¹ Abana b'israeli bajira ebigayisize Nnamubaho, na Nnamubaho abaheba omumaboko ga Mediani lugero lwa miaka nda. ² Okuboko kwa Mediani kwazidohera Israeli. Lyo bayaka Mediani abana b'israeli, bakayakira omu bikumbegezi omuntondo, omu lwala n'omu mina y'amabuye mazibu. ³ Erhi Israeli akarhwezire emburho, Mediani akagi yinamuka na Amaleki n'abana b'e bushoshokero bw'izuba, n'okubarhabalira. ⁴ Bakagi Mira ecihando hofi nabo, n'okushereza emburho kuhika oluhande lw'e Gaza na barhakagi siza mburho erhi cishwekwa cibuzi, nkafu erhi cihesi omu israeli. ⁵ Bulya bakagi yinamuka n'obuso bwabo n'amahema gabo, bakagiyisha nka lukuli lwa nzige, bali banji, bo n'engamia zabo, bakagiyisha omucihugo okushereza. ⁶ Israeli ahinduka wa buligo enyanya za Mediani, n'abana b'israeli balakira Nnamubaho. ⁷ Erhi abana b'israeli balakira Nnamubaho okubiyerekire Mediani, ⁸ Nnamubaho arhuma Omulebi emw'abana b'israeli. Anababwira: ntya kwo Nnamubaho, Nnamahanga w'israeli adesire: namuyinamulaga kurhenga e Misiri, namukula omunyumpa y'obuja. ⁹ Namurhekuza omumaboko g'aba Misri n'omumango ga ngasiboshi bakagimulibuza; nabahinva embere zinyu; nanamuha ecihugo cabo. ¹⁰ Namubwira: ndi Nnamubaho, Nnamahanga winyu; murhayobohaga e myungu y'aba Amori, g'omucihugo mulamire. Cikwone murhayunvagyaizu lyani. ¹¹ Buzinda malaika wa Nnamubaho ayisha, atamala oku cikunguzo cali e Ofra cali ca Yoasi, w'omumulala gwa Abiezeri. Gidioni mugala akagi kubirha engano omu cishakulo, mpu ayifulike aba Mediani. ¹² Malahika wa Nnamubaho amubonekera anamubwira: Nnamubaho ali haguma nawe, ntwali nkulu! ¹³ Gidioni amushuza: mashi! nahamwirhu, nkaba Nnamubaho ali haguma nirhu, Bulyagurhi ebibyoshi birhuhikire? Na ngahi biri birya birhangazo byoshi ba larha bakagirhubwira, amango bakagiderha: Ka Nnamubaho arharhurhenzagya e Misiri? Bunola Nnamubaho arhulekerire, anarhulesire omumaboko g'aba Mediani! ¹⁴ Nnamubaho amuhindamukira, anaderha: Genda n'eyi misi ogwerhe, onarhekuze Israeli omumaboko ga Mediani; karhalintya nkurhumire? ¹⁵ Gidioni amubwira: mashi! Nnahamwirhu, bici najirhekuzamwo israeli? Lolaga, omulala bwani gwo mukenyi muli Manasi, na nie muzibo omunyumpa ya larha. ¹⁶ Nnamubaho amubwira: Cinaba haguma nawe, na washurha Mediani nka muntu muguma. ¹⁷ Gidioni amubwira: nkaba nyemerirwe embere zawe, ompe ecimanyiso okunyereka okuweri wambwira. ¹⁸ orhajekuli nahano kuhika ngaluke hofi nawe, nderhe entulo yani, nkurherekere. Na Nnamubahoaderha: nabera kuhika ogaluke. ¹⁹ Gidioni arheganya omwanahene, anajira haguma n'ensano, migati erhalimwo ngezo. Aheba enyama omu lugega, n'omurhobo omu ndaha, amulerhera oku cikunguzo, na amurherekera. ²⁰ Malahika wa Nnamahangaamubwira: Rhola enyama n'omugati gurhalimwo ngezo, oguhebe okw'ibuye obulagirekwo n'omurhobo. Anakujira. ²¹ Malahika wa Nnamubaho alambula iromo lyagarhi alifumbirhe omukuboko, kahuma oku nyama n'omugati gurhalimwo