¹ Samsoni ayandagalira e Timna, na abonay'omukazi omu banyere b'abafilisti. ² Erhi ayinamuka, akubwir'ishe na nina, anaderha: nabwine omukaze e Timna omubanyere b'abafilisti; mumuntolere abe mukanie. ³ Ishe na nina bamubwira: kaharhali bakazi omubanyere ba benewinyu n'omu lubaga lwirhu lwoshi? lyojilongeza omukazi emw'abafilisti, barhali bakarhe? Na Samsoni abwir'ishe: omuntolere kwone bulya asimisize. ⁴ Ishe na nina barhalimanyire okw'ibyo birhenzire emwa Nnamubaho: bulya Samsoni akagilinza ecirhumire c'akadali oku baflilisti. Omwagomango, abafilsti balirhegesire ab'israeli. ⁵ Samsoni ayandagala boshi n'ishe na nina e Timna. Erhibahika oku mizabibu y'e Timna, alaga entale yalumba yabarhimana. ⁶ Muka wa Nnamubaho agwarha Samsoni; na buzira okuba n'akantu omukuoboko, Samsoni aber'entale nkakula babera omwanahene. Arhanabwiraga Ishe na nina ebi anajijire. ⁷ Ayandagala, anaganira n'oyomukazi, anamusimisa. ⁸ Enyuma lya kasanzi kasungunu acirishubira e Timna okumurhola, na ayahuka okulola ecirunda c'entale. Na lolaga, ashimana entumbi y'enjuci n'ecigukulu c'obuci omucirunda c'entale. ⁹ Aburhola omumaboko gage, anajalyakwo omunjira, na erhi ahikaho ishe na nina, anabaha, na banalya. Ci arhababwiraga oku anakulaga obwobuci omucirunda c'entale. ¹⁰ Ishe was Samsoni ayandagalira e Timna emwabo namukazi. Na eyomunda Samsoni ajirisa idinye, bulya bwobwali bworhere be"emisole. ¹¹ Erhibanamubona, bahamagala bashongwe makumi gasharhu na misole bayimanga naye. ¹² Samsoni ababwira: Namutw'omugani. Erhi mwakagumpugulira omu lugero lwa nsiku nda z'idinye, na muka guvumbula, nayishimuha nayishimuha myambalo makumi gasharhu mpingulo. ¹³ Cikwone nka murhahashiri okugumpugulira, mwemwampa myambalo makumi gasharhu mpingulo. bamubwira lerha omugani gwawe, rhuyunve. ¹⁴ Anababwira: omu mulyanyi mwarhenzire ebiryo, na omuntwali mwarhenzire ebinunu. Barhahashaga oku hugula lugero lwa nsiku zisharhu. ¹⁵ Olusiku lwa kalinda babwira omukazi wa Samsoni: yinginga balo arhuhugulire omugani, nkabananga, rhwakuyoca, we n'enyuma ya sho. Kakurhunyaga mwarhuhamagalire? ¹⁶ Muka Samsoni amulakira, anaderha: bulyalya bwone ongwerhekwo, orhanansimiri: wahire abana b'olubaga lwani omugani, orhanagumpugulire! Anamushuza: ntaguhugulire ciru larha erhi nyama; kawe naguhuguliraga? ¹⁷ Amuyamiraho, ezonsiku nda zoshi z'idinye, na olusiku lwa kalinda amuhuguliragwo,bulya akagimulibuza. Na ahana amahugulo g'omugani okubenewabo. ¹⁸ Abantu b'omumurhundu babwira Samsoni, embere izuba lizike: bici binunu nka buci, na bici bya burhwali nka ntale? Anababwira: nkamurhahingaga mweshi n'akabindi kani, murhakamanyire omugani. ¹⁹ muka gwa Nnamubaho amugwarha, anahonokera e Ashkeloni. Ayirhayo Bantu makumi gasharhu, arhola ebibaligwerhe, anahana emwambalo mpingulo oku bamuhuguliraga. Aligwerhwe n'oburhe, anayinamukira omunyumpa y'ishe. ²⁰ Mukage ahabwa wundi omu benewabo, oyu balinywanine.