¹ Yerubaali, yeri Gidioni, n'olubaga lwoshi lwali boshi, bazukiriza muceracera, banahanda hofi n'enshoko y'e Horadi. Ikambi lya Mediani lyali enyanya lya Gidioni, ebwa mushozi gwa More, omu lubanda. ² Nnamubaho abwira Gidioni: olubaga odwirhe luli lunene bwenene, lyompeba Mediani omumaboko gabo; banayishi cirhundulika enyanya zani, n'okuderha: kuboko kwani kwacizagya. ³ Oyalagazentya omumarhwiri g'olubaga: ngasi mwoba anayobohire agaluke Anand kuli n'entondo ya Galadi. Bantu bihumbi makumu gabirhi na bibirhi omu lubaga bagaluka, hasigala bihumbi ikumi. ⁴ Nnamubaho abwira Gidioni: Olubaga luciri lwinji. Obahonolere ebwa lwishi, n'eyomunda nakujirira obulondozi; oyunakubwira: oyu mugende mweshi; n'oyu nayishikubwira: oyu arhagende mweshi, arhagende mweshi. ⁵ Gidioni ahonolera olubaga omu lwishi, na Nnamubaho abwira Gidioni: ngasiboshi balamba amishi n'olulimi nka kabwa, wayishibaberula na ngasiboshi bafukama okunywa. ⁶ Abamimire amishi omukugaheka ekanwa n'ecigasha bali mubale gwa balume magana gasharhu, n'abandi boshi b'olubaga bafukama okunywa. ⁷ Na Nnamubaho abwira Gidioni: kugerera abo bantu magana gasharhu bamimire, kwo namurhekuza na oku naheba Mediani omumaboko gawe. Abandi boshi bacishubirire emwababwe. ⁸ Barhola ebiryo by'olubaga n'emishekera. Buzinda Gidioni agalaula abalume b'israeli ngasi muguma ashubira omw'ihema lyage, aberana balya balume magana gasharhu. Ikambi lya Mediani lyali edaku zabo omu kabanda. ⁹ Nnamubaho abwira Gidioni budufu: zuka, ohonokere omw'ikambi, bulya nalihebire omumaboko gawe. ¹⁰ Nkaba oyobohire, honokerayo mwene Pura, mukozi wawe. ¹¹ Wayunva ebibayishiderha, n'enyuma z'aho amaboko gawe gazibuha: honokaga omw'ikambi. bahonoka bone Pura, mukozi wage, kuhika oku bulanzi bw'ikambi. ¹² Madiani, Amaleki, n'abana boshi b'ebushoshokero, balishandire omulubanda nka birhumbi bya nzige, n'engamia zabo zali nyinji now mushenyi guli oku cikombo c'enyanja. ¹³ Gidioni ahikamwo, na lolaga omuntu alyaganirira owabo ebilorho. Akagiderha: nakozire ebilorho, na lolaga, omugati gw'iporoji gwabulungire omw'ikambi lya Mediani; gwayishire gwacishurha okw'ihema, na gwanahirma, gwamahindamuka bwimana, na gwamana balandulwa. ¹⁴ Owabo ashuza, anaderha: ntabindi kulusha engorho ya Gidioni, mwene Yoashi, muntu w'israeli; Nnamahanga anahebire Mediani n'ikambi lyoshi omumaboko gage. ¹⁵ Erhi Gidioni ayunva olulibi lw'ebilorho n'amahugulo gabyo, acikumba anashubira n'omwikambi l'israeli, anaderha: zuki bulya Nnamubaho anahebire ikambi lya Mediani omumaboko ginyu. ¹⁶ Agaba oku birhumbi bisharhu balya Bantu magana gasharhu, aha ngasi muguma omushekera n'akabindi ka mukungula, n'engulumira omu kabindi. ¹⁷ Ababwira: mwayishi nsingiriza na mwayishijira nkanie. Hanonampika omw'ikambi mwayishijira ebinajira. ¹⁸ Na hano mbuha omushekera, nie n'abarhwali a rhweshi, munabuhe mweshi emishekera erhi munazungulusire ikambi, na munaderhe: wa Nnamubaho na wa Gidioni! ¹⁹ Gidioni n'abalya balume igana baliboshi bahika okw'ikambi okumurhondero g'amiza, nkoku baciyusagya baheba abalanzi. Babanda emishekera, babera n'orhubindi baligwerhe omumaboko. ²⁰ Birhya birhumbi bisharhu byaband'emishekera n'okubera orhubindi, na bagwarha oku kuboko kulembe engulumira n'okuboko kulyo omushekera okugubuha, n'okuyakuza: ngorho ya Nnamubaho na ya Gidioni! Babera ngasi muguma ahanali okuburhambi bw'ikambi, n'ikambi lyoshi lyarhondera lyalibirha, n'okuband'endulu bulibirha. ²² Balya bantu magana gasharhu bacirishurha emishekera; na, omw'ikambi lyoshi Nnamubaho abahindulira engorho bone na bone. Ikambi lyalibirha kuhika hofi n'e Abeli Mehola hofi n'e Tabati. ²³ Abalume ba Israeli bacigusha, aba Naftali, aba Asheri, n'aba Manasi, banakulikira Mediani. ²⁴ Gidioni arhuma entumwa omu mushosi ya Efrahimu, okuderha: muhonoke okurhimana Mediani, na mubatwire enjira y'olwishi kuhika e Beti Bara n'eya Yordani. Abalume boshi ba Efrahimu bacigusha banagorh'enjira y'enyishi Beti Bara na Yordani. ²⁵ Bagwarha barhambo babirhi ba Mediani, Orebi na Zeebi, banayirhira Orebi okw'ibuye lya Orebi, na Zeebi oku lwina lwa Zeebi. Bakulikira Mediani banahekera Gidioni ebirhwe bya Orebi na Zeebi ishiriza lya Yordani.