¹ Abana b'israeli bacirijira ebigayisize Nnamubaho, enyuma ly'okufa kwa Ehudi. ² Na Nnamubaho abaheba omumaboko ga Yabini, mwami w'e Kanani, walirhambwire e Hasori. Omurhegesi w'abasirika bage ali Sisera, analilamire e Harosheti Goimu. ³ abana b'israeli balakira Nnamubaho, bulya Yabini aligwerhe ndogomi magana mwenda za cuma, anali barhindibuzize abana b'israeli miaka makumi gabirhi. ⁴ Omwagomango, Debora, mulebi mukazi w'e Lapidoti, ali muzuzi omu Israeli. ⁵ Akagi tw'olubanja idaku ly'ibo lya Debora, egarhi ka Rama na Beteli, omu mushozi gwa Efrahimu; n'abana b'israeli bakagi yinamukira emundali okubatwira olubanja. ⁶ Arhumiza bahamagale Baraki, mwene Abinoamu, w'e Kedeshi Neftali, na anamubwira: kalirhali irhegeko Nnamubaho ahanaga, Nnamahanga w'israeli? Genda, ociyerekeze okuntondo ya Tabora, oheke haguma nawe balume bihumbi ikumi ba bene Neftali na bene Zabuloni; ⁷ Nakula Sisera emunda oli, okulwishi lw'e Kisoni, murhambo w'omurhwe gwa Yabini, n'endogomi zage n'abasirika bage n'okubaheba omumaboko gawe. ⁸ Baraki amubwira: nkaba rhwagenda rhweshi, nayija; cikwone nkarhuhagenziri rhweshi, ntayije. ⁹ Ashuza: nagenda rhwembi; cikwone orhabone irenge omunjira wagera, bulya Nnamubaho aheba Sisera omumaboko g'omukazi. Na Debora ayimuka baja e Kadeshi bona Baraki. ¹⁰ Baraki ahamagala Zabuloni na Naftali e Kadeshi, balume bihumbi ikumi bamukulikira, na Debora bagenda boshi. ¹¹ Heberi, mukeni, aliciberwire n'abakeni, b'oku bene Hobabu, ishazala wa Musa, analihere ihema lyage kuhika oku mushozi gwe Tanaimu, hofi n'e Kedeshi. ¹² Bamanyisa Sisera oku Baraki, mwene Abinoamu, anaciyerekezize okuntondo ya Tabora. ¹³ Na, kurhenga e Horosheti Goimu, Sisera anarhumbika ebwa lwishi lw'e Kisoni endogomi zage zoshi z'ecuma, n'olubaga lwoshi lwali haguma naye. ¹⁴ Lero Debora abwira Baraki: Yimuka, bulya lolaga olusiku Nnamubaho ahebire Sisera omumaboko gawe. Ka Nnamubaho arhakugere embere? Baraki ahonoka okuntondo ya Tabora, adwirhe bantu bihumbi ikumi bamukulikire. ¹⁵ Nnamubaho ashandaza embere za Baraki okubwoji bw'engorho, Sisera, endogomi zage zoshi n'okampi lyoshi. Sisera ahonoka omu ndogomi yage, na aibirha oku magulu. ¹⁶ Baraki ashimbulira endogomi n'omurhwe kuhika e Harosheti Goimu, n'omurhwe gwa Sisera gwoshi gwa hirima okubwoji bw'engorho buzira okusigalaho cirun'omuhuma. ¹⁷ Sisera ayaka okumagulu omw'ihema lya Yaeli, muka Heberi, mukeni; bulya harhali murhula egarhi ka Yabini, mwami w'e Hasori, na enyumpa ya Heberi, mukeni. ¹⁸ Yaeli ahuluka emunda Sisera ali, anamubwira: daha, nahamwirhu, dah'omumwani orhayobohe. Adaha omu ihema lyage, amufulika n'ecibwikwa. ¹⁹ Amubwira: mpanani, nkuhunyire, mishi masungunu gakunywa, bulya enyorha engwerhe. Afunula ecikombe c'amarha, amuha anywa, anamubwikira. ²⁰ Anacirimubwira: oyimango okumuhango, na bakayishikudosa n'okuderha: kahano Hali omuntu? washuza: nanga. ²¹ Yaeli, muka Heberi, arhola okugera gw'ihema, arhola ihama omukuboko, amushegeraho bunyibunyi, na amuheba omugera ahamalanga, gwadaha kuhika omw'idaho. Alihungerire bwenene n'omurhamo; anafa. ²² Na nkoku Baraki alikulikire Sisera, Yaeli ahuluka amurhimana amubwira: yisha, nakulangula omuntu wajalonza. Adaha omumwage, na lolaga Sisera alambukise, anafire, n'omugera omu malanga. ²³ Omwolo lusiku, Nnamahanga abonesa Yabini, mwami w'e Kanani, nshonyi embere z'abana b'israeli. ²⁴ N'okuboko kw'abana b'israeli kwazidohera Yabini, mwami w'e Kanani, kuhika bahererekeza Yabini, mwami w'e Kanani.