¹ Abalume ba Efrahimu babwira Gidioni: Gurhi kudesire oku kurhujirantya? Bulyagurhi orharhuhamagire ene okulwisa Mediani? Bajira naye kadali kanene. ² Gidioni abashuza: bici najijire bishushire ebinyu? K'emisigala g'emizabibu ya Efrahimu erhalushiri okusarhula gwa Abiezeri? ³ Omumaboko ginyu mwo Nnamubaho anahebire abarhambo ba Mediani, Orebi na Zeebi. Bici nakajijirage okumushushanya nabyo. Erhi aderhantyo, oburhe bwabo kuliye bwahwa. ⁴ Gidioni ahika oku Yordani anayicira ye nabalya balume magana gasharhu balihaguma naye, balirhamire, cibagendekera okukulikira Mediani. ⁵ Abwira abantu b'e Sukoti: Mumpe, muhunyire, mugati migerwa oku lubaga lundusize, bulya barhamire, nankulikire Zebashi na Salmuna, bami ba Mediani. ⁶ Abarhambo b'e Sukoti bashuza: n'okuboko kwa Zebashi na Salmuna kukola kuli oku buhashe bwawe, lyorhulya omurhwe bwawe omugati? ⁷ Na Gidioni aderha: hano Nnamubaho aba amaheba Zereshi na Salmuna, nayishi vungunyula enyama zinyu n'emishugi y'omwirungu n'oku mabandanyo. ⁸ Kurhengaho ayinamukira e Penueli, na ahuna abantu b'e Penueli byonabirya. Bamushuza nkoku and Sukoti bashuzagya. ⁹ anabwira abantu b'e Penueli nabo: hanongaluka oku murhula, nayishi balandula ogu mushonezo. ¹⁰ Zebashi na Salmuna bali e Karkori n'emirhwe yabo, hofi bantu bihumbi ikumi na birhanu, boshi abalisigire oku murhwe gwoshi gw'a ab'ebushoshokero; balume bihumbi igana na makumi gabirhi bakulasha myampi bayisirwe. ¹¹ Gidioni ahindamuka okunjira y'aalilamire omu mahema, ebushoshokero bwa Nobashi na Yogbeha, na anashurha omurhwe gwalimanyire mpu gucifulisire. ¹² Zebashi na Salmuna balibirha; Gidioni abakulikira; agwarha abami bombi ba Mediani, Zebashi na Salmuna, na ashandaza omurhwe gwoshi ¹³ Gidioni, mwene Yoashi agaluka ebwa ntambala okunjira y'omushozi gw'e Heresi. ¹⁴ Agwarha musole muguma omubantu b'e Sukoti amudokerza, anamuhebera amazino g'abarhambo b'e Sukoti oku lwandiko, balume makumi galinda na nda. ¹⁵ Buzinda ayisha hofi n'abantu b'e Sukoti anaderha: Alaga Zebashi na Salmuna, mwangayagusagya kulibo, omukuderha: k'okuboko kwa Zebashi na Salmuna kukola kuli oku buhashe bwawe, lyorhuha abasirika bawe barhamire omugati? ¹⁶ Arhola abashosi b'omurhundu, na ashurha abantu b'e Sukoti oku mishugi y'omwirungu n'amabandanyo. ¹⁷ Anabirundula n'omushonezo gw'e Penueli, ayirha n'abantu b'omumurhundu. ¹⁸ Abwira Zebashi na Salmuna: gurhi abantu mwayirhaga e Tabora baliyosire? Bashuza: baliyosire nka we, ngasi muguma analiyosire nka mwana wa mwami. ¹⁹ Aderha: Bali balumuna bani, bene nyama. Nnamubaho azine! mucibalekage balame, ntakamuyisire. ²⁰ Na abwira Yeteri, nfula yage: yimuka obanige! Cikwone omurhabana arharholaga engorho yage, bulya aliyobohire, bulya aciri murho. ²¹ Zebashi na Salmuna baderha: yimuka wene, orhunige! bulya okumuntu ali, kwonemisi have eri. Gidioni ayimuka, anayirha Zebashi na Salmuna. Buzinda arhola ebimanyiso byali oku ngamia zabo. ²² Abalume b'israeli babwira Gidioni: orhurambule, na we, na mugala wawe, n'abana ba mugala wawe, bulya wamarhuciza omukuboko kwa Mediani. ²³ Gidioni ababwira: ntamurhambule, na bagala bani barhamurhambule; bulya Nnamubaho ye murhambwire. ²⁴ Gidioni ababwira: namuhuna biguma: ngasi muguma ampe olupeta anabwine nka mpira. Abashombanyi baligwerhe engondo z'amasholo, bulya bali b'Ishmaeli. ²⁵ Baderha: rhwazihana okubulonza. Analambula ecishuli, na ngasi muguma akwebakwo engondo z'empira zage. ²⁶ Obuzirhu bw'engondo z'amasholo Gidioni ahunaga bwahika shekeli jihumbi na magana nda za masholo, buzira ebimanyiso, n'ebisikio, n'emishangi midukula yakagiyambalwa n'abami ba Mediani, na buzira ebizinge byali oku bihesi byabo. ²⁷ Gidioni ajiramwo ecishuli, anaciheba omu murhundu, e Ofra, n'eyo cabà cirugu ca kuhemuka lw'israheli yeshi; gwaba murhego kuli Gidioni n'enyumpa yage yoshi. ²⁸ Mediani ajondera embere z'abana b'israeli, barhanacizusahya irhwe. N'ecihugo carhamuka miaka makumi gani, amango g'akalamu ka Gidioni. ²⁹ Yerubali, mwene Yoashi agaluka ajilama omunyumpa yage. ³⁰ Gidioni abusire bagala makumi galinda, kurhenga muliye, bulya aligwerhe bakazi banji. ³¹ Omuherula wage wali e Shekemu, amauburhira naye omugala bayirisire Abimeleki. ³² Gidioni, mwene Yoashi, afa enyuma ly'obushosi bw'oluhoze, anabishwa omu nshinda za Yoashi, ishe, e Ofra, yali ya mulala gwa Abiezeri. ³³ Erhi Gidioni afa, abana b'israeli barhondera bahemuka oku ma Baali, na barhola Baali Beriti nka mungu wabo. ³⁴ Abana b'israeli barhacikengeraga Nnamubaho, Nnamahanga wabo, wabarhesagya omumaboko g'abashombanyi babo boshi bali bazungulusire. ³⁵ Na barhaci cishwekeraga okunyumpa ya Yerubali, ya Gidioni, enyuma z'aminja goshi ajirire Israeli.