¹ Murhumisi muguma wa Nnamubaho arhenga e Gilgali kuja e Bokimu, anaderha: namuyinamwire kurhenga e Misiri, namulrha omucihugo nacigashiraga ba sho okumuha. Nadesire: ntamango navuna endagano yani naninyu; ² na ninyu murhakajira ndagano n'abikala b'omweci cihugo, muyishi hirimya empero zabo. Cikwone murhakengaga izu lyani. Bulyagurhi mwajiragantyo? ³ Nadesire lero: ntaciyishi bahinve embere zinyu; cikwone bamubwira hofi, n'emyungu yabo emubere mirhego. ⁴ Erhi entumwa ya Nnamubaho ebayamaderhantyo oku bana b'israeli boshi, olubaga lwashonya izu lwalaka. ⁵ Bayirika who izino lya Bokimu, na barhuliraho Nnamubaho enterekero. ⁶ Yoshua agaluka olubaga, n'abana b'israeli bagenda ngasibaguma okurhola omwimo gwabo omucihugo. ⁷ Olubaga lwakolera Nnamubaho amango ga Yoshua goshi, n'amango g'abashosi bakagi kolera Yoshua na bobabwine ebirhangazo binene Nnamubaho ajirire Israeli. ⁸ Yoshua, mwene Nuni, afa agwerhe myaka igana n'ikumi. ⁹ Bamubisha omucihugo ahabagwa cigabi, e Timnati Heresi, omumishozi ya Efrahimu, enyanya ly'entondo ya Gaashi. ¹⁰ Eyo miburhoyoshi yahwa hofi nabishe, hazuka eyindi miburho, erhacirimanyire Nnamubaho, erhi ebyajirire Israeli. ¹¹ Abana b'israeli bajira ebigayisize Nnamubaho, na bakolera ama Baali. ¹² Baleka Nnamubaho, Nnamahanga wa b'ishe, wabarhenzagya omucihugo c'emisiri, bagenda okuyindi myungu omu myungu y'embaga zalibazungulusire, bacikumba embere zabo; bagayisa Nnamubaho. ¹³ Baleka Nnamubaho, bakolera Baali na Astoreti. ¹⁴ Oburhe bwa Nnamubaho bwayakira Israeli. Abaheba omumaboko g'abahaguzi babahagula, abaguza omumaboko g'abashombanyi balibazungulusire, na barhahashaga okusimika embere z'abashombanyi babo. ¹⁵ Ngasihoshi bajire, okuboko kwa Nnamubaho kwabalikwo okubashereza nkoku Nnamubaho anakuderhaga, nkoku Nnamubaho anacigashiragabo. Babantyo omu malibuko manene. ¹⁶ Nnamubaho azusa abazuzi, mpulyo babarhesa omumaboko g'abakagi bahagula. ¹⁷ Cikwone barhayunvagya ciru abazuzi, bulya bakahemuka oku yindi myungu, okucikumba embere zabo. Bahinduka dubaduba omunjira b'ishe balishimbire, na barhakenga amarhegeko ga Nnamubaho now b'ishe. ¹⁸ Amango Nnamubaho aganirira abazuzi, Nnamubaho akagiba haguma n'omuzuzi, anakagibaciza omumaboko g'abashombanyi babo akalamu koshi k'omuzuzi, bulya Nnamubaho aliyunrhe obwonjo bw'endulu zabo oku bakagi balibuza n'oku barhindibuza. ¹⁹ Cikwone, omukufa kw'omuzuzi, bakagi hinduka buhyahya kulusha b'ishe, n'okuja okuyindi myungu n'okubakolera n'okucikumba embere zabo, na nakabera omwolwo lugenzi n'omwokwo kudarhabala. ²⁰ Lero oburhe bwa Nnamubaho bwayakira israeli, anaderha: bulya eri ishanja lyagomire endagano yani najiraga na b'ishe, na bulya barhakenzire izu lyani. ²¹ ntakacihinva embere zabo ciru n'ishanja liguma omugo Yoshua asigaga erhi afa. ²² Nantya kwonashikaheba Israeli oku lugero kubagerera, lyomanya erhi bakenga erhi nanga, okukulikira enjira ya Nnamubaho, nkoku b'ishe banalikenzire. ²³ Na Nnamubaho ahumusa ago mashanja arhalihebire omu maboko ga Yoshua, arhana harhaga oku bahinva.