¹ Abana b'israeli bacirijira ebigayisize Nnamubaho; na Nnamubaho abaheba omumaboko g'abafilisti, lugero lwa miaka makumi gani. ² Hali omuntu w'e Sorea, w'omubuko bwa Dani, yewakagi hamagalwa Manoa. Mukage yali ngumba, arhanakagiburha. ³ Malahika wa Nnamubaho abonekera mukage anamubwira: lolaga oku oli ngumba, orhagwerhi na mwana; wab'izimi, waburha n'omurhabana. ⁴ Kurhangira buno, ocilange, orhanywe manvu erhi ndalu, orhanalye b'ishembo. ⁵ Bulya wab'izimi waburha n'omwana. Omwembe lurhakagera okw'irhwe lyage, bulya oyomwana ayishibà munaciragane wa Nnamahanga kurhangira omunda ya nina; na ye warhondera okurhekuza israeli omumaboko g'abafilisti. ⁶ Namukazi agenda abwir'iba; omuntu wa Nnamahanga ananyishire, ananalishushire Malahika wa Nnamahanga, nshusho ya kuyobohwa. Ntamudosize anali wangahi, arhanakagiburha izino lyage. ⁷ Cikwone anambwizire: wab'izimi, na waburha omwana; na kurhangira buno, orhanywe manvu erhi ndalu, erhi kulya b'ishembo, bulya oyomwana aba munaciragane wa Nnamubaho hurhondera omunda ya nina kuhika okufa kwage. ⁸ Manoa asalirantya emwa Nnamubaho: Mashi! Nnahamwirhu, olyamuntu wa Nnamahanga walirhumire aciri rhuyishira, anarhuyigirize ebirhukwanine okujira kuli oyomwana waburhwa. ⁹ Nnamahanga ayunva amuhuno ga Manoa, na Malahika wa Nnamahanga aciri yishira omukazi erhi atamire omw'ishwa, na iba Manoa erhi bali bonaye. ¹⁰ Alibirha dubaduba okumanyisa iba, anamubwira: olyamuntu wanyishira lulyalusiku amambonekera. ¹¹ Manoa ayimuka, akulikira mukage, baja emunda oyomuntu ali, anamubwira: kawe wadesagya oyu mukazi? Ashuza: nie. ¹² Manoa aderha: Bunola orhubwirage erhi akanwa kawe kahikirira, bici rhukwanine okujirira omwana, na bicirhwajira? ¹³ Malahika wa Nnamubaho ashuza Manoa: omukazi acilange kulibyo namubwizire. ¹⁴ Arhakalabula oku malehe g'omuzabibu, arhakanywa manvu erhi ndalu, arhanalyaga b'ishembo. akenge byoshi namwubwiraga. ¹⁵ Manoa abwira Malahika wa Nnamubaho: orhuyemere rhukugwarhe hitya, na okukurhrganyiza omwanahene. ¹⁶ Malahika wa Nnamubaho ashuza Manoa: Ciru wakanyimanza, ntalya ebiryo byawe, wayishirhulira Nnamubaho. Manoa arhamanyaga bici Malahika wa Nnamubaho ajijire. ¹⁷ Na Manoa abwira Malahika wa Nnamubaho: izino lyawe Wendi lyo rhuyisi guha irenge amango ebinwa byawe byahikirira? ¹⁸ Malahika wa Nnamubaho amushuza: bulyagurhi oliwadosa izino lyani? Liri linja. ¹⁹ Manoa arhola omwanahene n'entulo, anabirherekera Nnamubaho okw'ibuye. Hajirikana ebirhangazo, oku Manoa na mukage bacigwerhe balola. ²⁰ Nkoku omugi gwaligwerha gwayinamuka emalunga, Malahika wa Nnamubaho ayinamuka omumugi gw'omu luhero. Erhibabonantyo Manoa na mukage bayunama bubi okw'idaho. ²¹ Malahika wa Nnamubaho arhacibonekeraga Manoa na mukage. Lero Manoa amanya oku anali Malahika wa Nnamubaho, ²² anabwira mukage: rhwafa, bulya rhwamabona Nnamahanga. ²³ Mukage amushuza: nka Nnamubaho analilonzize okurhuyirha, arhankayankirire enterekero n'ensirizi omumaboko girhu, arhakanarhuyeresire ebi byoshi, na arhakanarhuyunvisize ebyo. ²⁴ Omukazi aburh'omwana, anamuyirika izino lya Samsoni. Omwana akula na Nnamubaho amugisha. ²⁵ Na Muka gwa Nnamubaho arhondera amubirula omu Mahane-Dani, ekagarhi ka Sorea na Eshtaoli.