¹ Enyuma za Abimeleki, Tola, mwene Pua, mwene Dodo, muntu wa Isakari, ayimuka okurhekuza israeli; alilamire e Shamiri, omuntondo ya Efrahimu. ² Aba muzuzi omu Israeli lugero lwa miaka makumi gabirhi, n'isharhu; Buzinda afa anabishwa e Shamiri ³ Enyuma zaga, hazuka Yairi, mugaladi wabire muzuzi omw'israeli lugero lwa miaka makumi gabirhi n'ibirhi. ⁴ Aligwerhe bagala makumi gasharhu, bakagigera okubihesi makumi gasharhu, na baligwerhe mirhundu makumi gasharhu, ehamagalwa kuhik'ene Birhwa bya Yairi, omucihugo c'e Galadi. ⁵ Na Yairi afa, anabishwa e Kamoni. ⁶ Abana b'israeli bacijira Kandi ebigayisize Nnamubaho: bakolera ama Baali na ama Ashtoreti, e myungu y'e Ashuru, emyungu y'e Sidoni, emyungu y'e Moabu, emyungu y'abana ba Amoni, n'emyungu y'abafilisti. ⁷ Oburhe bwa Nnamubaho bwayakira Israeli, na abaheba omumaboko g'abafilisti n'omumaboko g'abaamoni. ⁸ Balibuza n'okurhondera abana b'israeli ogwomwaka, na lundi lugero lwa miaka ikumi na munani abana b'israeli boshi bali ishiriza lya Yordani omucihugo c'aba amori omu Galadi. ⁹ Bene Amoni bayicira Yordani okujilwisa Yuda, Benyamini n'enyumpa ya Efrahimu. Na Israeli aja omu malibuko manene. ¹⁰ Abana b'israeli balakira Nnamubaho, omukuderha: Rhwakugomire, bulya rhwalesire Nnamahanga wirhu na rhwakolire ama Baali. ¹¹ Nnamubaho abwira abana b'israeli: kantamurhekuzagya oku ba Misiri, abaamori, bene Amoni n'abafilisti? ¹² N'amango abasidoni, abaamaleki, na Maoni, babalibuzagya, mwandakia, nkantamurhekuzagya omumaboko gabo? ¹³ Cikwone mwandesire mwajikolera eyindi myungu. Byobirhumire ntakacimurhekuza. ¹⁴ Mugende muhamagale abo ba mungu mwalondwire; babarhekuze amango g'amalibuko ginyu. ¹⁵ Abana b'israeli babwira Nnamubaho: rhwagomire; orhujire okusimire. Cikwone orhurhekuze ene. ¹⁶ Bakula emyungu mibalama omukagarhi kabo, bakolera Nnamubaho, abayunviza obwonjo omumalibuko gabo. ¹⁷ Bene Amoni bacigusha bahanda e Galadi, n'abana b'israeli bacigusha bahanda e Mispa. ¹⁸ Olubaga, abarhambo b'e Galadi babwirana bonenane: muntu ndi washokola okurhabalira bene Amoni? Aba murhambo w'abikala b'e Galadi.