¹ Enyuma za kasangi kasungunu, okumango g'omusarhulo gw'engano, Samsoni ajisinza mukage, anamuhekera omwanahene. Aderha, nonzize nj'emunda mukanie aliomucumpa cage. Cikwone ishe wa namukazi arhamulikulaga okujamwo. ² Aderha, narhanyize oku wamugayire, nanamuherusa omumw'omushongwe wawe. K'omulumuna arhaliye mwinja kumulusha? Okurhola ahali hage. ³ Samsoni ababwira: Lero ntalinie mubi oku baflilisti, erhinakabajira kubi. ⁴ Samsoni acigendera. Agwarha ba nyambwe magana gasharhu, arhola n'engulumira, buzinda arhla emicira ashwekera omucira oku gundi aheba n'engulumira ekagarhi. ⁵ Anakongeza engulumira, analikira banyambwe omungano, yayoc'amarhulo g'engano, engano okwidaku kuhika oku mashwa g'emizetuni. ⁶ Abafilsti baderha: ndi wajiragantyo? bashuza: Samsoni, mukwi wa Timnieni, bulya anaherusize mukage oku mushongwe wage. B'abafilisti bayinamuka bayoca oyo mukazi, n'ishe. ⁷ Samsoni ababwira: nkantya kwo mujijire? ntakaleka kuhika ncihole kulimwe. ⁸ anashurha bwenene, migongo n'enda; buzinda ayandagala acifulika omu lwala lw'ibuye ly'Etamu. ⁹ Lero abafilisti barhondera olugenzi, bahanda omu yudea, balumira kuhika e Leshi. ¹⁰ Abantu b'e Yuda baderha: Bulyagurhi mwayinamusire okurhurhabalira? Bashuza: rhwayinamusire okuyishishweka Samsoni, lyorhumujira nkoku anarhujijire. ¹¹ byarhuma Bantu bihumbi bisharhu bya Yuda bayandagala ebwa lwala lw'ibuye ly'Etamu n'okubwira Samsoni: korhamanyiri oku abafilisti barhurhegesire? bici warhujirirage? ashuza: nabajijire nkoku banjiraga. ¹² Bamubwira: rhuyishire okukushweka, lyorhukuheba omumaboko g'abafilisti. Samsoni ababwira: muncingashire oku murhanyirhe. ¹³ Bamushuza: nanga, rhulonzize kwone rhukushweke n'okukuheba omumaboko g'abafilisti, ci rhurhakunige. Na bamushweka na migozi ibirhi mihyahya, bamuhulusa n'omulwala. ¹⁴ Erhi bahika e Leshi, abafilishi bashagaluka okumubona. Lero Muka gwa Nnamubaho amugwarha. Emigozi aligwerhe omumaboko yayorha nka yuzi bamanya n'omuliro, n'emigozi yage yahona okumaboko gage. ¹⁵ Abona omwanganga gw'ecihesi mubishi, alambula okuboko kwage okugurhola, anayirhamwo Bantu cihumbi. ¹⁶ Na Samsoni aderha: na mwanganga muguma gwa cihesi, birunda oku birunda; oku mwanganga muguma gwa cihesi, namayirha bantu cihumbi. ¹⁷ Erhi ayusa okuderha, alambulira omwanganga. N'abo bahayirika Ramati leshi. ¹⁸ Asezibwa n'enyorha, ahamagala Nnamubaho, anaderha: wewayemeraga, omukuboko kw'omukozi wawe okurhekuza kunenentya; na kabunola ntaye n'enyorha, na kampirime omumaboko g'abarhali bakarhe? ¹⁹ Nnamahanga abera omugaku omw'ibuye lyali e Leshi, n'amishi garhengamwo. Samsoni anywa, n'omurhima gwage gwarhulula, anahembuka. Kurhangira who bahahamagala Hakore; enacihaba kuhik'ene e Leshi. ²⁰ Samsoni abide muzuzi omu Israeli, amango g'abafilisti, lugero lwa miaka makumi gabirhi.