¹ Amango nalonzagya okufumya Israeli, amahushe ga Efrahimu n'obubi bwa Samaria bwaluga, bulya bakagikola bwifulikwa; omushambo abayishira, N'abanyazi bashandala embuga. ² Barhamanyiri omu mirhima yabo oku nkengire obubi bwabo, cikwone Ebijiro byabo bibazungulusire, biri embere zani. ³ Bali bashagalula mwami oku mahushe gabo, n'abarhambo oku bunywesi bwabo. ⁴ Boshi bali bashungu, bayosire k'ifuru litwane n'omutuzi w'emigati: analeke okugusa omuliro kurhenga okoroga e nshano kuhika erhunde engezo. ⁵ Alusiku lwa mwami wirhu, abarhambo bayishi cilwaza oku ndalu, omwami ayishi rheg'amaboko oku bacibonè. ⁶ Banajire emirhima yabo bisarhazo nka ifuru, obudufu bwoshi omutuzi w'emigati anahunire, na sezi ifuru liyake nka ngulumira. ⁷ Bali badurhu boshi k'ifuru, na balibalya abazuzi babo, n'abami babo bashi bakulumbe: ntaye mulibo ompamagala. ⁸ Efrahimu anacigushe haguma n'embaga, Efrahimu ciri citumbura cirhahindulagwa. ⁹ Ab'ihanga balibamuly'emisi, arhana b'ikebwa; obushosi bulibwa mugonya, arhana b'ikebwa. ¹⁰ Enzizi za Israeli zihamirize kuliye, barhali bashubira emwa Nnamubaho, Nnamahanga wabo, barhanali bamulonza, ciruakaba ntyo. ¹¹ Efrahimu ayisire nka nguku mpanyà, buzira bukengere, bali bakuza Misiri, baje n'e Ashuru. ¹² Erhi bakagenda, nayishi bahebakwo akeshe kani, nayishi bahungulula nka rhunyunyi rhw'emalunga, nayishi bashurha, nkoku nanali barhonzire omu ntimanano yabo. ¹³ Bahehererwe, bulya banyasire! Buhanya kulibo, bulya bampemukire! Nali nabaciza, ci balibaderhera obunywesi. ¹⁴ Barhacilakira emundandi omu mirhima yabo, ci balibacidudumira oku nshingo zabo; banacigushe mpulyo babona engano n'ebyokunywa, n'okuciyegula kulinie. ¹⁵ Nabashusire, nazibuhya n'amaboko gabo; banali bampigira kubi. ¹⁶ Arhali oku Ogala byoshi bagalusire, bayosire nka mpenzi ya bunywesi. Abarhambo babo bahirima oku ngorho, enyanya z'obwirhundulike bw'endimi zabo. Byobyashibajira bintu byanshonyi omucihugo c'e Misiri.