¹ Lolaga amashanja Nnamubaho alesire galibuza Israeli, ngasiboshi barhalimanyire entambala z'e Kanani zoshi. ² Alilonzize kwone emiburho yoshi ya Israeli emanyirire entambala, na ngasi barhalizimanyire burhanzi. ³ Ago mashanja bali: barhwali barhanu b'abafilisti, abakanani boshi, abasidoni, n'abahevi balilamire oku ntondo ya libani, kurhangirira oku mushozi gwa Baali Hermoni kuhika oku muhango gwe Hamati. ⁴ Ago mashanja garhabaza okuheba Israeli oku lugero, lyo Nnamubaho amanya erhi bayishikenga amarhegeko alirhegesire b'ishe kugerera Musa. ⁵ N'abana b'israeli balama omukagarhi k'abakanani, abahiti, abaamori, abaperezi , abahevi n'abayebusi; ⁶ bakarhola abanyere babo nka bakabo, bakaherusa n'abali babo oku bagala na okukolera emyungu yabo. ⁷ Abana b'israeli bajira ebigayisize Nnamubaho, bayibagira Nnamubaho, bakolera ama Baali n'enshushano. ⁸ Oburhe bwa Nnamubaho bwayakira Israeli, na abaheba omumaboko ga Kushani Risheataimu, mwami w'e Mesopotamia. N'abana b'israeli barhegekwa na Kushani Risheataimu myaka munani. ⁹ Abana b'israeli balakira Nnamubaho, na Nnamubaho abazukiza omuchiza wabayokwire, Otnieli mwene Kenazi, mulumuna wa Kalebu. ¹⁰ Muka gwa Nnamubaho gwaba kuliye. Aba muzuzi omu Israeli, na anagenda oku ntambala. Nnamubaho aheba Kushani Risheataimu , mwami w'e Mezopotamia omumaboko gage, n'okuboko kwage kwazibuha kuli Kushani Risheataimu. ¹¹ Ecihugo carhamuka miaka makumi gani. Na Otnieli, mwene Kenazi afa. ¹² Abana b'israeli bacirijira ebigayisize Nnamubaho, na Nnamubaho azibuhya Egloni, mwami w'e Moabu, kuli Israeli, bulya bajijire ebigayisize Nnamubaho. ¹³ Egloni acigushira bene Amoni n'abaamaleki, na banaheba njira. Nashurha Israeli, banagwarha omurhundu gw'amabo. ¹⁴ N'abana b'israeli bakolesibwa na Egloni, mwami w'e Moabu miaka ikumi na munani. ¹⁵ Abana b'israeli balakira Nnamubaho, na Nnamubaho abazukiza omuciza, Ehudi, mwene Gera, mubenyamini, orhakagi kolesa okuboko kulyo. Abana b'israeli barhuma kuliye oluhembo emwa Egloni, mwami w'e Moabu. ¹⁶ Ehudi acijirira engorho ya moji gabirhi, ya buli bwikano liguma, na ayikabika idaku ly'emyambalo yage ekulyo. ¹⁷ Abana oluhembo emwa Egloni, mwami w'e Moabu: nabulya Egloni alimuntu oshushagire bwenene. ¹⁸ Erhi ayusa okurhula oluhembo, agaluka abantu bali murhwazize. ¹⁹ Agaluka yene kurhengera omubisabura hofi n'e Gilgali, na aderha: Mashi mwami! Ngwerhe ihwe nakubwira. Mwami aderha: kahwenyenye! na ngasi boshi balihofi naye bahuluka. ²⁰ Ehudi amurhondeza bulya alikola atamire yene omucumpa c'idurhu, anaderha: ngwerhe omwanzi gwa Nnamahanga kuliwe. ²¹ Lero Ehudi alambula okuboko kwage kulembe akulula engorho, anamudikayo omunda. ²² Ciru n'ecigasha caja omunda eyuma z'engorho, n'amashushi gabwikira engorho; bulya arhalyaga engorho omunda yarhulukanyire enyuma. ²³ Ehudi ahulukira omu lulengalenga, amuyigalira omuhango gw'ecumpa, n'enfungulo. ²⁴ Erhi ahuluka, Abakozi ba mwami basinza, babona; na lolaga omuhango gw'ecumpa c'enyanya gulimuhamike. Baderha: okunali acihundikire amagulu omucumpa c'idurhu. ²⁵ Balindirira kasangi kanji; na bulya barhakiyigula omuhango gw'ecumpa c'enyanya, barhola olwigulo bayigula, na lolaga, nawabo afire analambukire okw'idaho. ²⁶ Na omwakokasangi Ehudi alibirha, arhaluka ebisabura, anayakira e Seira. ²⁷ N'erhi ahika, Ananda omushekera okuntondo ya Efrahimu. Abana b'israeli bayandagala haguma naye kurhenga okuntondo, anabarhambula. ²⁸ Ababwira: munkulikire, bulya Nnamubaho anahere abamoabu omumaboko ginyu, bashombanyi binyu. Bayandagala Enyuma zage, bagwarha amaziko ga Yordani ishiriza lya Moabu, barhanalekaga omuntu arhaluke. ²⁹ Bayirha Omwagomango hofi Bantu bihumbi ikumi b'e Moabu, boshi ba kalorho na ntwali, nantaye wafumire. ³⁰ Olwolusiku Moabu abona nshonyi okukuboko kwa israeli. Na ecihugo carhamuka miaka makumi galimunani. ³¹ Enyuma zage, haba Shamgari, mwene Anati. Ayirha bantu magana ndarhu ba bafilisti okucivuha c'empanzi. Naye ali muciza wa Israeli.