¹ Yefta, mugaladi, yali ntwali. Ali mugala wa mukazi ndumba; na Galadi waburhaga Yefta. ² Baka Galadi bamuburhira abana, nabo, erhibakula bahinva Yefta, banamubwira: orhakayima omunyumpa ya larha, bulya oli wa undi mukazi. ³ Na Yefta aciyakira kuli na benewabo, na ajilama omucihugo c'e Tobu. Abarhagwerhi kwabo bacigusha hofi na Yefta, na bakajira amatabaro haguma. ⁴ Enyuma za kasangi kasungunu bene Amoni balwisa Israeli. ⁵ N'erhi bene Amoni bagwerhe balwisa Israeli, abashosi b'e Galadi bajilonza Yefta omucihugo c'e Tobu. ⁶ Babwira Yefta: yisha, waba murhambo wirhu, na rhwalwisa bene Amoni. ⁷ Yefta ashuza abashosi b'e Galadi: kamurhagwarhaga agarhima kulinie mwanampinva omunyumpa ya larha? bulyagurhi munyishire bunola oku mulibwire? ⁸ Abashosi b'e Galadi babwira Yefta: rhukuyishire bunola, lyorhugenda rhweshi, lyolwisa bene Amoni, nalyoba murhambo wirhu, wa b'ikala boshi b'e Galadi. ⁹ Yefta ashuza abashosi b'e Galadi: Erhi mwakampeka okujilwisa bene Amoni, na erhi Nnamubaho akabaheba omumaboko gani, naba murhambo winyu. ¹⁰ Abashosi b'e Galadi babwira Yefta: Nnamubaho arhuyunve atwe n'olubanja. ¹¹ Na Yefta agenda n'abashosi b'e Galadi. Olubaga lwamuheba oku bwimangizi bwabo n'oku muyimika nka murhambo, na Yefta ashubulula embere za Nnamubaho e Mispa, ebinwa byoshi anaderhaga. ¹² Yefta arhuma entumwa omu mwami w'abaamoni, okumubwira: bici biri kulinie nawe, lyokanyagulira, okujira entambala okucihugo cani? ¹³ Mwami wa bene Amoni ashuza entumwa za Yefta: oyu Israeli erhi ayinamuka kurhenga e Misri, agwasirwe ecihugo cani, kurhonderera e Arnoni kuhika e Yaboki n'oku Yordani. Ocingalulire bunola oku bulonza bwinja. ¹⁴ Yefta arhuma entumwa buhyahya emwa mwami wa Amoni, ¹⁵ oku bamaubwire: ntya kwo Yefta adesire: Israeli arhasagi gwarha ecihugo ca Moabu erhi cihugo c'abana ba Amoni. ¹⁶ Bulya amango Israeli ayinamukaga kurhenga e Misri, agezire omw'irungu kuhika okunyanja ndukula, na ahika e Kadeshi. ¹⁷ Lero, Israeli arhum'entumwa oku mwami w'e Edomu, okubamubwire: ondeke ngere omucihugo cawe. Cikwone mwami w'e Edomu arhayemeraga. Arhumira na mwami w'e Moabu, naye alahira. Na Israeli abera e Kadeshi. ¹⁸ Buzinda alambagira kugerera omw'irungu, agomboloka ecihugo ca Edomu n'ecihugo ca Moabu. Bahanda kuli na Amoni, buzira okuja oku budaka bwa Moabu, bulya Amoni luli lubibi lwa Moabu. ¹⁹ Israeli arhumira Shihoni entumwa, mwami wa Amori, mwami w'e Heshboni, na Israeli amubwira: orhuleke rhugere omucihugo cawe kuhika emunda rhuyerekire. ²⁰ Cikwone Shihoni arhacikubagiraga bwenene Israeli okumuleka agere oku budaka bwage. Agusha olubaga lwage lwoshi, bahanda e Yahati, balwisa Israeli. ²¹ Nnamubaho, Nnamahanga