi, bagenda budufu, na bajira omurhego hofi n'e Shekemu, bacigaba birhumbi bini. ³⁵ Gaali, mwene Ebedi, ayisha, anayimanga okunjira require omumurhundu. Abimeleki n'olubaga baliboshi barhenga ahanali cifulisire. ³⁶ Gaali alangira olubaga, abwira Zebule: lolaga olubaga lwahonoka okuntondo. Zebule amushuza: cihoho c'antondo ecoliwabona nka bantu. ³⁷ Gaali, acirishubirira, aderha: kwobinali lubaga luli lwayandagala okuntondo omu mushosi y'ecihugo; n'ecihimbi ciyishire kugerera olukere lw'abalaguzi. ³⁸ Zebule amushuza: akanwa made ngahi kaligi, we wakagiderha mpu Abimeleki alindi, lyo rhumukolera? Karhali lulyalubaga wakagi ganyagusa olwo? Gendaga bwonobuno, obalwise! ³⁹ Gaali, ashokola alongoline olubaga lw'e Shekemu, analwisa Abimeleki. ⁴⁰ Abimeleki amukulikira, alibirha embere zage na bantu banji bahirima bafire kuhika omunjira edahire omumurhundu. ⁴¹ Abimeleki ayimangira e Aruna, na Zebule ahinva Gaali n'abalumuna barhaciberaga e Shekemu. ⁴² Lisirhondo alubaga lwarhenga omumpingiro. Abimeleki, akumanyisibwa. ⁴³ arhola ecirhumbi cage, acigaba kasharhu, bajira N'emirhi omumpingiro. Erhi abona okulubaga lurhenga omumurhundu, abayimukira, anabashurha. ⁴⁴ Abimeleki n'ababaliboshi bashokola, banaciheba okunjira edahire omumurhundu: birhumbi bibirhi bwacikweba okunali omumpingiro, n'okubashurha. ⁴⁵ Abimeleki arhabalira omurhundu mulegerege gwoshi, agugwarha, ayirha n'olubaga arhimanyiremwo. Buzinda akolola omurhundu ahebamwo omunyu. ⁴⁶ Abantu b'eburhambi bwa Shekemu erhibayunvantyo babalira omu luvumbu lw'enyumpa ya mungu Berite. ⁴⁷ Bamanyisa Abimeleki oku olubaga lwoshi lucigushireyo. ⁴⁸ Lero Abimeleki ayinamuka okuntondo ya salmoni, ye n'olubaga lwoshi lwali hagumanaye. Arhola embasha omukuboko, atwa ihano ly'omurhi, alirhola aliheba oku cirhugo. Buzinda abwir'olubaga lwaliboshi: mwabwine okunjijire, mujireduba nkanie. ⁴⁹ ngasi muguma atwa ihaji liguma na bakulikira Abimeleki, baheba amahaji oku luvumbu, na bayoca abamuli. Ntyo abantu boshi b'eburhambi bwa Shekemu bahweramwo, hofi bantu cihumbi balume n'abakazi. ⁵⁰ Abimeleki arhabalira Tebeti. Amuzungulukira anamugwarha. ⁵¹ Omukagarhi k'omurhundu mwali omushonezo munene, omu olubaga lwoshi lw'omumurhundu lwakagi yakira, balume n'abakazi, babayigaliramwo, banalushonera oku burhungiri. ⁵² Abimeleki, ahika oku mushonezo, agurhabalira, anayegera okumuhango mpu ahebekw'omuliro. ⁵³ Omukazi abanda Abimeleki ecuma c'ecisagiro okw'irhwe, camubera akafunikabwongo. ⁵⁴ Honaho ahamagala omurhabana walimurhwazize emiherho, amubwira: kulula engorho yawe, anyirhe, lyobarhakikaderha kulinie: mukazi wamunigaga. omurhabana amushinga engorho anafa. ⁵⁵ Erhi abalume b'israeli babona oku Abimeleki amafa, bacishubirira ngasi muguma emwage. ⁵⁶ Ntyo Nnamahanga ahirimizakwo Abimeleki, amabi ajirire ishe, omukuniga, benewabo makumi galinda, ⁵⁷ na Nnamahanga ahirimiza okulubaga lw'e Shekemu ngasi mabi bajijire. Ntyo obuheherere bwa Yotamu bwahikirira kulibo.