¹ Olwalusiku, Debora ayimba olwimbo haguma na Baraki, mwene Abinoamu. ² Abarhamba baja okwirhwe ly'olubaga omu Israeli, n'olubaga lwaciyerekana okulucirheganyize oku ntambala: mukuze Nnamubaho kulibyo! ³ Bami, muyunve! barhwali, murhege ogurhwiri! Nayimba, neci, nayimbira Nnamubaho, nayimbira Nnamubaho, Nnamahanga w'israeli. ⁴ Mashi Nnamubaho! erhi orhenga e Seiri, erhi oshegera omumashwa ga Edomu, Idaho lyajuguma n'amalunga gayayuka, n'ebitu gaba mishi. ⁵ Entondo zageramw'omusisi embere za Nnamubaho, oyu Sinai embere za Nnamubaho, Nnamahanga w'israeli. ⁶ Okumango ga Shamgari mwene Anati, okumango ga Yaeli, emirimbwa erhalimwondi, n'abakagibalama bakagera omunjira z'elumosho. ⁷ Abarhambo barhaligwerhe misi omu Israeli, buzira misi, erhinyimika, nie Debora, erhi nyimuka nka muzire omu Israeli. ⁸ Balilondwire ba mungu bahyahya: Lero entambala yaja oku muhango; barhabonaga erhi itumu erhi nsiribo oku bihumbi makumi gani omu Israeli. ⁹ Omurhima bwani guli oku barhambo b'israeli, okubalya b'olubaga lwacigoshwire okulwa. Mukuze Nnamubaho! ¹⁰ Mwemushonyire oku bihesi byeru; mwemutamala oku ntebe, na mwe mulambagira oku mulimbwa, muyimbe! ¹¹ Hali n'olubi lw'abalasha emyampi ahabadoma amishi, mukuze aminja ga Nnamubaho, aminja y'obulonza hi bwage omu Israeli! Lero olubaga lwa Nnamubaho lwahonoka oku mihango. ¹² Zuka, zuka, Debora! zuka, zuka; n'olwimbo! Yimuka Baraki, na oheke empira zawe, mwene Abinoamu! ¹³ Lero emisigala y'olubaga yahasha okuburhwali, Nnamubaho ampa obuhimi oku ntwali. ¹⁴ Emwa Efrahimu hayisha abikala b'e Amaleki. n'enyuma zawe yayisha Benyamini omu birhumbi. Emwa Makiri yarhenga abarhambo, n'emwa Zabuloni abimangizi. ¹⁵ Abarhwali ba Isakari Bali na Debora, na Isakari akulikira Baraki, arhumwa oku nshando zage omu lubanda. Hofi n'olwishi lwa Rubeni, Hali muhigo munene omumirhima! ¹⁶ Bulyagurhi wabezire omu maruli na okuyunvirhiza okuyana kw'obuso? Oku nyishi za Rubeni emihigo yali minji omu murhima! ¹⁷ Galadi ishiriza lya Yordani arharhengaga ahamwage. Bulyagurhi Dani ayimanzire oku bwarho? Asheri atamala oku bikombo by'enyanja, et acirhamukira oku bimbotera byage. ¹⁸ Zabuloni luli lubaga lukalwisa olufu, na Naftali kwonakwo omu mishozi y'empingiro. ¹⁹ Abami bayisha, babalwisa, Lero balwisa abami b'e Kanani, e Tanaki oku mishi g'e Megido; barhahekaga mpira erhi nfaranga. ²⁰ Kurhenga emalunga balwa, omunjira zabo entonde zalwisa Sisera. ²¹ Olwishi lwa Kisoni lwaba rheganya, lwishi lwa mango ga mira, lwishi lw'e Kisoni. Obuzinda bwani bwalabarha entwali! ²² Lero orhushugulu rhw'ebiterusi rhwalibirha, omukuyaka kwa dubaduba kw'abalwi babo. ²³ Muheherere Merozi, kwo malahika wa Nnamubaho adesire, muheherere, muheherere abikala bage, bulya barhayishigi rhesa Nnamubaho, kurhesa Nnamubaho, omu balume ntwali. ²⁴ Yaeli agishwe omu bakazi, muka Heberi, mukeni! Agishwe omu bakazi balama omu mahema! ²⁵ Ahuna amishi, anahana amarha, omucikombe c'olukengwa alerha ensinde. ²⁶ Omukuboko kuguma agwarha omushirho; n'omukulyo agwarha ihama ly'abakozi, ashurha Sisera, amuberanga irhwe, lyamusharhula lyanarhulukana amalanga. ²⁷ Okumagulu ga Yaeli acilambula, ahirima, agwishira. Okumagulu gage acilambula, ahirima, agwishira buzira buzine. ²⁸ Nina wa Sisera alabira ah'idirisha, omu mikango, anayama: bulyagurhi endagomi have elegamire okuyisha? bulyagurhi endagomi zage zirhakanya? ²⁹ Abobukengukwe kulusha umu bakazi bamushuza, na acishuza yene: ³⁰ Karhabwine mpira? kabarhali bazigaba?Munyere muguma, banyere babirhi ngasi muguma, n'empira z'emyambalo z'irangi lya Sisera, empira za mishangi y'irangi, mihange, mishangi y'irangi, mishangi ibirhi mihange, okucishingo c'omuhimi. ³¹ Ntyo kwo abashombanyi bawe boshi bahwa, mashi Nnamubaho! Abamuzigira kwobayorha nk'izuba, erhi lishalala omu burhwali bwalyo. Ecihugo carhamuka miaka makumi gani.