ngezo. Lero omuliro gwarhenga omw'ibuye gwayoca enyama n'emigati erhalimwo ngezo. Na Malahika wa Nnamubaho ahirigirha embere zage. ²² Gidioni erhi abona oku anali Malahika wa Nnamubaho, aderha: buhanya emwani, Nnahamwirhu, Nnamubaho! bulya nanabona Malahika wa Nnamubaho masu oku masu. ²³ Na Nnamubaho amubwira: obe n'omurhula, orhayobohe erhafe. ²⁴ Gidioni ayubakira Nnamubaho oluhero aho, analuyika izino Nnamubaho murhula: holuciba guhik'ene e Ofra, yali ya milala gwa Abiezeri. ²⁵ Mwonomwobwo budufu Nnamubaho abwira Gidioni: orhole empanzi nto ya sho, n'empanzi yakabirhi ya miaka nda. Obalandule oluhero lwa Baali luli lwa sho, ovungunyule n'emitungo mizira eri okunyanya. ²⁶ Buzinda wayubaka n'okukereka, okunyanya ly'eribuye, oluhero lwa Nnamubaho, Nnamahanga wawe. Wayishirhola empanzi ya kabirhi, na wayirhula ensirizi, n'enshali z'enshushano wabeza. ²⁷ Gidioni arhola balume ikumi omu bambali, ajira n'ebi Nnamubaho anaderhaga; cikwone bulya aliyobohire enyumpa y'ishe n'abantu b'omumurhundu, abijira budufu, c'arhali mushi. ²⁸ Erhi abantu b'omumurhundu bazuka muceracera, lolaga oluhero lwa Baali luli lubalandule, n'emitungo mizira talk okunyanya bayibezize, na empanzi ya kabirhi yarhuzirwe nka nsirizi oku luhero lwayubasirwe. ²⁹ Babwirana bonene, ndi wajirag'byo? Nanajira obusagasi badokereza. Bababwira: Gidioni, mwene Yoashi, wajirag'ebyo. ³⁰ Lero abantu b'omumurhundu babwira Yoashi. Hulusa mugala wawe afe, bulya anabalandwire oluhero lwa Baali n'okubeza emitungo mizira yali okunyanya. ³¹ Yoashi ashuza ngasiboshi balimuyishire: Kamwe mukwanine okurhabala Baali? Kamwe mugwasirwe okuyishi murhekuza? Ngasiyeshi waderhera Baali afa embera bucè. Nkaba Baali ali mungu, acilwire yene, bulya babalandwire oluhero lwage. ³² N'olwolusiku bayirika Gidioni izino lya Yerubaali, omukuderha, Baali amulwise, bulya ana balandwire oluhero lwage. ³³ Mediani yeshi, Amaleki n'abana b'e bushoshokero, bacigusha, bayicira Yordani, banahanda omw'ikambi lya Yizreli. ³⁴ Gidioni ayunjuzibwa Muka gwa Nnamubaho, Anabanda omushekera, na Abezeri ahagaza oku bamukulikire. ³⁵ Arhuma entumwa omu Manasi yeshi, wahamagalagwa naye oku mukulikira. Arhuma entumwa omu Asheri, omu Zabuloni n'omu Neftali, bayinamuka babarhimana. ³⁶ Gidioni abwira Nnamahanga: nkaba olonzize okurhekuza Israeli oku kuboko kwani, nkoku wakuderhaga, ³⁷ lolaga, naheba oluhu omungo, na oluhu lwone lulobe c'idaho liners liyumusire, namanyirira oku warhekuza Israeli oku kuboko kwani, nkoku wakuderhaga. ³⁸ Byanabantyo. Olusiku lwakulikiraga, azuka muceracera, anyola oluhu, akulamwo olumé, mwarhenga amishi gabumba ecikombe. ³⁹ Gidioni abwira Nnamahanga: oburhe bwawe burhanyakire, naciriderha eriryone: nalilonzize cirijira ecindi cimanyiso n'oluhu: oluhu lwone lubere lukazire, n'engo yoshi eyunjule lumé. ⁴⁰ Na Nnamahanga akujira obwobudufu. Oluhu lwone lwabera lumu,n'engo yoshi yayunjula lumé.