w'Israeli, aheba Shihoni n'olubaga lwage omumaboko ga Israeli wabashurhaga, n'okugwarha ecihugo c'aba Amori ciri omw'ezi nciga. ²² Bagwarha Idaho lyoshi lya Amori, kurhangira e Arnoni kuhika e Yordani. ²³ Na bunola, Nnamubaho Nnamahanga w'Israeli, ahinvire aba Amori embere z'olubaga lwage Israeli, kawe gwasirwe oheke ecihugo cabo? ²⁴ Keci mungu wawe Kemoshi akuhire k'orhacigwerhi? N'eci Nnamubaho Nnamahanga wirhu, arhubire embere zirhu, ka rhurhacigwerhi! ²⁵ Bici olushire Balaki, mwene Sipori, mwami wa Moabu? Kajire kadali na Israeli, erhi amulwisize? ²⁶ Hakolahali miaka magana gasharhu kurhangira Israeli alamire e Heshboni n'omu mirhundu emuzungulusire, e Araori, n'emirhundu emuzungulusire, n'omumirhundu yoshi eri okumarhambi enyanya: bulyagurhi orhabakulagaho kurhondera agomango? ²⁷ Ntakuhalalire, cikwone oliwanjirira kubi okundwisa. Mashi, Nnamubaho, atw'olubanja ene ekarhi k'abana b'israeli na bene Amoni. ²⁸ Mwami w'abana ba Amoni arhayunvagya emyanzi Yefta amubwiraga. ²⁹ Muka gwa Nnamubaho ajakuli Yefta. Ayicira Galadi na Manasi; agera e Mispa y'e Galadi; na kurhenga e Mispa y'e Galadi arhabalira abana ba Amoni. ³⁰ Yefta ajira eciragane na Nnamubaho, anaderha: erhi wakaheba abana ba Amoni omumaboko gani, ³¹ ngasiye wayishihuluka omumwani okunyakirira, omukugaluka kwani kwinja emwa abana ba Amoni, ahanwa emwa Nnamubaho, na nayishi muhana nsirizi. ³² Yefta arhabalira abana ba Amoni, na Nnamubaho abaheba omumaboko gage. ³³ Abahebakwo okuhimwa bwenene, kurhondera e Aroeri kuhika e Minite, Bantu haligwerhe nciga makumi gabirhi, na kuhika e Abeli keramini. N'abana ba Amoni bajondera embere z'abana b'israeli. ³⁴ Yefta ashubira omunyumpa yage e Mispa.Na lolaga, omwali ahuluka embere zage n'engoma n'amasamo. Analimwana wage muguma yene, arhaligwrhe mugala erhi undi mwali. ³⁵ Erhi abona, abera emyambalo yage, anaderha: yaa, mwaliwani! Wamampeba omu mazibu, oli muguma wabalibandibuza! Najirire Nnamubaho eciragane ntakanacirhenza. ³⁶ Amubwira: larha, nkaba wajirire Nnamubaho eciragane, onjire kushimana ebyarhenzire omukanwa kawe, bunola nkoku Nnamubaho anakwiholire abashombanyi bawe, bana ba Amoni. ³⁷ Anabwira ishe: injirirwentya: ondekere oluhuma lugero lwa miezi ibirhi! Nacigendera, nyinamukire omu birhwa, ndakire obubikira bwani n'abira bani. ³⁸ Ashuza: Genda! anamulekera oluhuma miezi ibirhi. Anagenda n'abirabage alakira ibikira lyage omubirhwa. ³⁹ Enyuma lya miezi ibirhi agaluka emw'ishe, na ahikiriza kuliye eciragane ajiraga. Arhamanyaga mulume. Kurhangiraho, bwaba bworhere omw'israeli ⁴⁰ oku emiaka yoshi, abanyere b'israeli bajikengera mwali Yefta, Mugileadi, nsiku zini omu mwaka.