¹ Abantu b'emwa Efrahimu bacigusha, bayinamuka enyanya, banabwira Yefta: bulyagurhi wajirilwisa bene Amoni buzira okurhuhamagala rhugende rhweshi? Rhukola rhwyoca enyumpa yawe nawe ohiremwo. Yefta abashuza: rhwagwerhe kadali kanji, nie n'olubaga lwani, n'abana ba Amoni; na erhi muhamagala, murhantekuzagya omu maboko gabo. ³ Erhimbona okurhayishigi ntekuza, naheba obuzine bwani omu bizibu, nanarhabalira bene Amoni. Nnamubaho abampeba omumaboko. Bulyagurhigi ene muntabalire okuyishi ndwisa? ⁴ Yefta agusha abantu b'e Galadi boshi, na alwisa Efrahimu. Abantu b'e Galadi bashurha Efrahimu, bulya abaefrahimu bakagiderha: bulya muli mihera ya Efrahimu! Galadi ali omukagarhi ka efrahimu, n'omukagarhi ka Manasi. ⁵ Galadi agwarha amaziko ga Yordani gali oluhande lwa Efrahimu. Na erhi ow'emwa Efrahimu wayaka akadesire: mundeke ntaluke! abantu b'e Galadi bakagimudosa: k'oli mu Efrahimu? anashuze: nanga. ⁶ Bakagimubwira lero: ntyala, derhaga Shiboleti. Naye anaderhe Siboleti, bulya arhakahashi hubula bwinja. Nantyo abantu b'e Galadi bakagi mugwarha, na okumunigira hofi n'iziko lya Yordani. Omwagomango hafa bantu bihumbi makumi gani bya Efrahimu. ⁷ Yefta abire muzuzi omu Israeli lugero lwa miaka ndarhu; buzinda Yefta, mugileadi, afa, anabishwa omumirhundu ya gileadi. ⁸ Enyuma zage, Ibstani w'e betlehemu aha muzuzi omu Israeli. ⁹ Aligwerhe bagala makumi gasharhu, aherusa bali makumi gasharhu embuga, alerhera n'abagala balikazi makumi gasharhu ihanga. Abire muzuzi omu Israeli lugero lwa miaka nda. ¹⁰ Buzinda Ibtsani afa, anabishwa e Betlehemu. ¹¹ Enyuma zage, Eloni oku bene Zabuloni aba muzuzi omu Israeli. Abire muzuzi omu Israeli lugero lwa miaka ikumi. ¹² buzira Eloni muzabuloni afa anabishwa e Ayaloni, omucihugo ca Zabuloni. ¹³ Enyuma zage, Abdoni, mwene Hileli, mpiratini, aba muzuzi omu Israeli. ¹⁴ Aligwerhe bagala makumi gani na binjikulu makumi gasharhu bakagigenda oku bihesi makumi galinda. abire muzuzi omu Israeli lugero lwa miaka munani; ¹⁵ Buzinda Abdoni, mwene Hileli, mpiratini, afa, anabishawa emwa Piratonu, omucihugo ca Efrahimu, oku mushozi gwa Amaleki.